名代宇奈備長炭燒鰻魚飯專門店 (希慎廣場) (已結業)

下午咁啱經過 Hyson Place 有少少肚餓，朋友建議上去呢間燒鰻魚專門店試試。 Menu 很簡單。作為燒鰻魚專門店當然叫返招牌菜。見到原條燒鰻魚都只賣$208即刻叫左一條。一上枱就聞到一陣陣炭燒味。 再夾起鰻魚便知道叫原條鰻魚呢個決定係冇錯。鰻魚外脆內軟，肉厚，食落有難得嘅鰻魚香。夾吓夾吓就好快KO 左成條鰻魚。Easily one of the best grilled eels I’ve had in Hong Kong. Nice charcoal smell when presented on the table. Eel is meaty, crispy on the outside but tender on the inside. Sauce doesn’t overwhelm eel’s own flavor.

疫情之下，買外賣返office食已係打工仔新常態。盡量減少外出用餐，減少中招風險。今次用OpenRice app crossover Apple Pay 遙遠叫外賣，去到即攞即走，方便快捷。鰻魚飯性價比一流。超水準。備長炭燒，食到鰻魚帶有濃厚煙燻香，可口好味。白飯軟硬適中，混合左鰻魚醬油汁，更宜入口。赤い味噌汁好濃好味。HK$150 ($138 鳗魚飯+ $12溫泉蛋）真係算係咁。美中不足係鰻魚本身多骨（可吃的），有D位真係要取骨先食，如果唔係口感會好似要吞好多細骨落喉嚨咁。相信係安全既，但感覺唔好囉。$12溫泉蛋有D貴吧？效果亦唔係好明顯。建議餐廳可試試俾顧客食味玉，即用醬油浸過既半熟蛋，效果可能好D。

相信大家行希慎廣場嘅時候，都會經過座位開放式既名代宇奈備長炭燒鰻魚飯專門店~😆 有時行過都會聞到好香既燒鰻魚味~▪️▪️▪️▪️▪️▪️▪️▪️▪️▪️▪️▪️🔸鰻魚丼 （$68）鰻魚食唔到骨幾好~但係鰻魚口感只係普通😌而且鰻魚汁真係比較少🥲小編order左多汁都仲係覺得有啲乾，唔係太食得落啲飯😅🔸鰻魚飯三食 （$88）鰻魚質素比較普通，不過三食勝在三種食法味道都有所不同,冇咁容易食膩嘅感覺🥳份量上面就正正常常😂一個人食啱啱好~😎🔸鰻魚柳川鍋 （$88）柳川鍋入面既蛋整得相當不錯~🥰入口就算幾滑，至於鰻魚就同上面嘅分別不大😆😅▪️▪️▪️▪️▪️▪️▪️▪️▪️▪️▪️▪️▪️雖然味道不算頂尖（畢竟一分錢一分貨）但價錢喺銅鑼灣唔算貴，晏晝想簡單食個鰻魚飯嘅話可以一試~ 最近仲有個鰻魚飯堡，不過當時銅鑼灣分店無曬，歡迎大家去試，同小編講返好唔好食🤤🤤🤤▪️▪️▪️▪️▪️▪️▪️▪️▪️▪️▪️▪️▪️地址:今次幫襯📍銅鑼灣 希慎廣場 12樓1202號📍紅磡 黃埔號 AEON Style地下 G01號舖📍尖沙咀 isquare 304號舖📍將軍澳 東港城 1樓 196 & 197A號舖

一個人食鰻魚飯，係我既浪漫。因為想食鰻魚，但亦想食牛肉，所以選左和風牛肉鰻魚丼，一次滿足我兩個願望。自己一個人去食鰻魚，一啲都唔覺寂寞。可以一邊睇師傅用備長炭燒鰻魚，一邊食已燒好帶有炭燒香味既鰻魚，係一種享受。食過呢個飯之後，發現鰻魚同牛肉原來咁夾。其實鰻魚同牛肉一齊食仲有好多好處，豐富蛋白質補充氨基酸可以增強抵抗力，有機酸幫助消化健脾養胃，而且仲有大量鈣和磷可以強健筋骨。食左呢個飯希望真係會健康左啦，哈哈

中午想找個輕便既午餐，原來難得希慎廣場12樓一出電梯就有間日式餐廳，與同事就即管試試。環境舒服，雖然這店賣點係鰻魚飯。但我想食濕濕地既午餐，便選擇了烏冬，選擇不多，但已經有我喜歡的叉燒烏冬［灸燒叉燒烏冬］。味道可以，叉燒薄切，不過不失的一餐。

尋日同同事去咗呢間食午餐，可能天氣凍，有少少想食啲熱湯烏東，同事都揀咗兩款烏冬食都真係幾好味，雖然個湯底比較淡，但係都幾出色，價錢又合理$120兩碗烏冬， 可以再encore。

之前朋友介紹希慎廣場既名代宇奈備長炭燒鰻魚專門店，放工專程去試下。 當我地一到達希慎12樓，已經聞到好香，而且見到師傅係到用炭爐燒緊d鰻魚，已經好吸引。打開餐牌，基本大部分既野食都離不開鰻魚，咁我地人少少，就揀咗2個主菜加1個小食。主菜鰻魚三食 $88鰻魚併雞扒飯 $88鰻魚肝串 $28首先，鰻魚三食係指三種唔同食法。 先食鰻魚飯，之後加芥末，最後加茶變茶漬飯。 呢個有少少失望，鰻魚冇乜焦香味，而且切成細細舊，冇乜鰻魚味而且唔覺有炭燒過。加咗茶亦唔覺有茶香味。係加芥末後先食到另一種風味。鰻魚併雞扒飯個鰻魚就完全唔同，一上枱已經聞到好香，而且鰻魚表面燒得好焦脆，而鰻魚肉仍然係好濕潤既，十分唔錯。 可惜雞扒太細塊，而且冇乜調味反而令個飯扣咗分。最重要既係，飯量係可以免費加大，適合大食既朋友！最後叫咗個串燒鰻魚肝，同樣師傅都係加咗鰻魚汁去燒。 魚味幾濃郁，而且冇魚肝經常有既苦澀味！ 可惜係上枱果陣，鰻魚肝只係暖身，如果熱少少應該會更加好食！

星期日中午諗住去試下，睇個價錢都唔會特別期望。鰻魚一睇就知係細條品種，但食到有些骨、飯太濕。我食鰻魚3食，問員工即係邊3款。佢話可加鹽、湯及就咁食。最後原來唔係加鹽，係加wasabi。整體算普通。

呢間鰻魚專門店係日本過江龍 價錢合宜又食到高質鰻魚🥰餐廳仲有午市四人同行一人免費優惠😆鰻魚控一定唔可以錯過💓餐廳門外可以睇到大廚用炭火燒每條鰻魚🔥幫每條鰻魚搽醬汁 再睇住佢擺盤送上枱🍽好治療💝.🌟鰻魚重 （上）$138🌟鰻魚丼 $68鰻魚好肥美🥰經炭火燒過 更突顯油脂香醬汁香甜 飯係用左珍珠米 加埋鰻魚油脂撈飯好好食💓不過鰻魚太多骨 食嘅時候要小心啲🙈

叫左個山芋山葵鰻魚 落單果陣同阿姐講要少飯黎到阿姐話: 比多左飯你 食唔晒由佢 一望 碗野好似迷你飯咁 鰻魚份量極之少 唔講我仲以為係鰻魚切粒飯 鰻魚既份量有7少舊 成個飯收人$85 自己係DONKI買$100 2條鰻魚都無咁嬲絕對唔抵食

8點幾太肚餓，到咗12樓聞到好香，又唔想諗食咩，男朋友話不如就試吓呢間鰻魚飯啦。不嬲係香港食鰻魚都無咩期望，但呢間真係不可一不可再叫咗一碗雙層鰻魚丼$108（無影到相），一份鰻魚飯三食$88，單點任何飯類配赤味噌湯及漬物。雙層鰻魚丼5分鐘就上枱，雖然好快有得食。。。鰻魚燒得一啲都唔乾身，爆多骨同埋好腥，說好的備長炭燒呢鰻魚飯三食等咗20分鐘，一打開個蓋啲鰻魚係一粒粒，得六粒。。。笑咗出嚟，可唔可以搵人解釋一下點解要等20分鐘呢奉勸各位，要求其食一餐飯都唔好揀呢間，我寧願揀food court。日本過江龍備長炭燒鰻魚飯專門店喎，做衰曬個名！

黎到銅鑼灣希慎搵Lunch 求其搵間試下 以前試過係日本食鰻魚飯三食真係一試難忘 見到就揀咗呢間 名代宇奈備長炭燒鰻魚飯專門店。見佢鰻魚飯專門店 都幾期待 就叫咗佢個鰻魚飯三食 三種食法 望落都吸引唔錯 份量唔算多 食落都算正常 有原味 加Wasabi 最後加埋茶 就變茶漬 茶味幾好 算係唔錯既。

今日又黎到銅鑼灣希慎覓食見到呢間主打備長炭燒鰻魚飯，門口隔離仲有個大透明玻璃櫥窗，比食客見到師傅係入面細心咁炭燒鰻魚，令人好期待快d入去食呢到8點前入座係有飲品買一送一每個餐都有麵豉湯配上鰻魚冷豆腐，令人好開胃既小食豆腐好滑但挺身，唔會一夾就爛而且豆香味十足溫玉鰻魚丼，一上枱就見到個流心蛋好靚蛋汁濃郁，混合埋鰻魚塊一齊食好滿足，葱花亦增添左口感同香味鰻魚重，炭香味非常香，見到鰻魚表面既微焦，亦好大條肉質鬆軟，而且好多醬汁，重點只係$98，果然好抵食

聽人講得多呢間位於銅鑼灣希慎廣場既《名代宇奈備長炭燒鰻魚飯專門店》,超鍾意食鰻魚既我今次路過決定一試鰻魚重定食，鰻魚夠厚身,入口非常肉質彈牙，魚油好豐富，亦都有淡淡炭香味，配埋甜口既醬汁,加上粒粒分明既白飯。呢一餐非常滿足😋😋😋😋

鰻魚過熟， 咬落黐牙 ， 上枱鰻魚完全唔夠熱， 如果正常 燒好出黎，以我認知塊皮點都會脆， 林到不得了，不過以呢d價錢就算啦， 不過 就唔好叫自己係 過江龍， 真係唔佩囉， 影衰人哋日本公司，仲有 員工態度非常一般， 問佢有冇得訂位， 員工話老細話冇喎 ，佢都唔知， 老細話點就點喎， 呢啲係服務態度？ 呢間餐廳嘅老細， 個人認為你真係要檢討下囉， 你啲員工服務態度咁好， 食物又一般， 咁真係祝你好運