踏入春夏，好想望住蓝天白云食个lunch chill吓。喺将军澳海傍嘅“The Hunter”有室外座位望到大海景，叫杯啤酒真系唔觉唔觉坐半日，想影相就要mark实埋户外千秋位喇。
夏天蓝天白云，坐室外食lunch好放松。
千秋位好啱影相。
呢度系外籍大厨主打地中海菜，系近年人气嘅健康菜系之一。因为会将调味料减至最少，主要用天然蔬菜、香料、豆类逼出海鲜、肉扒原始风味，天然健康。而且大厨对食材都好高要求，全部都系嚟自外国，小至一粒番茄都系欧洲直送㗎。
店内环境都好有度假风。
【午市套餐详情】
Starter 4选1
前菜可以拣是日餐汤，或者有3款沙律拣—Gluten Free、The Hunter Shrimp Salad、Nicoise Salad(+$28)。
Gluten Free
好少见有道菜直接了当叫Gluten Free，而佢真系名副其实Gluten Free，无任何麦类之馀仲集合咗好多superfood，以羽衣甘蓝、藜麦、石榴籽、松子、橄榄油、柠檬汁调制出清爽健康沙律。
The Hunter Shrimp Salad
另外一款沙律就有青木瓜、杂锦生菜、大虾配酱油，青木瓜酸酸甜甜，清新味道有种泰国风味。
Nicoise Salad (+$28)
好钟意呢度嘅烤吞拿鱼只系轻烤外层，入面仲系半熟软绵绵，配埋车厘茄、迷你生菜、四季豆等好开胃。
Main & Josper Grill 8选1
Casarecce Peperonata$168
午市套餐价钱系依主菜决定，入门价$168就有呢道Casarecce Peperonata。呢款捲义大利面系南意经典面款，独特捲型可以完美包住酱汁。大厨就以烤灯笼椒、车厘茄、白酒蒜蓉汁煮制，每啖都好有口感又唔腻。
Grilled Half Chicken$188
想下昼食得啖啖肉，拣呢道粟饲半只黄油鸡都好抵食，鸡皮烧得脆香，一切开即刻渗出鸡油肉汁，连埋薯蓉、蒜蓉汁食已经好满足。
Lamb T-Bone$218
地中海菜好擅长羊料理，如果你食羊嘅话都几值得一试。T骨羊扒系用烧烤炉Josper Grill烧，可以瞬间锁住肉汁之馀，羊羶味亦唔重，特别系近骨位肉味更香呀。
Bavette$258
唔想食羊嘅话，可以拣澳洲草饲Flank Steak腹胁扒，系近后腰脊嘅肉位，油花唔多、肉味特浓，好多牛扒fans都钟意食㗎。大厨特别用慢煮方法处理，令肉质更加软嫩。
Sea Bream$208
鲷鱼一向好嫩又无腥味，好啱下昼想食得轻盈啲。煎鲷鱼下面系满满甜椒、茄子、番茄，用鱼肉蘸埋甜甜酸酸嘅酱汁食好开胃。
The Hunter Burger$268
汉堡系用黑安格斯肉打成，所以比一般汉堡更加重肉味，而且一咬开好有肉汁，连埋半溶双重乾酪—车打乾酪、埃文达乾酪无得输～配菜就有生菜、番茄，仲有自家制汉堡酱㗎。
Rump$288
想牛扒啖啖肉，可以拣M5和牛后腿肉牛排。因为后腿肉系经常运动嘅位，所以肉质较紮实、油脂唔多，系食佢嘅浓郁肉味同嚼劲。
21-Day Dry-age Ribeye(300g)$368
“The Hunter”除咗有烤炉，亦自设牛排熟成冷冻柜，店内可见到摆放一系列由Brandt T骨扒到1855 USDA Prime肉眼扒都有。平时大厨会直接喺冷冻柜拎出食客点嘅牛排，再放上Josper Grill烤炉即烧即出。估唔到午市都食到21日干式熟成嘅USDA Prime Ribeye，下昼食得咁正真系会开心全日㗎。
THE HUNTER
地址: 将军澳唐贤街29号蓝塘傲地下11号舖
电话: 23300204