情人节晚餐想感受吓异国气氛，呢间黎巴嫩菜“Shahrazad Lebanese”好似阿拉丁宫殿咁，梳化位仲有咕𠱸揽吓。半户外座位就有个大窗，远眺红砖大馆夜景几浪漫。
“Shahrazad Lebanese”充满阿拉丁宫殿氛围。
“Shahrazad Lebanese”由外籍大厨主理，坚持只用外国食材。黎巴嫩菜作为地中海菜系之一，煮法健康会将调味料减至最少，主要用香料、水果调味，呢种原始鲜味真系靓食材先做到。
情人节套餐可以食到一系列地道黎巴嫩热/冷小吃Hot & Cold Mezze，好似红菜头鹰嘴豆蓉、红椒核桃蓉，软绵绵豆蓉配薄饼好好食。主菜则有黎巴嫩海鲜汤、炖牛肋骨选择。外国人份量好丰富，幸福感满满呀。
“Shahrazad Lebanese”情人节套餐份量丰富，幸福感满满。
坐梳化位揽住咕𠱸食更chill。
【Starter】
阿拉伯热/冷小吃拼盘(Arabic Assorted Hot & Cold Mezze)
黎巴嫩人好钟意食豆蓉、蔬菜蓉，天然味道健康开胃。今次前菜就有4款冷盘—红菜头鹰嘴豆蓉、红椒核桃蓉、塔布勒沙律、烟燻茄子蓉。
而黎巴嫩当地人钟意嘅热盘，多数都系酥脆炸物，但佢哋都会用天然鹰嘴豆、羊肉等入馔，绝对唔系fast food炸物，味道层次丰富好多㗎。今次套餐就有酥炸羊肉丸、中东乾酪馅饼、酥炸鹰嘴豆饼。
【Magic Soup】
黎巴嫩海鲜汤(Lebanese Coastal Seafood)
自家用多款海鲜煮制嘅海鲜汤，饮汤嗰阵真系食到啖啖海鲜，好有地中海风味。
【Main(2选1)】
海鲜料理(Seafood Halla)
呢道Seafood Halla其实系中东炖煮方法，以番茄酱、阿拉伯香料煮制大虾、青口等海鲜，汤汁都有种独特香料风味。
塔吉锅炖牛肋骨(Short Ribs Tajine)
另一款主菜选择，就有炖到好软腍嘅牛肋骨。大厨会用摩洛哥传统厨具“Tajine”，放入牛肋骨、干果、果仁、香料慢慢炖煮。呢种煮法会令牛肉变得软嫩多汁，多种配料风味融入晒牛肉中。
【Dessert】
甜品朱古力玫瑰水蛋糕(Chocolate Rose Water Cake)名为“The Hearth of Shahrazad”，粉红色蛋糕好有粉红泡泡vibe。呢款Water Cake系加咗玫瑰水嘅朱古力蛋糕，入口有种独特花香甜味，配杯气泡酒微醺好浪漫。
Shahrazad Lebanese Dining Lounge & Bar
地址: 中环云咸街75-77号嘉兆商业大厦2楼
电话: 23300242