尖沙咀一向有好多隐世餐厅，真系熟客先揾到好嘢食。好似呢间喺赫德道嘅楼上店「花晨月夕KUNO」，系香港少有工业风厨师发办，有种《深夜食堂》感觉，气氛轻松唔拘束。
每年得几个月系海胆季节，师傅都捉紧时间由5月3日起，喺日本引入多款海胆—北海道原只紫海胆、赤海胆、马粪海胆，加埋拖罗、白身鱼等多款日本食材，打造共17道料理嘅限定「海胆盛宴」。
趁海胆时令季节，特由日本引入多款海胆。
【海胆盛宴$1,880】共17道料理
先付 季节前菜
刺身4品 原只北海道紫海胆 薄切白身鱼配海胆鱼子酱 最中饼配海胆拖罗蓉 三色海胆
天妇罗 海胆带子紫菜捲 北海道鱿鱼丝配海胆酱
寿し9贯
吸い物 生紫菜海胆蚬肉清汤
甜品 |
「海胆盛宴」足足有17道料理。
【先付】
师傅用咗多款春夏食材设计精致前菜，当然仲有今次主题嘅海胆啦。盐水海胆玉子豆腐将两种软绵绵食材加埋一齐，口感控一定钟意。
仲有静冈县水果番茄，比普通番茄甜1.5倍㗎～仲有煮螺、日本蟹仔等，丰富摆盘影相好靓。
4款精致前菜。
【刺身4品】
全部刺身都有海胆，估唔到海胆都有咁多种食法～
原只北海道紫海胆
紫海胆每年得2、3个月有得食，身价矜贵之馀，味道都特别清甜，回甘度强，每啖都好有层次。
原只紫海胆，身价矜贵。
薄切白身鱼配海胆鱼子酱
夏天系白身鱼季节，鱼味淡雅，配香浓嘅海胆鱼子酱啱啱好。
淡雅白身鱼，配上海胆鱼子酱恰到好处。
最中饼配海胆拖罗蓉
薄脆嘅日本最中饼内，放有超厚切拖罗～上层有满满金箔海胆；下层则有金箔拖罗寿司饭。可以好霸气咁一啖咬落去，多重口感又脆又软。但身为拖罗控真系忍唔住先咬一啖拖罗先，油脂劲肥美～
超厚切拖罗好抢眼！
三色海胆
师傅每日都会精选当日靓嘅3款海胆，分别配上蟹肉、白身鱼、紫苏叶等唔同食法。
3款海胆都好大份量，对比吓唔同海胆有咩分别先。
【天妇罗】
天妇罗就有海胆带子紫菜捲、北海道鱿鱼丝配海胆酱。唔知点解香港比较少见紫菜捲天妇罗，其实嗰种独特香脆爆馅口感好正，今次终于喺度食到喇，加埋海胆酱更加浓郁惹味。
紫菜捲天妇罗入口爆馅，加埋海胆酱好惹味。
【寿し9贯】
师傅会依当日鱼材或你嘅喜好手握寿司，今次我哋有拖罗、吞拿鱼、贝类等。夏天时令嘅白身鱼都以海胆点缀，以今次主角突出鲜味。
9件寿司大满足。
【吸い物】
生紫菜海胆蚬肉清汤
如果你去间日本食店饮到碗清彻鲜甜嘅汤，代表师傅手艺有返咁上下。今次嘅热汤都系清彻见底，入口系惊喜地鲜味，海胆、蚬肉配料亦好有存在感。
鲜甜清汤配啖啖海胆。
【甜品】
甜品亦唔敷衍，睇吓日本哈蜜瓜几大件！适逢当造期清甜多汁，配脆脆甜品做出层次。
日本哈蜜瓜好大件。
花晨月夕
地址: 尖沙咀赫德道2号金麟商业中心2楼
电话: 29555288