大坑手工意粉排队店 “Nocino”，除咗手工意粉吸引一众粉丝外，其实佢哋仲系一间好罕见嘅瑞士义大利语区 Ticino 菜。总厨兼老板 Matthew Ziemski 正正嚟自 Ticino，并于伦敦担任大厨多年。2019年移居香港，希望为香港人带嚟正宗 Ticino 风味。
“Nocino”大坑店好有小酒馆感觉。
观塘店好开扬，木质家俱、植物营造自然乡村风格。
咁其实Ticino实际喺边呢? 确实啲讲系位于瑞士南部，靠近阿尔卑斯山及接壤义大利边境，涵盖冰川至栗子森林，独特地理环境造就特色菜式。
好欣赏主厨Matthew忠于家乡煮法，好多小食、主菜同甜品嘅味道都好地道，有时第一啖真系好惊喜，系从来无食过嘅味道!! 而且每日现制新鲜意粉，即叫即煮特别Q弹有蛋香。想试吓地球另一端味道嘅话，好值得嚟试吓。
对于陌生菜系无从入手嘅话，可以经OpenRice订座预购佢哋嘅「意式瑞士风情四道菜共享晚餐」每位即减$60，由小食、头盘、自家制义大利面、总厨特选主菜再食到甜品，基本上包括晒多款招牌料理啦。
【OpenRice 订座预购优惠】
意式瑞士风情四道菜共享晚餐2位起 (价钱已连服务费)
优惠价$520/位 (原价$580) |
【每日现制】新鲜手工意粉
#Fresh #Handmade Pasta #Prepared in-house daily
嚟到一定要食佢哋自家制手工意粉，如果第一次嚟可以试吓入门版嘅烟燻鸭腿烤蜜桃宽扁面先，系 “Nocino” 一开店就有嘅招牌意粉。用龙蒿、羊奶乾酪、烟燻鸭腿煮制，味道较轻身，馀韵仲有烤桃嘅微甜平衡，大人小朋友都会钟意食。
烟燻鸭腿烤蜜桃宽扁面 (Smoked Duck Leg & Roasted Peach Tagliatelle)
馀韵有烤桃嘅微甜平衡，大人小朋友都会钟意食。
如果想试地道啲嘅风味，可以拣呢道新出饮管面。羊奶之士同烟燻味好浓郁，面包蟹嘅咸香海鲜味比想像中强，有时咬开饮管面仲会爆汁，绝对系重口味之选!!
面包蟹黑椒乾酪饮管面 (Brown Crab Cacio E Pepe Bucatini)
面包蟹嘅咸香海鲜味比想像中强。
【义大利饭】
除咗一系列手工意粉，呢度嘅 Chef’s Special 都有义大利烩饭。Matthew 加咗藏红花烩煮，食多几啖会有种独特香味同微酸。加埋激多乾酪同奶油，烩饭口感好绵密。
另外值得一提系慢煮牛膝，每件牛膝都好厚肉，同印象中嘅欧洲菜一样牛味好浓。而且肉质煮到好松软，轻轻咬落去就化开嘅感觉，钟意呢种慢煮牛口感嘅话，一定要食！
慢煮牛膝义大利烩饭 (Ossobuco Milanese)
牛膝好厚肉，牛味浓郁。
【人气前菜】
呢度好多款小食都系香港少见，好似呢道炸义大利饭球，未食之前以为系咸牛肉味，但一咬开系梅洛红酒带出嚟嘅酸甜味先，牛肉馅嘅肉味会慢慢渗出嚟。外面炸到金黄香脆，内馅又有肉感几正，真心有惊喜。
炸义大利饭球 (Arancini Ticinese)
一咬开系梅洛红酒带出嚟嘅酸甜味，牛肉馅嘅肉味再慢慢渗出嚟。
另一款都系炸波波外形嘅炸瑞士乾酪球，炸皮好厚脆，爆多乾酪馅好浓郁。想好似 Ticino 当地人咁饮住酒慢食倾偈，绝对系必食。
招牌炸瑞士乾酪球 (‘Malakoff’)
炸皮好厚脆，入面爆多乾酪馅
炸物以外，波波外形都有布袋乾酪拣！布袋乾酪好 Creamy，蘸啲开心果碎碎之后，连埋义大利风干火腿一齐食。
布袋乾酪配意式无花果芥末酱 (Burrata & Fig Mostarda)
好有欧洲风味嘅醃鳀鱼，食之前以为会偏咸，但估唔到个咸味啱啱好，食埋粒醃葡萄仲几清甜!! 下面仲有啲烤花椰菜、酸豆叶配料，而且鳀鱼几嫩一啲都唔腥㖞，对香港人嚟讲真系好有新鲜感。
义大利风味醃鱼(‘Pesce in Carpiòne’)
【Nocino甜品】
“Nocino” 有3款甜品－Odette’s提拉米苏(+Nocino核桃酒)、蒙布朗栗子黑加仑子乾酪蛋糕、香浓朱古力牛轧糖蛋糕。今次我哋试咗灵感取自瑞士三角朱古力嘅香浓朱古力牛轧糖蛋糕，蛋糕质地 Creamy 绵密、甜味香浓，下层仲有啲脆脆口感，系好有记忆点嘅甜品。
香浓朱古力牛轧糖蛋糕 (Tobler and Torrone Milk Chocolate Pavé)
【鸡尾酒】
Ticino小餐馆真系好兴边饮酒、边食饭，所以呢度都有好多鸡尾酒拣。如果平时唔饮酒，可以参考吓 Mocktail 推荐～
Sù-Chee- Lemon Honey Gazosa
甜美蜂蜜同酸爽柠檬好Refresh。
以 Lemon Shrub、碳酸水 (Carbonated Water) 调制。
KATARINA- Passion Fruit Tangerine Fizz
强劲碳酸泡泡又有葡萄柚、菠萝果香，好啱夏天解渴!!
以葡萄柚、菠萝、碳酸水调制。
Nocino (香港)
地址: 香港大坑铜锣湾道92E号地舖
电话: +852 60121098