28/3/2013
老闆早一個月已經約左我去做邊青～心感歡喜～皆因打邊爐真係全世界最好玩的活動之一～！！
到左呢日老闆好興奮咁話佢有個好朋友介紹呢間酒樓,話平靚正超抵食~
仲話已經 BOOK 左枱,大家可以準時開飯~!!
到左門口,記憶早之前已經黎過一次, 當日係大班同事叫小菜食飯, 感覺不過不失~
今次黎打邊爐, 加上老闆朋友誠意推介,相信會有另一番驚喜!!
一去到攞位先知原來係兩小時任點任食,地下接待姐姐不但表現勤快,而且效率其高,
講解完個價錢後,就好快咁已經安排左我地上二樓的一張枱,
上到去有另一位小姐接應, 佢帶左我地去左貼住一條大柱的4人枱,
那個位置迫迫挾挾,一睇就覺得兩個人坐都覺得有壓力, 何況我地4個大碼人.仲有D手袋.!!
當我地同服務員要求坐另一張枱時, 佢面黑黑咁話我地只有4個人,安排唔到其他枱,
無錯我地係有4個人,但係當時一D都唔多人,仲有好多吉枱喎~揀其他D枱都應該冇問題
當中我地都有提議和附近一張枱對調, 服務員小姐話果張枱一早已經比人指定了~
之後佢指住一張好遠,喺大廳的最角落,仲放住一把電風扇既6人枱比我地,問我地要唔要~
我心諗…要有風扇咁奇特??乜咁大個集團可以有咁既服務…係咪咁唔憂做?!
之後經過我地商量之後~決定坐果張有強勁風扇的6人枱..
經過咁多事情一坐落當然係拿拿林點湯底同點菜啦~話晒都係計時喎~~
湯底款式唔多,有一般的豬骨鍋,麻辣鍋同埋葯材鍋…
睇落D名好勁,但感覺冇咩驚喜,所以我地叫左個双拼湯底~同一D例牌邊爐餸~
免費飲品方面有黑白氣水,橙汁同淡味啤酒,仲可以另叫酸梅湯同果汁,
我地為保守起見,所以拎左橙汁同啤酒,
調味料方面有生蒜,紅辣椒,豆辦醬,麻辣醬,芝麻醬,蔥花…好一般,我最欣賞係佢的麻辣醬~
等左5分鐘,大家都已經出出入入揀好野飲,又拎晒醬料,埋晒位, 湯底都仲未到~~想點先?
叫服務員跟進下,冇耐終於有菜上枱~真係好驚喜~最先拎上黎既居然係D生肉~~
望住D生肉呆呆下~之後再到湯底,一打開D湯仲未滾~可以話熱都唔熱~蒸氣都冇絲~
當時我地真係火滾了~我相信呢D好難可以發生喺咁大間酒樓身上囉~
等了又等,終於有飯開~
肥牛 – 真係好肥,而且睇落肥到只有肥膏,一D牛肉香味都冇,而且一碟疊一碟,上枱未解晒凍,仲有冰!!
鮮牛肉 – 薄薄几片,真係要慳住食,不過食入口會食出牛肉味~而且冇結冰,算唔錯~!
芝士鱈魚丸 – 以為會有好多芝士味,入口發覺好似街市打邊爐一般貨色,一D驚喜都冇
脆肉鯇骨腩 – 成張點菜紙我地最欣賞的菜色, 有魚味但係唔’醒’,食落好有咬口!!頭兩轉點食落真係好脆有鮮味~但到第三四次點時就只係比脆肉片,不但失去左脆鯇的鮮味,而且仲有少少霉霉地既感覺~~!仲一條骨都冇,之後我地落單時同部長再三強調要’’骨’’, 之後先唻一兩條骨咋~
大魚頭 – 雖然唔係好大隻,但係都好鮮,而且只係一開二,唔會煮好快就爛晒, I LIKE!!
豬爽肉 – 頭一轉質素唔錯,真係好爽口而且唔太肥,第二碟唔知點解肥左兩個碼,食落就好似只喺到食脂肪,一D肉質都食唔出,
炸魚皮 – 份量唔算好多都算LA, 入口一D都唔脆~唔好話唔脆~簡直可以用韌黎形容~浸完湯都咬唔開...
我呢D算係好冇要求的人~都只係咬左一口就放下了~真係太差~!
隨後我地點左兩次’’堂好菜’’點知一次都冇唻,我地問返服務員,佢先話而家唔係時候, 所以冇喎~ ~_~
無疑拎黎墊肉的青菜係好新鮮,絕對可以放埋落個鍋到煮,
但係都補償唔到D主菜咁差的失望感覺!!
成張菜單居然連炸腐皮,炸嚮鈴.白鱔片呢D例牌火鍋菜色都冇,真係好令人失望~
總括黎講 : 真係好多謝老闆朋友咁好介紹,好有信心唔會有下次 ~~~!
题外话/补充资料：
題外話LA
喺報紙上搵到張凡’’惠顧有魚’’送的優惠卷,我記得早前X香集團有同類既優惠,
當時係可以小菜火鍋同時使用~所以就拎出黎問服務員可唔可以一邊火鍋一邊食魚,
服務員話唔可以,食火鍋就唔可以用呢張卷咁話~~
我地再三要求,對方都十個堅持唔用得~我地就放棄左了…
食食下突然熄左燈~~只得返後備電燈同風扇同個電爐冇停~感覺異常浪漫...
好在我地坐喺埋邊近窗邊位置~如果坐返喺中堂,真係乜都唔洗睇~!
好奇怪係其他客人一D都唔感到出奇,佢地好如常咁烚野食,又好如常咁傾計,
就好似咩事都冇發生~~!!!唔通佢地真係呢到既常客,見怪不怪??
一兩次好似會開返燈,但係好快又熄返~服務員一D都唔洗忙住同客人解釋,
就如常做返佢地自己野~仲過黎加湯...~我覺得佢地真係威喎~!
由於未夠鐘關係,所以我地都繼續烚
點知黎左一枱客人,初頭都冇咩事~突然有個哥仔拎左支ABC出黎點完又吹~~!!!真係O左咀~!
會唔會真過份地明目張膽?!!居然可以當入無人之境, 當其他人冇到~!!
其實我地已經有風扇做後盾,理應影响唔大,
但基於真係唔係好頂得順,所以見差唔多夠鐘就埋單走了..
服務員走埋黎問我地係咪要埋單,我地都好有禮貌咁同佢講係LA~
之後佢問我地拎入坐咭~我地几個對望左几野冇人答到佢
因為原來一直都冇人見過張所謂既入坐咭~!! @__@
服務員企喺到我地坐喺到對望…之後同事喺地下執到張咭問係咪呢張
服務員一睇就話唔係,因為晚食咭唔係紅色的…大小姐..我地鬼知咩~~
然後服務員就口講左一個數出黎叫我地比錢…嘩~~咁都得~!!
雖然只係 $ 140X3 (當晚 $140 ,買三送一,兩小時任飲任食~)
但係其實佢都可以扮晒野喺出面行個圈,打過張咭再入黎.埋我地單會好D囉~~
佢地連呢D樣都唔願做比客人睇....好勁~話我知佢係老闆我都信~~
咁奇妙既酒熡.真係令我大眼界..唔洗錢都唔敢再去~~~
(以上食记乃用户个人意见 , 并不代表OpenRice之观点。)
影片
