【沙田酒店全新欧陆餐厅及酒吧】供应活海鲜+特选高质牛扒
沙田一间酒店开咗全新欧陆餐厅及酒吧「2+2 café & bar」,特别选用多款活海鲜,如龙虾、南非鲍鱼、本地海鲈鱼等炮制高质环球菜式。另外亦照顾一众牛魔王,挑选多款上等和牛,如鹿儿岛A5夏多布里昂和牛柳、澳洲M6和牛斧头扒等。餐厅装修雅致,又设有户外座位,无论嚟用餐或饮杯cocktail轻松下都唔错。

精选海鲜菜式 融入鲜活食材
想一次过试到世界各地海鲜嘅鲜味,海鲜拼盘必定畀到你大满足嘅感觉~贝壳形巨盘盛载啖啖肉嘅波士顿龙虾、时令生蠔、南非鲍鱼、带子同虎虾,其中生蠔每日供应3款,如澳洲、法国、南非等产地,由大只饱满到海水味浓都有。更配有辣根鸡尾酒汁、南美香辣醋青酱等6款特色酱汁,让你享受多重滋味。
海鲜拼盘配上烟雾效果,打卡一流

开胃前菜则推介松叶蟹肉甘虾海胆牛油果沙律,蟹肉加入红洋葱碎、西芹粒、蛋白酱等提升鲜味;底层嘅牛油果则加入柠檬汁同橄榄油,入口更清新。沙律配埋时令甜虾、海胆同鲜嫩罗马生菜,方便食客按喜好自制海鲜生菜包。
DIY西日fusion沙律

叹主食之前,不妨饮返碗即叫即制嘅龙虾干邑浓汤暖下胃。师傅将半只新鲜波士顿龙虾用秘制鱼汤慢煮15分钟提鲜;而浓汤加入多款炒香嘅蔬菜外,重有焗煮过嘅龙虾头、赤米小虾一齐熬煮,质感浓稠又鲜甜,上碟前再淋上烧热嘅干邑増加香气。
浓汤散发酒香更滋味

主菜方面都想叹海鲜嘅话,火焰海盐焗原条海鲈鱼都系唔错嘅选择。海鲈鱼选用约1公斤重嘅本地活鱼,参考地中海菜做法,鱼肚放入薑葱、香草、柠檬片等,用拌入香草同蛋白嘅幼海盐复盖鱼身再烤焗。上菜时记得准备相机,因为会喺食客面前淋上燃烧中嘅冧酒,营造火焰效果!
火焰海盐焗原条海鲈鱼

精选多款上等和牛
餐厅亦照顾一众牛魔王,选用A4、A5鹿儿岛和牛唔同部位,炮制啖啖肉嘅汉堡同牛扒。好似招牌香煎鹅肝烤和牛汉堡就选用西冷,汉堡扒嘅肉同脂肪按3:1比例制作,明火烤焗后带点焦香味,入口充满肉汁;配埋香煎法国鹅肝,以及酸青瓜、生菜同自家制他他酱平衡油腻感。和牛方面则提供鹿儿岛A5夏多布里昂和牛柳鹿儿岛A4厚烧和牛肉眼扒等。当中夏多布里昂为牛柳最矜贵、每一条牛柳只能制作两份餐点!

另外除咗日本和牛,亦选用了顶级澳洲和牛。澳洲M6和牛斧头扒肉质鲜嫩有咬口,配埋香浓嘅牛肉汁更加滋味,啱晒牛魔王聚餐时开心share。

招牌香煎鹅肝烤和牛汉堡

其他特色食品、Cocktail
招牌原只蒜香烤有机玉米鸡特别选用本地饲养81日嘅有机玉米鸡,外皮颜色金黄得嚟油分适中,肉质鲜甜嫩滑。鸡只以秘制香料、大量蒜蓉醃24小时后洗净、风干,收到客人落单再即时烤制45分钟,保证新鲜热辣辣。
招牌烤原只蒜香有机玉米鸡

饭后甜品必试创新嘅义大利咖啡干酪朱古力!呢款Tiramisu变奏版,底部为传统Tiramisu,用手指饼、咖啡酒、浓缩咖啡同义大利软干酪制成;而顶部嘅朱古力波波造形Tiramisu,则将所有材料拌匀,冷冻后沾上朱古力粉,味道甘甜,口感几creamy𠻹。
义大利咖啡干酪朱古力

餐厅亦推出多款Cocktail,其中以店名命名嘅2+2 Signature类似轻盈版嘅Negroni Sbagliato,混合蓝宝石琴酒、金巴利利口酒、圣日尔曼接骨木花利口酒、迷迭香等,酒精浓度较高,同时带点草本香气,男女都啱饮。而Darjeeling cooler则以大吉岭利口酒、茶为基调,再加入带莓味嘅尚柏酒、干薑味汽水等,适合钟意清爽口味嘅朋友。另外可以作为餐前酒嘅Gulfstream,混合伏特加、新鲜菠萝汁、蓝色橙酒等,入口微甘开胃。
左至右分别为2+2 Signature、Darjeeling cooler、Gulfstream




2+2 café & bar
地址:沙田白鹤汀街8号帝都酒店1楼
电话:26943886
* 资料由客户提供