【铜锣湾高CP值西班牙菜】推介脆卜卜烤乳猪．自家西班牙油条

喺铜锣湾想揾间旺中带静又高质嘅餐厅好好享受下美食，最近就多咗「SABROSA」呢个好选择。餐厅主打正宗西班牙菜，大量选用嚟自西班牙或义大利供应商嘅上乘食材，糅合传统西班牙烹调技术同创意，配搭各款色彩缤纷嘅Cocktail，适合情侣或者同亲朋好友一齐大快朵颐。

餐厅装修时尚，加上可以观赏铜锣湾闹市街景嘅大玻璃窗，非常舒适

口感丰富Tapas　香烧带子配珍珠面

讲到西班牙菜唔少人都会谂起Tapas，当中比较特别嘅有呢款「香烧北海道带子配珍珠面」，珍珠面系义大利萨丁尼亚岛嘅经典面食，以杜兰小麦粉制成，用柠檬、百里香等煮过，味道清新又有一粒粒嘅口感。北海道带子肉质鲜嫩，碟边更有日式牛蒡渍物，解腻开胃。

香烧北海道带子配珍珠面

超甘香！48个月伊比利亚黑毛猪

特别挑选100%纯橡果餵饲嘅伊比利亚黑毛猪，更系较少见嘅风干48个月，油花适中而且其独特甘香浓郁，比起坊间常见嘅风干32个月或者24个月嚟得更油润唔死咸。而鲜茄蓉西班牙脆包就用咗特别多汁鲜甜嘅新鲜牛茄配搭西班牙水晶包(Crystal Bread)，酸酸甜甜加上番茄清香，可以平衡返黑毛猪火腿油腻感。

西班牙橡果风干48个月黑毛猪火腿片及鲜茄蓉西班牙脆包

即席烟燻　黑松露生牛肉片

打开玻璃盖即有白烟飘出，皆因呢份生牛肉片会由厨师自家以苹果木烟燻，保留更多香气。生牛肉片则选用西班牙安格斯牛柳，肉质柔嫩而且咬落唔会有筋。加上当季黑松露片同香草柠檬沙律油，前者增添独特芳香并提升味道层次，后者清新令味道平衡。

自家制烟燻生牛肉片，混合香草配黑松露柠檬沙律油

皮脆肉嫩　传统西班牙烤乳猪

私心推介大家必试嘅心机菜，呢道「传统西班牙烤乳猪」要先将乳猪慢煮18小时令肉质放松，拆骨后再烤，做足咁多步骤就可以令乳猪瘦肉松化、肥膏甘香、猪皮更加系又薄又脆到好似食紧薯片咁！想减低油腻感可以配白兰地嘅慢煮苹果蓉，想浓味啲就配利酒烤猪汁。

传统西班牙烤乳猪

啖啖鲜味！西班牙红虾海胆饭

西班牙菜当中又点少得Paella，「西班牙红虾海胆饭」嘅主角绝对系用藏红花、海胆汁同龙虾海鲜汁煮成嘅饭底！每啖饭都吸满鲜味精华，上面再加橙色嘅自家制海胆汁同黄色嘅藏红花蛋黄酱，分开食又得，捞埋一齐食就味道更丰富、口感亦会更Creamy。新鲜西班牙红虾煎至约7成熟，肉质爽甜鲜美，仲有香浓甘香嘅虾膏！

西班牙红虾海胆饭

经典义大利风味　卡邦尼意粉

义大利卡邦尼意粉最正宗嘅做法，原来同大家经常接触嘅版本好唔同！首先系要用义大利烟燻猪颈肉，煎脆后有浓郁嘅油脂甘香。然后以煎完烟燻猪颈肉得出嘅猪油，加酒、同日本鸡蛋煮意粉，令每条意粉都沾上油香同蛋黄香，最后洒上Parmesan Cheese，将浓郁风味再提升至另一层次。意粉亦选用义大利顶级品牌Pasta Mancini，面质特别弹牙。