近年牛扒界打卡之选，一定系超大份嘅斧头扒！估唔到阿根廷高级扒房都食到喇。阿根廷每日直送斧头扒确实坊间少见，高质斧头扒系肉味浓郁兼爆汁，唔系度度揾到㗎。
“La Parrilla Steakhouse”木系红砖装潢好有欧洲感觉。
窗边位远眺大馆，约会或聚餐都好有气氛。
“La Parrilla Steakhouse”主打阿根廷牛，当地牛只出名肉味浓。喺度可以食到唔同肉位靓扒之馀，仲有其他阿根廷料理㗎，好似阿根廷牛扒他他、自家制醃鸭胸肉、烧八爪鱼等等。加上欧洲木系红砖装潢，情侣约会或一班人聚餐饮酒都好有气氛。
阿根廷料理都系大大份，一边饮酒、一边share。
【阿根廷料理Special Menu】
Tomahawk斧头扒
今次限定Special Menu最吸引一定系斧头扒！每日阿根廷直送，当日货量卖晒就无，可想而知有几新鲜，想食记住早啲嚟呀。
阿根廷斧头扒有咬感、肉味浓，仲可以食埋骨边肉。
阿根廷斧头扒少啲肥膏，偏瘦特色令佢肉味香浓、极富咬口。好钟意呢种越咬越多肉汁，肉味慢慢爆发出嚟嘅感觉。唔知你有无留意，坊间斧头扒多数会肉骨分离，而呢款阿根廷牛系食到特别浓味嘅骨边肉㗎。
Steak Tartare 牛扒他他
如果好追求肉味，呢款牛扒他他更食到最原始嘅阿根廷牛味。一般嘅他他都好重番茄、洋葱配料味道，而呢度嘅他他有好足料嘅生牛肉，每啖都食到软绵绵牛肉口感。
牛扒他他充满原始肉味。
食嗰阵可以将牛肉他他铺满蒜蓉包，铺得越满越好食呀！配埋希灵鱼鱼子酱嘅烟燻咸香，更有层次又唔会遮盖肉味。值得一讚嘅系蒜蓉包，烘到脆卜卜又重牛油味，每个细节都做得好好。
Duck Prosciutto醃鸭胸肉
相当花心思嘅一款菜，因为系自家将鸭肉醃制后再风干14日，完全唔系一般来货呀。一开始直接食啖已经满口鸭油香，再慢慢细咬会渗出肉味。之后再配埋香草包、醃青瓜中和油感，又系另一种风味。
自家醃制风干嘅鸭肉火腿，享受满口鸭油滋味。
Entraña Sandwich 牛排三文治
阿根廷当地周围都见到三文治，猪排三文治、血肠三文治都系地道美食，而“La Parrilla Steakhouse”就有啖啖肉嘅牛排三文治！恰如阿根廷烤肉店用上法国长面包，酥脆内软更有风味。牛排则系超厚切侧腹横肌(Skirt Steak)，肉位取自牛横隔膜外部好有咬感㗎。
三文治有超厚切侧腹横肌牛排。
Octopus Grill 烧八爪鱼
食咗咁多肉，自然想有啲海鲜中和吓。烧八爪鱼一上枱已经好吸睛，劲大只八爪鱼好Q弹。因为特别慢煮6小时以上，即叫即烧特别香。而且呢度嘅菜式都系偏大份量，好似呢道八爪鱼咁当作主菜，抑或一班人share都好够。
八爪鱼先慢煮6小时以上，最后即叫即烧好香口。
Langostino Pasta 阿根廷红虾义大利面
阿根廷红虾嘅人气，真系拍得住阿根廷牛肉，两者都系肉味浓郁。所以大厨就将红虾直接剁碎铺上意粉，保留红虾原始鲜味。酱汁则用虾头熬制，完全系鲜味精华，食落浓而不腻仲好creamy。最后简单加入青柠皮、红洋葱点缀已经好好食。
用虾头熬煮意粉酱汁，香浓鲜甜。
Black Beans Hommus 黑豆及鹰嘴豆蓉
鹰嘴豆蓉系经典中东菜，绵滑富豆香。当地人会用粟米片刮满豆蓉，又脆又绵系好好食嘅健康配菜。“La Parrilla Steakhouse”外国主厨就进一步加入美国菜元素，以黑豆蓉+鹰嘴豆蓉口感同样幼滑，微甜豆香更有层次。
经典鹰嘴豆蓉加入美国菜元素，更多一重黑豆香。
Asparagus 芦笋
外国人聚餐多数有肉、有海鲜同蔬菜，呢度嘅芦笋就铺上自家制面包糠再焗。芦笋够新鲜有草香，同时多咗种香口脆感。
新鲜芦笋铺上自家制面包糠。
Cheesecake 乾酪蛋糕
甜品方面就有早前人气爆发嘅Burnt Cheesecake，外层独特焦香；内里则绵密幼滑。配上芒果、热情果酱，轻甜微酸满足甜品幸福感，又可以解解腻。
人气爆发Burnt Cheesecake，外焦内滑。
La Parrilla Steakhouse
地址: 中环云咸街77号嘉兆商业大厦1楼
电话: 26378555