九頭鳥米線

营业中

休息中

餸菜選擇多，有特式，份量多。重慶湯底係似陳相識，酸味可再重些。配菜多了醃豆角但主要是咸味，米線口感好，幼滑。春卷外層似即炸，上碗仲好脆口，有驚喜，但稍幼身口感唔飽滿。值得一提直行到尾sofa卡座，天花油漆會跌粉，一堆散落sofa上，有隱憂

今日公司放lunch去左食一間附近既米線鋪，結果比我發現到原來呢間鋪既質素係非常之高，店舖本身乾淨企理，自己下載二維碼落單，食物都有好多選擇，本身鍾意食辣，間舖仲有好多辣嘅湯底可以選擇，最後我柬左食重慶麻辣湯底既米細加豬腸同腩肉，碗麵出咗嚟之後完全係紅色嘅，當我以為好辣嘅時候，原來麻味辣味岩岩好，而且豬腸同腩肉都非常好食，一啲都唔咸而且口感非常豐富，配埋杯凍檸茶一流。而且係平民價錢，完全值得一去再去。

在上班的日子，有一半都係揀食米線每次都係叫重慶小辣同叫魚肉春卷我每次都係叫一個餸，咁就有5條，每條都大大條而配料腐皮、芽菜及韭菜都好足料每次食完一碗都好飽了！而且好好味😋

天氣太熱, 完全冇胃口食飯, 行經一間叫九頭烏米線, 個名好得意, 而且個餐牌十分色彩繽紛, 好吸睛! 細看之下, 感覺形式同價錢同譚仔米線差唔多. 趁今日冇食午餐, 咁就試下呢間米線. 🌸魚肉春卷米線酸辣湯底雖然九頭烏嘅招牌米線係牛肉, 但俾魚肉春卷吸引咗, 所以留返個牛肉麵下次試!因唔想食辣, 所以冇加辣, 但湯底唔辣都夠味喎, 啲咸酸菜仲好爽脆添; 而且啲米線煮得剛好, 質地唔會太淋, 再配上吸汁皇豆腐皮, 令成碗米線好惹味, 連湯都飲. 之後都冇勁口渴, 讚!

這近十年發覺香港越來越多人喜歡吃米線，坊間米線越來越多今天聽朋友介紹去了一間在藍田的 隱世米線店， 店舖裝飾普通冇什麼特別但感覺非常光猛有精神的感覺，看到這個餐牌非常特別顏色繽紛而且圖片很多很方便我容易去區分，來到這裏當然要試試這裏的米線環顧四周很多人都吃牛肉我就在想這裏的牛肉會不會是招牌菜呢，我立刻叫了一個招牌牛肉麵朋友叫了一個米線，當然不少得 叫個小食吧這裏小食的種類也很多不想 浪費食物，我叫了一個，總結來說味道的確不錯雖然不算頂級但絕對推薦來試下。

今日係藍田九頭鳥開張以黎，我第一次食。平時一直都係食開三哥或譚仔或南記米線，而且見到呢間之前有唔少負評，所以唔想試伏，但試完一次後又覺得唔差。湯底：之前有食評話湯底好鹹，我今日試完覺得唔會，當然有可能辣味遮蓋咗。辣度：我叫麻辣5小辣，辣度比三哥或譚仔上一級，大概就係三哥既3小辣。份量：有食評表示米線份量好少，但出乎意料，米線份量比三哥或南記多，如下圖。配料：我只叫魚肉春卷一餸，一餸有5條，份量足。而且同南記魚肉春卷不同，南記的是腐皮卷包魚肉，雖然硬硬地但唔似即炸。但九頭鳥魚肉春卷似即炸，外皮脆脆地，但魚肉我認為南記好味啲。總體黎講，呢間野開張初期真係唔掂，但宜家好明顯有顯住改善。

食完完全吾口渴好神奇 通常米線鋪好多食完都會超級口渴 雖然三哥係隔離 但因為未食過又見幾多人講所以就去試下 入到去啲位好闊落 無圓枱 全部都係卡位/ 正方形枱設計 平日夜晚去都吾算好爆 不過一直都有人入黎食 絕對會encore

見到呢間餐廳新開左一排，行過成日覺得好香，終於今日入去試吓。見到餐牌發覺啲菜式同譚仔好相似，叫返我平時喺譚仔叫開嘅雞肉麻辣5小辣，然後再叫多咗個霸王雞翼同老公share～老公就揀咗佢平時譚仔叫開嘅清湯，試吓佢嘅豬扒。雞肉米線四川麻辣湯底5小辣第一啖即刻試下湯底先，比譚仔既湯底鹹左啲，我個人覺得爭少少，譚仔嘅湯底比較香。可能因為五少辣太小兒科，冇乜辣嘅香味。米線口感正常，整體ok。豬扒米線清湯同樣湯底都係冇譚仔咁香，鹹味重啲，豬扒熱辣辣上碟，幾香口，同清湯米線幾夾，好食。霸王雞翼- 大 （5隻）如果同譚仔比較，九頭鳥既都係鹹味偏重，比起譚仔嘅土匪雞翼鹹少少，如果比較起來，我覺得譚仔嘅香啲好食啲。價錢同譚仔差唔多，整體質素都唔錯，新店裝修坐得舒服，如果唔同譚仔比較其實唔算差，平價之選👍

印象中呢個位置係譚X雲南米線唔知係埋太耐無去過上到去先知換左集團但基於落雨又凍嘅情況 唔想再周圍行唯有入去試下啦餐牌大致上同舊譚X差唔多但就多左d小菜選擇唸住唔會中伏啦點知落差黎得咁快過橋米線 酸辣湯-湯底偏鹹 缺少開胃感覺-米線份量無特別要求減少 但都呈現少米線狀態-配餸係一塊起 兩塊止！明白大雜燴少而多樣化🫠-炸醬口感偏麻辣鵝腸-香辣惹味 食唔到異味-份量中規中矩為咗啲小食我可能會再幫襯但如果純粹食米線我都係去返識開嗰啲餐廳好過

經常聽人講九頭鳥米線好好食想試好耐可惜在港島太遠最近終於在藍田開了分店開張頭幾日每次經過都見到門口好多人排隊終於等到一日下午可以唔使等位直接入去~.坐低之後 姐姐會比張QR code紙仔你手機點餐佢嘅餐牌同譚仔好相似不過配料同小食就有多啲選擇-蒜泥白肉雖然看上去外表好像不太吸引但食完之後發現有點驚喜無論是豬肉的肉質還是調味都做得相當好-豬潤大腸湖南酸辣米線手機點餐時發現 他每樣食品都可以選擇不同的要求連豬潤都可以選擇生啲或者熟啲啱晒最怕食到啲豬潤過熟太鞋嘅我不過感覺上佢嘅湯底有點普通但豬潤爽口 大腸亦滷得入味.整體感覺不錯下次可以試埋佢其他湯底同埋招牌魚肉春卷

1）這裡的紅油青瓜應該是新鮮即製，吃下去相當清爽。青瓜的清甜配上紅油的酸辣，剩下來的汁用來拌米線剛剛好。這是譚仔比不上的味道。2）另外，墨魚頭淋上辣油，咬下去鮮嫩爽脆，鮮香四溢，值得再點。如果加墨魚頭在湯底裡則會較軟，沒有涼拌的好吃。ps為什麼網上外賣平台不能點涼拌墨魚頭？3）堂食上餐速度有點慢，希望以後可以快一點。4）紅薯粉煮得軟硬適中，配重慶酸辣湯比四川湯底更好。四川麻辣湯底跟譚仔有點相似，沒什麼特色可言。5）米線較軟、較細。

12月9日因要去瓏宛訂乳豬做節，揾食肥華同靚媽就選擇咗，呢間米線店食晚餐，肥華一坐低，望望餐牌肥華就知大鑊，因此店是用顧客手提電話落單，柯打食物這正是肥華呢個歐哋呀伯死穴，本想即時離座走人，但見靓媽好有興趣咁睇個菜牌，在此形勢肥華都唔敢亂唻，最後經此店員工多番指點，才能成功點餐，結果柯打咗一碗招牌米線，一碗豬扒米線和麻辣墨魚頭及蒜泥白肉兩款小食，再加一杯涷檸茶，講真上述幾款食物，此店做得唔錯，靚媽亦食得津津有味，可惜肥華接受唔到，要用電話點餐呢種格局食店，所以就算此店出品好食，肥華都係冇回頭

期待已久嘅藍田九頭鳥分店終於都開到黎藍田啦👏🏻一直聽人講佢地嘅米線好好味 但都未有機會試到呢個位置前身係譚仔 裝修咗好耐之前都期待係咩餐廳嚟嫁呢點知今次經過終於開咗啦！！！佢哋嘢食餐牌同譚x真係好似不過米線更勝一籌 感覺上好似比較淋身同埋幼細少少我哋叫咗豬潤麻辣湯底&雞肉春卷酸辣湯底豬潤烹調時間啱啱好 唔會太韌 容易咬開春卷小食我地亦非常推薦👍🏻好好味兩點鐘左右過去叫野食等候時間差唔多15分鐘比較耐如果係打工仔上班一族lunch time過去食要因住時間

藍田開左間新米線鋪 又見米線關注組都成日提起呢間啲組員推介魚肉春卷同雲南酸辣湯底咁我就跟風試下啦點左魚肉春卷米線雲南酸辣湯底2小辣走芫荽外賣拎走總共$41點知外賣就中伏啦 冇得當場check佢係咪比漏嘢😡 我返到屋企發現成碗米線係冇魚肉春卷架🥹🥹 成兜得啲腐皮同肉碎 我個餸呢？？？收我單餸米線錢又唔比個餸我🥲我原本就係為左試魚肉春卷先嚟食架🤬奉勸大家當場check完外賣先走我就唔會有下次了 唔會再點呢間 避雷湯底普普通通 不如隔離三哥酸辣湯😅

1.首先外賣等足25分鐘，佢地話人多，我理解。2.外賣盒湯太多,米線一放落去全部湯漏曬所以轉返用屋企碗3. 打開先發覺冇咗火腿同竹笙，比錢果時又唔講4.款式同湯底就同某某連鎖米線店一樣，但係又唔夠對方夠味（偏淡）5. 米線偏淋,鹹酸菜唔夠爽 ,其他配料既級數基本上同某連鎖米線店一樣 每次經過見咁多人排隊所以我預期佢會比其他好食， 試咗一次覺得好一般，始終細節上唔夠人哋好，雖然款式多咗湯底多咗份量多咗，但係喺細節上未達到水準，有好大進步空間，加上所有菜式都係以 抄襲為主，但係又冇對手好（因為冇自己既特色，所以只能同某米線店去比較）整體相當失望， 以抄襲山寨去開鋪，小編我會覺得比較失望， 香港需要更多創新同特色嘅鋪頭先會令飲食業更加進步