平时成日都食到海胆，但原来唔同品种嘅海胆都有时令月份。特别系矜贵嘅紫海胆，每年得4月至5月系当造期。佢哋比一般海胆更清甜滑嫩，配埋其他食材又会撞出唔同效果㗎。
将军澳「赤本山」限定推出海胆の盛宴，有主角紫海胆之外～仲可以食到多款唔同海胆、拖罗、毛蟹等，共有前菜、刺身4品、御料理、寿司10贯、热汤同甜品。不过想食就记住book位，因为紫海胆隔夜唔好食，所以日日由日本直送嘅货量唔多，每日限量4位咋！但就确保一定食到新鲜靓嘢。
【必抢】海胆の盛宴
只嚐即日运到紫海胆！每日限量招待4位
前菜 季节前菜
刺身4品 鲷鱼他他拌海胆鱼子酱 北海道原只紫海胆 毛蟹马粪海胆 海胆吞拿鱼腩
御料理 甘鲷立鳞烧 海胆南瓜酱
寿司10贯
热汤
甜品 |
海胆Fans捉紧时间！平时限定4位·母亲节不设人数制限
海胆の盛宴平时星期一至日都系限定4位，如果你惊抢唔到位，母亲节嚟食饭就无问题喇，因为当日系无人数限制㗎，带埋亲朋戚友一齐食都得呀～
「赤本山」气氛细腻恬静，坐寿司吧可以欣赏师傅手艺；想同家人朋友享受私人空间，提供2间日式房、1间VIP房拣。
【前菜】季节前菜
前菜会集合春夏时令食材，亦有机会食到其他海胆。我哋今次就有赤海胆+紫菜，即开即食嘅赤海胆好饱满！前菜就食到海水咸香味好醒神。
而广岛蠔则配上香麻不呛辣嘅马山椒，为广岛蠔提鲜之馀，食落亦更惹味有层次。春夏时令食材仲有萤光鱿鱼，一咬落去有种卜开嘅口感，愈咬愈弹牙咸香。
【刺身4品】
刺身集合咗多款贵价鱼材—鲷鱼、毛蟹、海胆等等，每道刺身都能独当一面。
鲷鱼他他拌海胆鱼子酱
鲷鱼有种温和嘅鲜甜味，肉质细致略带鱼油。师傅就将鲷鱼做成他他，令淡雅鱼香渗入赤海胆，一柔一强鲜味喺口中爆发。
北海道原只紫海胆
嚟到主角登场嘅时间！师傅即席开原只紫海胆，刮出满满海胆肉～甜味会慢慢喺口入面漫延，加埋细嫩口感几上瘾。
毛蟹马粪海胆
身为海胆fans，当然知道人气马粪海胆系几浓海水味㗎啦。所以师傅就将两种浓味代表—海胆、鱼子酱，配上细致轻甜嘅毛蟹肉，以蟹鲜平衡浓味。
毛蟹仲系师傅原只拆肉㗎，相比一般包装蟹肉更加甜，柔嫩口感都实在好多。
海胆吞拿鱼腩
今次海胆+吞拿鱼腩真系好澎湃！好似超豪华版嘅花之恋咁，上面有满到就嚟泻嘅海胆，下面全部…系全部都系吞拿鱼腩!! 一咬落去已经好软绵绵，两种creamy口感撞埋一齐好正。
御料理
立鳞烧真系IGable又好食嘅料理～而且唔系全部鱼都可以做到㗎。师傅特别拣选鱼鳞薄脆、肉质软嫩嘅甘鲷嚟做。用热油淋上甘鲷令鱼鳞竖立脆卜卜，配埋海胆南瓜酱一齐食又系另一种风味。
寿司10贯
师傅会依当日鱼材决定寿司款式，钟意不时不食嘅话就啱喇。今次师傅整咗正值当造期嘅石垣鲷寿司，系少有油脂丰富嘅白身鱼，肉质紮实爽口，加埋creamy海胆更有口感，每年得2至3个月当造咋。
同场鸟贝寿司亦有惊喜～平时食嘅贝类如粒贝、象拔蚌都系好爽口；鸟贝反而略为腍身，但贝味就特浓。
(左上二)石垣鲷寿司、(右下二)鸟贝寿司
【甜品】
饮完热汤后就会奉上甜品，系抹茶奶冻配雪印草莓。轻甜唔腻，用作结尾好满足。
【同场加映】
食一个set唔够喉嘅话，呢度都有单点畀大家追加㗎。私心推介呢道鲭鱼料理，估唔到厚切鲭鱼+鲭鱼粒+寿司饭系咁有口感，鱼肉又嫩又弹牙。一定要成件啪入口呀，你会feel到成口都系鱼香!!
小长井华涟蠔
蠔迷可以试埋呢款日本长崎嚟嘅生蠔，蠔肉厚身爽口，淡淡海水味唔会太浓，配埋飞鱼子啱啱好。
赤本山
地址: 将军澳至善街3号澳南海岸SAVANNAH Place地下G07A号舖