一寿司 (已結業)

29/4星期六晚幫襯，門口都有人龍呀，八點幾擰飛，等左十五分鐘左右，張飛有電話可以去第二度行街打返去問叫到幾多號，我打去但等左幾分鐘先有人答到我。間舖最特別係個超大魚缸，左邊一直到尾，我睇介紹話有足球場咁長喎，裡面好多熱帶魚仔，同埋一d唔郁o既珊瑚，藍色燈光好靚，似西餐廳多過日本餐廳。舖內的燈光好暗，令人好似暈暈地想訓覺，食食下魚缸轉左紫色，好似魚魚要訓覺咁。餐廳最入有幾張大卡位，每張可以坐到八個人。d壽司比較細同埋薄身，冇板前咁好味，價錢就大家差不多，不過佢都有好多款式，特式貴價小食咁，但出order比較慢，因為得一個師傅負責整sushi，做鬼死佢。服務方面都幾好，有笑容又好禮貌。會再幫襯~~

早幾日行經銅鑼灣，先發現原來呢度開左間一壽司。尖沙咀果間已經去過幾次，認為食物質素應該有保障，所以就入去一試。環境方面，同尖沙咀果間一樣，有個好大的魚缸，不過感覺呢間好似冇咁舒服，而且亦冇左果張特色的”雀籠位”。食物方面，亦冇令我失望。最鍾意係佢0既燒玉子同三文魚刺生，前者熱騰騰甜度適中，後者則夠厚亦夠新鮮。發覺餐牌同之前有少許分別，就係多左鰻魚壽司，因為我本身好鍾意食鰻魚，所以好肯定記得呢度之前係冇。不過呢度的鰻魚就麻麻地，細得黎又冇乜汁，仲有少少濃，和花亭的鰻魚就好食得多。總括而言，呢間亦係一間較有水準的迴轉壽司，係我的第二最愛，第一依然係和花亭！