喺屯门三圣附近，除咗海鲜仲有其他选择，例如日本菜、泰国菜等，而呢间居酒屋格调嘅日式餐厅就系其中一间喇。店内以浅色木做设计主轴，灯光明亮，又有吧台座位让食客近距离观赏师傅炮制菜式，另外室外用餐区更可以带同宠物入座，满足各类型客人需要。菜式主打多款时令刺身、寿司、烧物等，其中集12件手握寿司嘅九宫格拼盘、乾酪海胆沾面，更加系必点之选。
三色拖罗
正式开餐前，不妨以三色拖罗当前菜。食材选用日本蓝鳍，一份有齐大拖罗、中拖罗同赤身，每款2件，厚切食落啖啖肉㗎。
本手返‧手握寿司（时令）
虽然呢个手握寿司拼盘用九宫格木盘呈上，但其实合共有12件时令寿司，卖相精致又丰富。款式以刺身寿司为主，但会随食材同季节而转换。而寿司饭则选用北海道七星米，加入经过自家调配嘅赤醋，令饭粒颜色冇咁深沉，但仍然够味。
打卡必点款式
海胆、三文鱼籽同牡丹虾为常见款式
乾酪海胆沾面
沾面系其中一款受欢迎嘅日式面食，餐厅以日本时令海胆、乾酪同奶油汤制作汤底，咸味同鲜味互相平衡；而沾面似粗身嘅乌冬，非常挂汁，加埋日本溏心蛋、粟米、木耳等配菜，有多种口感之馀亦更香甜。如果想试多啲海胆入馔嘅菜肴，呢度重有好多选择㗎。
沾面汤底会再放上原件海胆提鲜
时令北海道海胆
想食到海胆原味？可以点时令北海道海胆，师傅大约喺1板海胆中取出2行分量，配埋紫菜畀大家包起嚟食，入口creamy又鲜甜。
海胆来自北海道
日本特盛岩蠔（$138）
如果你亦钟意食蠔，呢味日本特盛岩蠔就啱晒你喇。岩蠔系日本时令款式，例如赤崎，体形比较大，配埋海胆、三文鱼籽同鱼子酱颜色丰富，而且鲜味十足。如果落埋另上嘅柚子味酸汁，会更加提鲜𠻹。
岩蠔偏大只，入口嫩滑juicy
三色手捲
而三色手捲喺赤醋饭上放上海胆、三文鱼籽同吞拿鱼蓉3款人气食材，食一个唔会过饱，又可以止下口瘾。
所有寿司同手捲嘅饭底都系赤醋饭
日式木系装潢，简洁舒适
生日优惠：由2022年7月21日起，直至餐厅另行通知，当月寿星以电话订座星期一至四晚市时段，凡2人起并于落单前出示身份证核实，即送指定清酒一壶（欲了解详情可联络餐厅）。
鮨亭
地址: 屯门青善街22号康景花园地下3-4号舖
电话: 24300111