香港人咁钟意去旅行，无非想急促生活中放松吓，但未飞嘅你都要唞吓气㗎。居港黎巴嫩人就开咗间“Shahrazad Lebanese”，全新菜单删走fusion元素，黎巴嫩料理更传统地道。逢星期四8:50pm、星期六10:00pm更有肚皮舞表演，全场响起阿拉伯音乐，舞孃随时走到你身边跳舞，以味觉、视觉、听觉逃离现实，嚟一场异国旅行。
梳化位富异国气氛，有咕𠱸揽坐得舒服。
露台位更加开扬，好啱饮酒倾计。
地道黎巴嫩菜 讲究天然食材
其实黎巴嫩菜好健康，主要用新鲜食材、天然香料煮制，将调味料减至最少。所以“Shahrazad Lebanese”外籍主厨一直好坚持用外国食材，由主食材或小至番茄、番石榴、乾酪等配菜都系外国直送，零味精煮出层次味道。
外籍主厨坚持用外国食材，零味精煮出层次味道。
饭局搞手福音！精致素食&炭烧烤肉
黎巴嫩人平时以豆类、蔬菜为主，所以有好多素食料理，鹰嘴豆就系最常见食材之一。当地人会将鹰嘴豆打成顺滑豆蓉；又会炸成外脆内软嘅馅饼，单单天然豆香已相当好食。所以呢度好啱素食者一嚐精致料理㗎。
当然，烧羊架、烤肉串、烧鸡都系黎巴嫩嘅出名料理。“Shahrazad Lebanese”仲系少有香港餐厅设炭炉烤肉，做到高温锁肉汁又有炭香效果。一班朋友有齐食肉兽同素食者嘅话，终于有个地方畀大家饮酒尽兴喇。
少见香港餐厅自设炭炉，炭香烤肉特别好食。
【唯美素食料理】黎巴嫩菜地道料理
就算平时唔系素食者，嚟到呢度都忍唔住试几款。摆盘好靓之馀，最重要系零味精，只用天然食材就做到丰富味道，难怪黎巴嫩人每日都咁钟意食。
黎巴嫩鹰嘴豆泥 Lebanese Hummus
鹰嘴豆蓉本身已经好绵滑淡香，当地人会用烤饼沾嚟食。呢度依传统简单配芝麻酱、柠檬、橄榄油，并以炸蒜片、原粒鹰嘴豆丰富口感。
鹰嘴豆及红菜头蓉 Hummus Beetroot
黎巴嫩人饭前会食各种cold/hot mezze，其实就系冷/热前菜。当中豆蓉料理系常见又千变万化，除咗头先最基本嘅鹰嘴豆蓉，呢款cold mezze就将鹰嘴豆加埋红菜头，令豆香略带清爽轻甜，又系另一种感觉。
炸鹰嘴豆馅饼 Falafel
Falafel 系经典中东菜，平时多数会搓成榄球形，今次大厨做成可爱嘅冬甩形好IGable。外层炸到硬脆，「卜」一声咬开就系绵绵鹰嘴豆蓉，配上用奶酪、芝麻酱等制作嘅tarator酱，更加湿润浓郁。
奶酪乾酪 Lebneh
呢种奶酪乾酪常出现于黎巴嫩菜，多数系自家制脱乳清奶酪，系近年网路人气好高嘅健康食物之一。“Shahrazad Lebanese”同样自家制作，可以用烤饼沾满新鲜软质乾酪，伴番茄、酸瓜一齐食。
烤哈罗米乾酪 Grilled Halloumi
坦白讲，一直无谂过西瓜同乾酪系可以咁夹。希腊、中东一带都有出产嘅哈罗米乾酪好咸香软糯，乾酪味亦唔会太羶，试过都会好挂住呢款乾酪呀。当咸咸香香撞上清甜爆汁西瓜、石榴糖浆等，一咸一甜互相平衡，颠复咗对乾酪嘅刻板印象。
黎巴嫩素食煲仔饭 Hallat Khodar
黎巴嫩菜好讲究香料调味，所以酱汁都好浓郁佐饭。当地煲仔饭同香港煲仔饭有啲唔同，餸菜酱汁较多，所以会同米饭分开呈上。佢哋嘅米饭较幼长干身，捞汁食啱啱好。
扁豆汤 Shorbat Adas
秋冬自然想饮啲汤，经典中东菜就有呢款扁豆汤，主要以红扁豆、蔬菜煮制，味道清爽并富营养。
【大份量Share】炭炉烤肉·外国海鲜
香港少有自设炭炉嘅餐厅，嚟到一定要试佢哋嘅烤肉同烧海鲜呀。黎巴嫩烤肉一直好出名，全部都大份啖啖肉。好似烤全鸡、慢烤羊肩架都好大件㗎！由醃制、烧烤、配菜都系黎巴嫩菜传统煮法，够晒地道。
烤西班牙走地春鸡 Farrouj Meshwi
外籍大厨特别介绍，呢道烤鸡系黎巴嫩好地道料理，连沙律都系传统风味嚟㗎。特别选用西班牙走地春鸡，肉质嫩滑细腻，鸡皮薄而惹味。
索性一手拎起鸡髀沾dakka酱食好爽快，一咬开即刻渗出鸡油，再食啖沙律解解腻。
慢烤羊肩架 Shahrazad Lamb Ouzi
“Shahrazad Lebanese”开业以嚟，佢哋嘅烤羊肉都好受欢迎。今次新菜单尝试另一煮法，先以中东游牧民族—贝都因人(Bedouin)常见香料醃制羊肩架再慢烤，配搭已调味嘅阿拉伯饭(Ouzi)别有一番风味。
黎巴嫩羊肉丸配希腊奶酪 Kebbeh Bil Labban
文中都提到，黎巴嫩人常自家制希腊奶酪，独特绵滑奶香配肉、豆类或蔬菜都好夹，今次就将希腊奶酪酱满满淋上羊肉丸喇。
羊肉丸口感紮实绵密，有恰到好处嘅羊肉羶香。不时会食到清甜红石榴肉中和肉味，平衡感做得好好。
芝麻酱煎鳕鱼 Samak Bil Tahini
如果你都钟意黎巴嫩菜嘅绵密酱汁，呢道芝麻酱煎鳕鱼一定要试！鳕鱼煎到啱啱好，鱼肉嫩又keep到鱼油。当然中东芝麻酱亦系重点，黎巴嫩人喜以芝麻制成黏稠嘅麻酱并称为bil tahini，质感绵密却不腻，配嫩滑鱼肉一流。
Shrimp Matffie
另外2款虾料理各有特色。Shrimp Matffie好重油香，煎大虾配以橄榄油、柠檬、新鲜芫荽，香味会慢慢喺口中散发，饮酒必食。
Tiger Prawns
钟意虾味浓啲可以拣虎虾。连虾头炭烤，再简单配柠檬蒜莳萝牛油酱已经够晒惹味鲜甜。
Shahrazad Lebanese Dining Lounge & Bar
地址: 中环云咸街75-77号嘉兆商业大厦2楼
电话: 23300242