影片
293 浏览
肥肥家族旧年去美加探亲时，首次选乘大韩航空，因全体购下商务票，候机时可享用「天合联盟香港贵宾室」嘅设备及餐饮，不过室内并无广播服务，大家要自己留意登机时间。长形嘅贵宾室面积宽广，最入嘅偏厅有多张独立梳化櫈，大部份嘅白色枱仔都有插苏位，方便旅客可边等边叉电。除咗个较轻松舒适嘅偏厅之外，中央有个大型少少嘅用餐大堂，散座嘅餐桌大啲又高啲，只系枱面唔系太干净。尾段拍墙为自助饮品区，有咖啡机、啤酒雪柜、汽水、蒸馏水等等。XO仔就当然系选择饮酒啦！「Cheers！」自选食物中有西式嘅面包、三文治、沙律、甜品等。最有型都要数部班戟机，少入厨嘅小肥都系第一次见。亚洲菜中都有不少热食及炸物。唯一要排队嘅就系个面档，由专人即点即煮四款面品。由于出门口前已经喺屋企食咗晚饭，细佬就简单啲试咗碗台湾牛肉面。牛肉面只属微暖，汤底稀而味淡，面条同牛展块一样偏硬，个人觉得唔系好掂。香港机场内有不少贵宾室，论环境、设施及餐饮质素，「天合联盟香港贵宾室」当真不及本港主场嘅两间航空公司。
继续阅读