吉野家 (黃大仙中心南館)

营业中

休息中

失望到極點嘅～蕃茄麻辣鍋❗️其實吉野家個一人邊爐我經常都會去食身為一個麻辣控+邊爐怪一聽到吉野家推出麻辣鍋我係抱着極度興奮嘅心情去嘗試結果～不知所謂‼️正常少少來講，個煱係連普通香辣都稱唔上最搞笑係蕃茄麻辣鍋，係冇蕃茄麻辣鍋湯底😂只係用返普通蕃茄湯底再另外加1兜少之又少嘅‘所謂麻辣醬’重點係加麻辣要加$3😅但係換來嘅只係一茶匙左右嘅‘辣醬’唔好話加辣湯底，我直接試味都唔覺得有‘麻味’更何況咁小嘅將加落個湯度係完全冇辣味😱完全有種感覺係好似我出去打邊爐問人哋攞左辣椒油加咗$3嘅意思😞仲要唔辣🤔失望了！有種被騙嘅感覺😑食返佢原本個濃湯仲好！

做咗吉野家會員，今日就試吓佢個手機app外賣自取，見到有個牛雞雙拼飯餐$39咁平，就佢啦！一路行一路落單，加飯加牛汁加薑加辣椒，選埋10分鐘後攞即刻用手機俾錢。之後去到餐廳完全唔使等，去取餐處同個職員講聲，掃個二維碼，就可以攞個餐走喇。返到去一開，個餐果然好大份，飯量多之餘（我選咗多飯），2款餸都份量十足，加埋牛汁、薑片同辣椒，非常惹味！ 食完歎杯日本茶，抵食！可惜外賣餐盒唔環保，如果唔係真係值得經常幫襯！

好耐冇食吉野家，上星期六下午茶時間 經過 見到 dl app 登記會員 有 優惠，即刻登記 ，40蚊都唔洗 買左2個 餐，一個迷你牛飯，2個炸雞 豆腐，同可樂，另一個係細牛飯 加 茶， 食到好飽，差d食唔晒..可惜係個優惠只可以用一次。

食物質素 7/10經過吉野家見到有新搞作就入去試試，除左有飯麵之外，下午茶仲有搭配雞翼同薯角！超級細牛飯+雞翼+薯角就咁望個下午茶餐份量好少，但其實食落超多，不過味道就麻麻啦！牛飯一如以往都好食，佢係用平時啲碗仔裝住，牛肉份量超少！然後薯角同雞翼凍曬唔脆，似係整定又無人叫，咁就攤到凍曬淋曬，味道真心麻麻，只此一次！環境衛生 6/10地方細，不過去個陣好少人，唔洗等位！服務質素 7/10落單出餐好快！

都有好幾年冇去吉野家打邊爐，覺得比大x樂/大x活冇咁大路，個人喜歡港式多D。當日都比較夜，星期六的晚上仍然多人仲等緊位。好難先搵到張枱 ，但2人枱打邊爐啲野唔夠放，好迫。新年期間，有利是封送，附有早餐/下午茶優惠券。既然新推出，就試下赤味噌土手鍋$72。我本來揀了粉絲，但因為太遲已經賣晒，只好揀烏東。落單的時候，職員提醒湯底是辣。不過，我心諗都唔會辣得去邊，就由得去。另外，叫了芝士竹輪鍋定食（野菜清湯）$57是配白飯。兩個都係食肥牛，怕雞會嚡口。買左飛都有排等，依個時候出去斟下豉油，拎餐碗和餐具。原來加湯都係自助式，用碗斟再加入自己鍋內，碗太細，可能都要行兩轉才滿。wow...終於都到了! 看到都有好多隻蠔仔。不過食落真係唔多好，好老，又有少少沙，好采有個辣湯底，才cover到陣味。相比之下，竹輪鍋平啲好食啲。一咬開芝士就爆出來，食2粒唔會好膩。配菜兩個鍋都一樣，有豆腐、蟹柳、冬菇、豆卜、紹菜、金菇、粟米。肥牛夾埋都有10塊，一包比較多肥膏。只好咬走多餘的肥，唔好期望有牛味。讚歧烏東係好食，不過最好早一點放，因為雪的太冰。但個鍋太細，早段又未食晒啲餸，放入去都有困難。我認為都係食竹輪鍋

唔覺唔覺天氣開始轉冷，又到最啱食火鍋嘅時節~之前經過地鐵站，見過吉野家嘅海蜆火鍋廣告超吸引，已經好想試試終於有日有機會去食啦！當日去到嘅時候已經比較夜，只淨返肥牛同埋公仔麵/飯選擇，雖然唔太想食，不過為咗一試海蜆，照殺！成個餐，有菜有肉有麵有海鮮，一個人食已經好豐富最驚喜係真係有好多蜆，起碼十幾二十隻，已且蜆肉都幾大粒，已快餐店嘅水平嚟講，已經收貨肥牛好大塊，鍾意食肥牛嘅朋友一定會好開心！其他配料如豆腐、大白菜都OK，唯一敗筆係個蕃茄湯底，唔夠濃，味道仲有少少假唔知係咪因為我係當日尾水啦……不過我食到個蕃茄湯底真係唔好味＝＿＝可能因為時間已臨近收舖，又有好多人食火鍋，自助區嘅餐具、火鍋湯底、調味料等等已經清空想去食火鍋嘅朋友，最好唔好太夜，如果唔係好易無乜選擇啊！

這次因为趕住做野，所以就外賣了一個細牛肉飯。下午茶嘅細牛肉飯會比起平時時段較為便宜。但裏面的材料並沒有改變，一樣是那麼多。吉野家牛肉飯是出了名好吃的，一般食牛肉飯我都會選擇吉野家的牛肉飯。因為吉野家的牛肉飯，那些牛肉很多，而且飯粒粒分明，好爽口，配埋個牛肉汁。再加些辣椒片，五味粉下去，整個飯便得更為好吃。一般來說，都會有杯茶去配飯，所以食完飯之後，可以飲一口茶。一來可以清一下食下的油，二來可以不用故意買其它飲料。吉野家的牛肉飯是平民之選！

一連四個星期一都有$19 下午茶優惠，嚟到最後一星期優惠既飯餐係<三文魚沙律牛肉飯>。分店都開左好一段時間依然係咁混亂，舖頭面積比以前細好多，所以都明白點解排晒長龍，但我見廚房淨係派餐分餐職員都有四五個，卻依然非常亂，外賣執漏了雞汁，我即時提醒，個員工竟然叫我問佢旁邊同事拎，然後一問個個扮聽唔到，其實原本那位執外賣的員工拎返俾我就完事，因為我見已經pack 好左好多外賣雞汁，明明可以好快解決到既事，點解要繞一圈，反而費時失事。牛肉都係一如既往的水準，三文魚沙律配有紫菜好好食好開胃，呢間分店俾既份量都合理，因為樂富的分店俾的餸份量好少，如果有漬物野菜之類配菜，例如今次的三文魚沙律，可以好肯定只會俾好少份量，不過因為員工合作性效率問題，買個外賣都要等成15分鐘，唔會特別幫襯了。注意：張相係朋友第二間分店幫襯後send 俾我，我外賣三文魚沙律份量只有佢張相既 3份1 ，紫菜更加冇咁多，希望吉野家可以留意下分店食物既水準，質素份量真係好參差。