下昼想揾个地方chill吓，去东涌远离烦嚣有得谂㖞。呢间黎巴嫩餐厅“Maison Du Mezze”有真·木炭炉烤牛扒、羊肉，独特炭香劲吸引!! 而家每日都有CP值高午市套餐(餐厅逢星期一、二休息)，无论沙律前菜、主菜、甜品都有独立价钱，丰俭由人，系初嚐黎巴嫩菜嘅好选择啊。
沙律前菜推介
炸鹰嘴豆(Falafel)
经典中东素小食～唔好以为无肉就唔好食呀，鹰嘴豆炸到外脆内绵好吸引。
冷开胃菜迷你拼盘(Mini Mix Cold Mezze)
黎巴嫩人饭前会食啲开胃菜(Mezze)，开胃菜有好多款式，仲有冷/热选择。而冷开胃菜(Cold Mezze) 多数系豆类、蔬菜蓉，绵绵滑滑用嚟配彼得包啱晒。午市套餐嘅迷你拼盘就有鹰嘴豆蓉、茄子蓉、核桃红椒蓉。
菲达乾酪茄子沙律(Feta Eggplant Salad)
呢个沙律嘅灵魂系干爽咸香嘅菲达乾酪，加埋外脆内软嘅炸茄子劲开胃。大厨仲特别淋上糖蜜、自家制薄荷酱，层次好丰富。
烤彼得包(Arays)
Arays系黎巴嫩地道料理，烘烤彼得包夹满羊肉碎、乾酪，热辣辣咬开嗰阵仲会拉丝㗎。
茄子大虾法特(Aubergine Shrimp Fatteh)
想试吓黎巴嫩传统料理，都可以拣呢款法特(Fatteh)㗎。其实系将烤彼得饼、鹰嘴豆、奶酪搅拌再焗。“Maison Du Mezze”加多咗茄子、大虾，口感更加丰富啊。
人气主菜
午市套餐有好多高人气料理拣，特别系炭烧羊肉、牛扒真系必食，因为呢度系香港少有炭炉嘅餐厅，炭烧特别正啊!!
阿拉伯饭(Kabsa)
用特殊长米煮制嘅阿拉伯饭，长米会吸满各种香料、食材风味㗎。呢度有羊肉、鱼、大虾拣，lunch嚟讲真系好满足。
羊肉丸(Lamb Kofta)
黎巴嫩菜真系好擅长炸鹰嘴豆饼、肉丸呢啲菜式，金黄外层包住绵密内馅，香口紮实嘅口感好吸引。
Kibbeh Bil Laban
浓郁嘅奶酪酱汁入面系肉丸，用嚟捞饭劲开胃。
烧肉拼盘(Mix Grill)
羊肉fans可以索性拣呢个拼盘，一次食晒羊肉丸(Lamb Kofta)、烧羊排，加咗香料烧特别惹味。
烧西冷扒(Beef Striploin)
始终想要锯扒仪式感，午市套餐都有炭烧西冷扒(200g)。因为用炭炉猛火烧，有种独特炭香仲好juicy㗎。
烤鸡肉串(Shish Tawook)
当地人好钟意食嘅烤肉串，鸡肉会用香料醃到入晒味先，再烧到轻焦肉嫩，可拣配薯条或饭。
特色甜品
面包布甸(Umm Ali)
焗到金黄色嘅面包布甸，软绵绵又有肉桂、坚果香味。
黄金饺(Qatayef with Vanilla Ice-cream)
平时好少甜品系脆卜卜，呢道中东传统甜品Qatayef就系外脆内软，配埋云呢拿冰淇淋食啱啱好。
(左上)Rice pudding、(中)Umm ali、(右)Qatayef with Vanilla Ice-cream
Maison Du Mezze
地址: 东涌怡东路9号湾景荟地下G10号舖
电话: 23300131