富聲魚翅海鮮酒家 (已搬遷) 新店位置

我試過這間酒家食過3次飯，第1次菜比較隆重，食午飯時我都有叫雞油花雕蒸蟹、雞炖翅、東星班咁...可能此酒家新開張，細心發現得到他們運用的食材是很講究，亦很細心，一個識食之人最能體會此種心思，有heart的經營人地實知，條東星班蒸得太好味了！花雕蟹，一字記之曰：正！搞到我那日吃過之後成晚都仲掛住...。第2次就冇食得咁隆重，一些點心同埋一些米線咁...值得推薦的是魚湯米線，聽酒家D員工話好多條魚先造到咁濃的魚湯，嘩...好難想像到底有幾多魚，個湯又鮮又甜又濃，次我飽到嘔都要勁撐雙菇魚湯米線！第3次就淨食小食，點心米飯一概欠奉，但咪睇小D小食，真係多款到令人目不暇給！係淨食小食都飽到不得了，酥皮叉燒餐包一如各前幾位食評家及雜誌社大力推薦，而八味豆腐粒、冰鎮芥蘭、砂鍋蝦醬生菜、淨杏仁茶(不是竹笙杏仁茶)及蘿蔔糕一樣都不能錯過！價錢哩...呢方面見仁見智，午市同晚市就梗係唔同D，晚飯價都頗中高，午市如你只吃一兩個炒粉麵飯同埋一些點心小食，我覺得絕對值得，聽講很多名人如陳方安生都來這裡食過...，水準之高，不容置疑！唯希望此酒家能保持水準之作，不讓福臨門，東海等大勢力專美！

噚日嚟咗呢度同班舊同學gathering，初時仲以為好貴。同之前幾位食家一樣，我都係推介焗义燒包，新鮮出爐，不論大人同小朋友都食到lamlam脷！

今朝同屋企人黎富聲飲茶. 未到11點到達, 係全場第一檯客人. 點心紙上選擇唔算少, 而且價錢都唔算貴. 叫左幾樣大路點心, 如粥, 山竹牛肉等, 再加酒樓招牌- 酥皮叉燒餐包以及部長推介o既脆皮西米布甸卷. 叫左野食, 等左20分鐘, d大路點心先至開始陸陸續續送黎, 水準okay. 但係食晒d野, 都未見今日主角, 兩個招牌貨. 催左一陣, 再過15分鐘, 終於見到店員送上鎮店叉燒包. 急不及待一口咬落去, 好好味呀! 酥皮係帶甜o既北海道包脆皮, 裡面o既叉燒餡熱辣辣, 鹹甜適中, 真係超正! 不枉我等佢一個鐘. (好彩今日係悠閒周日, 可以慢慢等) 好快解決左碟包包, 又再等待脆皮西米布甸卷. 等呀等, 再等左15分鐘, 又催左幾次先有得食. 呢個就中規中矩, 用威化紙包住西米布甸炸脆, 布甸無乜味, 不過幾有創意.總括黎講, 食物味道係有質素, 但廚房手腳太慢.

這裡飲茶點心很好,蟹粉小籠飽比得上東海海都or 鴻星,卻比他們便宜,聽人說師傅是從海都過來的,難怪!其他點心小食也很好,叉燒飽和燒肉是必試之選,甜品桂花紅豆糕更是難得的好吃!下次一定要去試試晚飯,據說也是很不錯的.

成日同屋企人飲茶, 都冇咩留意啲食物, 但係呢間酒家啲野食今我留下深刻印象!我一定要向各位推介脆皮叉燒包同埋蟹粉小籠飽!經過呢次飲茶之後, 我再試埋呢度啲晚飯小菜, 結果都冇今我失望, 竟然有鵝肝食, 重要係好正tim! 我重試埋佢地既稻草牛, 都勁正!我自問都算年輕人, 呢度啲野食都好適合我.

各位兄弟,這店食飯要小心, 因結帳時永遠唔知點計數, 你問返佢點計, 佢轉頭作返條數比你.仲話計少咗!已經中過幾次.各位小心!!記住要Check單, 問返佢點計!!

同意呢度點心唔錯,但晚飯水準只係一般:1) 蟹肉桂花炒瑤柱, 蟹肉少都算, 但蟹肉冇味加芽菜出水就是為失敗2) 稻草牛, 牛肉軟稔調味適中, 但冇稻草味3) 桂花燒雞, 唔點汁隻雞冇味...仲叫左其他幾個小菜, 但冇驚喜.其實中菜館晚飯小菜好重要, 希望呢度繼續努力喇...

昨日星期六下午,與男友到富聲飲茶,有發現新大陸的感覺!招牌必食點心係叉燒飽.創出獨家中西合壁的焗法,一客三件,非常好味.另一推介係紅海蜇,勁爽脆,普通海蜇難以比美.(同日航酒店的桃李的品質不相伯仲)叉燒腸粉好好味,腸粉本身軟滑,用一片片的燒,而唔係燒碎.腸粉的豉油是特別配製,非常細心.意式千絲酥是新款點心,外面係炸米粉物體,內藏牛奶,也很好味.潮蓮燒鵝,鵝肉又暖又滑,皮脆多汁.蟹粉鍋貼,蟹粉好多,不過鍋貼皮還是上海館子做的比較好食.煎蘿蔔糕,竟然都可以做得好高班,不是指材料,而係內有好多蘿蔔,香軟綿綿,外面就煎得好香.最後食甜品,係雪梨茶湯圓,不會太甜,感覺健康暖胃.另外,服務細心,值得一讚.這一餐食得好開心,令人感動的是,富聲專注於出品,點心水準極高.直逼一些五星級酒店的中菜廳的水準.但價錢合理.埋單$270幾.相信這間座落在不顯眼的三湘大廈的食肆,續漸會為喜歡吃的人追捧.