情人节想锯扒食海鲜，除咗去旺区西餐厅，其实将军澳海滨有好多隐世餐厅望靓海景好有气氛。
将军澳海滨好啱拍拖散步。
呢间“The Hunter”系黎巴嫩人开设嘅地中海菜，可能香港人对呢个菜系有啲陌生，其实好讲究食材天然味道。主要以天然蔬菜、香料调味，突出海鲜、烤肉原始味。
“The Hunter”自设熟成柜，有多款高质熟成靓牛。
呢度亦系香港少数有炭炉嘅餐厅，外籍大厨多以炭火轻烧海鲜、肉扒。而且只用外国食材，蔬菜配料、海鲜肉类全部世界各地运到，真系要咁靓嘅食材先做到传说中鱼有鱼味、牛有牛味，其实好难做到又好正。
海洋风环境，设用餐区同酒吧位。
户外座位就有全海景。
【情人节套餐】
今年情人节套餐有前菜、热汤、海鲜、2人份烟燻USDA牛小排、白朱古力配樱桃蛋糕，一个set满足晒想食海鲜同肉嘅渴求。
情人节套餐$668
前菜·Langoustine
挪威龙虾出名鲜甜弹牙，慢煮做法更加保留到虾肉鲜味。配埋牛油果蓉、鱼子酱一齐食，弹牙软绵两种口感交融。
慢烤挪威龙虾
热汤·Consommé
呢道蘑菇法式清汤望落简单清澈，其实背后好多工夫先滤煮出咁澄澈，但口感浓厚嘅汤身。呢种独特风味，令法式清汤成为顶级热汤㗎。
今次大厨再放入松露义大利饺子，将热汤连饺子一齐入口，蘑菇汤同松露香味会喺口中一齐爆发。
蘑菇法式清汤 配松露义大利饺子
海鲜·King fish
鰤鱼鱼脂丰富，食落鱼味浓郁又有油香。平时日本菜会以刺身寿司上枱，嚟到地中海菜大厨手上就将佢香煎，再简单配上日式高汤。
好钟意鱼皮轻脆，配上嘅高汤味道淡雅唔会抢走鰤鱼鱼味，系成功用鲜味留住记忆点嘅料理。
香煎鰤鱼 配日式高汤
肉扒·Sharing for two Short Ribs
上枱嗰阵真系俾咁大portion吓亲，USDA牛小排劲大件厚肉，食落一如以往肉味浓又有油香。肉质唔会太腍反而嫩中带嚼劲，略带烟燻嘅肉味会愈咬愈突出。
烟燻USDA牛小排(2人份)
甜品·White chocolate and Griottes cake
最后甜品有白朱古力樱桃蛋糕。
【泡泡烟鸡尾酒】
呢度仲有驻场调酒师设计多款鸡尾酒～平时大玩泡泡烟嘅cocktail见得多，估唔到情人节连泡泡烟都成双成对咁sweet！
泡泡烟都咁sweet。
仲有多款鸡尾酒。
THE HUNTER
地址: 将军澳唐贤街29号蓝塘傲地下11号舖
电话: 23300204