幾年前開張開始幫襯嘅偉偉川菜，基本上隔兩個月就會食一次，今年初開咗私房菜，原有菜式價錢不變，分別係地方企理咗無咁地踎、冷氣凍咗，有兩間房可以包。環境唔係特別 Fancy，食物味道就需要擔起重任，由地道四川師傅掌廚，加上食材新鮮，有時都覺得正過特登返大陸食 😋 新店菜單新增咗特別菜式，最想試嘅有豆苗炒豬肝、火爆黃鱔，暫時食過兩次，奈何同行無人食內臟同鱔呢啲食材，下次搵其他朋友仔陪我再戰 🌶️招牌菜鮮椒牛肉穩居榜首，牛肉次次都係勁新鮮，嫩滑得嚟帶少許筋膜口感（重點係無用梳打粉乸過），簡單加入青紅辣椒圈一齊炒，落埋啲藤椒油麻中帶點清新好鬼好食，輕鬆送 2 碗飯 🍚鮮椒田雞肉質緊實，即叫即劏確保新鮮度，加埋萵筍好開心 🥳辣子雞細細粒唔上粉直接炸到乾身，與花椒乾辣椒花生腰果猛火爆炒，鑊氣十足 🔥 麻香鹹辣恰到好處私房菜仲有變奏版辣子乳鴿（癲)，出面未試過嘅做法，炸乳鴿會嚡少少但肉香更濃，值得一試。手撕包菜周圍都有，但整得好食唔係咁容易，如果火力唔夠就會炒得唔透，椰菜口感難保持清脆，師傅用乾辣椒熗炒做得好好，灒少少陳醋吊味啱啱好，同理土豆絲一樣出色 💫食完咁濃烈嘅一餐，最後整碗冰粉順返條氣，滿足 🥰 以上菜式食過廿次以上，跟住嗌一定無伏 👻四川涼麵同四姐相比會更加重口味，辣椒粉花椒粉甚至調味都好重手，麵質爽口不黏，連埋青瓜好大兜但都食得好過癮，上次比較好琴日食好鹹，仲要辣到飛起，即時同咗老細反映了 🥵另外鮮椒水煮酸菜咩魚都可以慳返，揀嘅魚唔啱，肉質嫩得嚟少少散，好多小刺基本上無可能清除乾淨，食落麻煩又影響口感，建議 Skip 🧏🏽♀️本身算幾食得辣（譚仔中辣），店内大部份菜式無得揀辣度，Default 都 3 小辣 🆙，唔食得辣嘅朋友提前講定，同埋要有心理準備油會比較多 🌞 無論邊間舖，只要當日老細在場會特別好食，佢而家多數喺私房菜坐陣。利申唔同分店都真係多內地學生/ 打工仔，介意嘅話嚟之前自己斟酌吓啦，某程度上都側面印證咗味道係正宗嘅 🤣 📍 偉偉川菜銅鑼灣渣甸坊 30 - 36 號利發大廈 2 樓 205 號舖西環西營盤德輔道西 245 號兆安大廈地舖西環西營盤正街 1 - 7 號寶豐大廈 1 樓 B 號舖（私房菜）…查看更多
