元朗冰室

营业中

休息中

平時去茶記都會遇咗野食好一般、奶茶咖啡又澀又苦，但喺呢間茶記食又有驚喜喎！奇味火辣烤雞$98$98 又雞又湯又多士，雞肉質嫩，味道唔會死咸，朋友食完第二日帶女朋友再落去食，佢話出面某某專門店都無佢咁好食，性價比高！厚豬扒配辣肉醬飯$59佢地專賣厚豬扒，食它最隱陣，肉質唔鞋，味道剛好，而且肉醬都遍辣，撈飯一流，成碟食哂奶茶我叫多奶走甜，人人口味不同，雖然唔能夠同比賽既水準比較，但佢地最少唔會得個澀字，有茶味，合格！食完都好滿足

夜晚蚊1:00諗唔到食咩？唔通又食麥當勞？唔好啦，咁熱氣。元朗冰室開到兩點，有宵夜時段，肚仔餓就落街食元朗冰室啦，其實我都係第一次食，咁就叫咗個拉麵試吓咁我就叫咗個日式肥牛湯拉麵試吓，咁就配咗佢個地獄湯底，一上到嚟，都幾熱，非常有溫度，飲咗佢啖湯又真係幾辣喎，其實仲有好多配菜包括蟹柳日式雲吞（即係麵粉）同埋啲紫菜仲有啲粟米。咁食拉麵梗係拉麵係主角啦，其他配菜都係配角，拉麵好明顯係用$10兩個嗰啲拉麵，街市都買到，仲衰過以前food court果啲垃圾拉麵，真係寧願食烏冬算，再試吓個肥牛先，哇⋯韌到呢，以為食緊香口膠⋯總之下次宵夜一定唔會叫你過嚟食，不過有咁講，佢呢度出名嘅係厚切豬扒，如果我用一碗拉麵去否定佢存在價值就真係對佢唔公平。。。下次我一定會食厚切豬扒

午餐都吾算要等好耐位坐位都幾多呢間的餐牌好少選擇好難揀左睇右睇揀左好耐先決定到主要係我吾想食豬扒口水雞飯配熱咖啡口水雞好多蒜頭有4分1隻對我一個女仔食都幾多下厚豬扒餐配熱奶茶多士配蒜蓉牛油不過男友吾食蒜蓉問佢有無得轉淨牛油（竟然無）點做生意連呢點甘簡單都無奶茶茶味太濃太澀p.s.服務員見我地一直未點餐3番4次吹我地點餐好似趕我地走甘

今日黎到元朗冰室食飯，知道最近餐廳推出咗一個奇味火辣烤雞套餐，所以就嚟試吓。呢個套餐包括有一個牛肝菌湯、一個蒜香法包、同埋焗薯蓉。可以先食醫下肚，因為烤雞係即叫即整，需要等半個鐘左右。牛肝菌湯好濃好好味，裡面仲有黑椒粒，蒜香法包好香脆，焗薯蓉就正常發揮，都綿密👍等左半個鐘終於上烤雞，烤雞好大隻，一定要兩個人先好叫。皮烤到好脆，咬落啖啖肉，配上香辣惹味嘅醬汁，令人一口接一口🫣🫣🫣消費價錢：1人💰103結論：（10分為滿分）味道：7/10性價比：7/10回頭指數：7/10餐廳名稱：元朗冰室餐廳地址：將軍澳常寧路2號厚德邨TKO Gateway西翼地下W015 & W016號舖

係坑口元朗冰室Lunch$58價錢食一個唔知係撈飯定蒸飯既炒飯口感又濕，飯又淋唔知係咪一早炒好放入蒸櫃保溫尋日食一個星洲炒米又係咁難食 大不如前…唔知係咪換左師傅真係難聽啲講句，我炒仲好食過佢😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡

以前食開正記茶餐廳，結業唯有試下正牌子冰室，沙爺牛面若牛汁唔夠，根本就唔似沙爹牛，同個經理講聲要多汁，萬般不願，儘量喎！結果當然冇！加汁多難，唯有再試第二間，早上4眼女經理都差過茶餐廳過d服務員，咁都有經理做，真係難請人！

小米有活動，六點半完結，順便在附近晚餐。發現厚德有家新餐廳，所以試下。早已知元朗xx有很多分店，但想不到會在TKO開店。在內堂就座，先看看餐牌，炒粉麵飯樣樣有，價格合理。 小米點肥牛烏冬，自己點了招牌厚豬扒。 厚豬扒夠軟身，容易咬; 沒有梘水味，可是豬肉味也欠奉，令我開始想像 : 木瓜酵素?菠蘿酵素?總之食完不會攝牙。 出前一丁     家中不會出現即食麵，所以點丁麵。味道很正常，無可挑剔。 熱奶茶久違的熱奶茶，有茶香，夠絲滑。因為在晚餐飲用，以致晚上仍然很精神，無法入睡。

今日去咗將軍澳呢邊睇吓有咩食，決定嚟呢間元朗冰室食個快嘅下午茶，再去附近探朋友 下午茶時間都唔算太多人，可以直接入座，唔使等位最好我就唔係太肚餓，叫左一個雲吞河粉，朋友就叫咗鐵板餐同埋燒乳鴿，兩個人share 雲吞河粉最快嚟到，鮮蝦雲吞餡料十足，口感非常爽口彈牙，一咬落去豐滿嘅肉汁即刻出晒嚟，每一隻雲吞至少有1.5隻蝦，蝦咬落去嗦嗦聲，非常鮮味河粉軟硬亦都適中 都有試過朋友嘅薯蓉同埋蘑菇湯，薯蓉味道都好creamy, 口感都好滑下午茶來講，價格合理都值得推介

千祈唔好叫蔥油雞扒餐肉飯價錢同食物完全唔符合$64得塊又薄又細塊嘅雞扒價錢mark貴啲唔係問題，份量都唔好咁離譜呀！咁你如果份量細嘅係咪應該價錢低返啲合理啲？已backlist！希望大家都唔好中伏！

厚切豬扒個人要求熟，肉要淋不能乾身食落無soda味(見紅肉），帶小肥且有味。元朗冰室做倒，但肉未有味。在醃肉方面再想想。醃肉前肉含水仍多致醃料不能醃入肉内。此餐50元，算是中高品質中下價錢。

好耐冇去將軍澳，就約咗朋友一起去行街，到咗午餐的時間，朋友話想食焗豬扒飯，看到附近有一間新開張的元朗冰室。就點了一個午餐焗豬扒飯和熱咖啡共＄62。焗豬扒飯：有菠蘿、有蕃茄和洋蔥，但略嫌芝士不多，還好有炒飯底，豬扒都鬆軟，味道一般。熱咖啡就淡咗啲，唔好飲的。再點多一個午餐星洲炒米和熱咖啡成為$55。星洲炒米：有蝦、有叉燒、有洋蔥和三色椒，都算多餸，但係炒得太濕，不是乾的，味道都尚可。熱華田與普通茶餐廳一般水準，沒有分別。整體來說：環境乾淨，服務態度OK。

今日經過坑口見到依間餐廳，聲稱厚豬扒專門店，叫左一個焗豬扒飯$62，首先d飯係濕，已經唔掂啦，扣哂分。其次係d醬唔係蕃茄醬，係類似肉醬汁，蕃茄咬落去無味，奇奇怪怪，都唔知食緊咩，唯一可取之處係豬扒鬆軟最後食淨一半，以後唔會再黎依間食。評分直程1粒星都唔想比

今日嘅午餐係厚切豬扒烏冬+熱奶茶（$51)落咗單唔使5分鐘之後就上枱。厚切豬扒烏冬：雖然叫厚切豬扒, 但都係比平時厚少少，略為失望。切嗰陣都感覺要啲力先可以切開，而且食落都比較乾。味道都冇咩特別，都係用返平時醃肉嘅普通調味料。烏冬亦係普通嘅包裝烏冬,再加埋唔係人人都鍾意食嘅三色豆,我覺得不如正正常常落返條菜仲更加好，湯底係開稀左嘅金寶忌廉雞湯，普普通通咁啦。熱奶茶反而幾好飲，奶味同茶味平衡得啱啱好，又唔會太澀口。

第一次食元朗冰室，所以一定試佢傳聞最出名嘅豬扒，果然冇失望，絕對大塊之餘，炸完都仲係好juicy，味道剛好，唔會太咸，必食😋😋👍呢個早餐$50，係豬扒配蒜蓉多士+即食麵(有雜豆)，份量真係好足，女士食會好飽𠻹🤣🤭可以一餐頂兩餐😂整個早餐都好有水準，值得推介👍順便試埋沙爹牛肉麵，沙爹醬略為少，牛肉反而不錯，唔會又老又多筋又咸，可以一試。下次經開附近又係一個好選擇嘅早餐地點🤗😊

˛ˇ˔˚ 元朗冰室 ˛ˇ˔˚話說都好一段時間冇食過 知道將軍澳新開咗 裝修仲幾靚 咁又走去試下啦💥我叫咗個招牌豬扒鐵板餐 佢個豬扒真係好大塊 😳大過我成隻手 食得出佢唔係用鬆肉粉乸出嚟嗰種口感 佢係實在嘅肉質 👍唔知有冇人同我一樣 最怕食到嗰種又薄又冇味嘅質感 👀我揀咗蒜蓉汁 em...都有蒜蓉味 但係唔會令我覺得好出色或者好有記憶點 反而佢個辣椒油就好香🌶 鍾意食辣嘅朋友記得要問店員拎黎試下 💗跟餐配：🍄蘑菇湯 🥔一個薯茸 🥖一塊蒜蓉多士同☕️一杯嘢飲 甜品：一個豆腐花薯蓉係重牛油味偏creamy 而個湯我最驚訝佢係好香濃菇味 但質地比較杰身似醬多d😅 多士冇特別 就係一塊包 唔脆同唔夠熱 豆腐花就係你喺超級市場買到嘅豆腐花反轉放上碟加幾粒紅豆😂 但價錢$88都好抵食不過你哋就預咗啲嘢係 ！超級油 ！幅相係我用唔知幾多張紙巾印完啲油先影嘅 🤭🥴 要讚一讚佢水準都keep到 同我幾年前食嘅味道係一樣的！