将军澳海滨长廊成为该区後花园之一，望住蓝天白云丶辽阔海景散步好疗愈，最正系路旁有多间餐厅闲悠～当中IG人气打卡日本料理「花乐」，每到下昼3点就好受欢迎，全因呢度嘅「日式下午茶」以双层金属鸟笼上枱，仲有3层前菜丶花茶只系HK$298 两位。
梦幻「日式下午茶」有3层塔小碟丶双层金属鸟笼同花茶，配埋整个日式环境好靓。
先食上层 多款日本小点
日本小点好丰富，最吸睛嘅一定系放满拖罗蓉嘅「日本花饼」。将花饼放於手心，再用木羹将拖罗蓉慢慢舀入花饼中，唔止享受味道，系好似日本人咁享受整个用餐过程。
花饼连埋拖罗蓉入口，外脆内软绵，每啖渗出拖罗鱼香，无论口感同味道都好丰富。
同层仲有「玉子配烟三文鱼」，轻甜撞上咸香几有惊喜；「炸米饼配牛油果蟹肉蟹子」嘅米饼比想像中更脆，系脆到有声嗰种，配埋Creamy 馅料绝香口开胃。我自己就好锺意好可爱嘅车厘子造型「寿司波波」，除咗影相靓外，压成圆形嘅寿司饭比平常扎实烟韧，几有新鲜感。
下层甜点 人气日东卷+水信玄饼
讲到呢排人气日本甜点，不得不提松软小巧嘅「日东卷」啦！呢度嘅日东卷口味会不时转换，今次就食到清爽轻甜西瓜味～松软蛋糕包住西瓜味忌廉，果味浓郁充满口中。日东卷小巧Size 食得优雅，女仔边食边影相都好靓。
同层仲有一直大人气嘅「水信玄饼」，剔透如水滴嘅水信玄饼，内里系一片片玫瑰，沾上黑蜜食味道清甜雅致。
3层塔小碟 汁煮田螺有惊喜
3层塔分别装载「Cocktail虾」以番茄肉丶洋葱丶黑椒丶橙汁等煮制，有独特果汁味；「 吉列蚝」炸得香脆，难得蚝身依然Juicy。最惊喜系「汁煮东风螺」，螺肉弹牙不在话下，拌汁甜而不腻，开胃又吊出螺肉鲜味，冷门跑出令人相当深刻。
大满足下午茶 超丰富三色丼
下午茶心思思想食个丼饭，一解日本料理瘾，呢个「三色丼」真系一绝。一次过可以食到日本鱼子丼丶吞拿鱼蓉丼丶鱼刺身丼，每小碗都铺满刺身食材，每一啖都有鱼子丶吞拿鱼蓉等充满口中，食得满足。
鱼刺身丼每日会依据新鲜鱼材转变，今次就食到油份较重嘅白身鱼—黑睦，大厨透露呢排当造嘅鱲鱼丶真鲷都有机会食到。
呢间料理店系由一班80後夥拍日本人开设，另外晚市会有多款高质日本料理，Menu 会不定期更新Keep 住有新鲜感。
直接拎起爽食 海苔粉炸松叶蟹脚
将蟹肉位置起壳，爽快地拎起蟹脚直接食最正。蟹肉本身洒上海苔粉提味，食客可自行沾上竹炭盐同淋上柠檬汁，味道丰富得嚟更解腻。
咁点解系竹炭盐呢？大厨解说日本人对食嘅讲究，细至盐粒都有好多种，例如绿茶盐丶柚子盐丶青椒盐等。今次大厨选用竹炭盐，则取其竹炭轻馀韵解腻并突出蟹肉鲜味。
多肉软壳蟹 牛油果软壳蟹卷
同朋友食日本料理，起码都会Order 一碟卷物开心Share。呢度好讲究摆盘美感，呢道卷物一上枱已忍唔住影张相先，口味拣咗大家一定锺意嘅牛油果软壳蟹，软壳蟹超大只，特别系尾部嗰件凸出大大只蟹脚。
牛油果肉铺上黑鱼子，粒粒咬开轻脆，同软绵绵牛油果夹埋一齐几特别。
一试食材本身鲜味 炸海胆鹅肝
大厨将2种矜贵食材—海胆丶鹅肝放埋一齐，而且无额外加调味料就炸香，食嘅系食材本身独有鲜味丶浓郁同Creamy 口感。因为炸浆够薄，入口唔会觉得太厚重同腻，反而沾上少许竹炭盐提升味道层次，自问系重口味人士一定要试。
花楽
地址: 将军澳唐俊街21号翩滙坊地下G23号铺
电话: 23892628
