呢两年无得去旅行，都开始惯咗周围搵啲打卡餐厅食饭，但多数都係日本嘢、法国菜…无谂过黎巴嫩菜都係一种选择，晚饭后甚至有种想去呢个地方睇吓嘅冲动，但唔知仲要等几耐…
由黎巴嫩当地人开嘅Shahrazad Lebanese，煮嘅係正宗黎巴嫩菜。虽然香港人对黎巴嫩菜唔算熟悉，但其实当地最古老文明远自几千年，饮食文化被地中海健康文化影响，所有材料同调味都係用新鲜食材，主要以穀物、蔬果、香草、橄榄油入馔，係健康清爽嘅菜系。
黎巴嫩菜主要以新鲜食材入馔，品嚐食材最原始味道。
甫入店内已好有异国气氛，眼前大窗恰好对住红砖大馆，窗前放有梦幻蓝色梳化、中东色彩吊灯；左边则有特色牆同露天座位，成间餐厅都好开扬舒服，令人心情Chill 住迎接今晚晚餐。
一入门口，即见大窗映透大馆红砖牆。
店内充满异国气氛。
地道食法 先食前菜Mezze
地道黎巴嫩菜会先食Mezze，即餐前小菜。冷盘多数以酱类、沙律为主，味道轻酸微甜，开胃为主；热盘则有香口小食，同朋友边倾边食炒热气氛。
冷盘Mezze 天然食材颜色缤纷
呢度冷、热Mezze 选择都好多，今次冷盘就试咗Hummus Shamender、Jebna Hara、Baba Ganoush、Mix Cold Mezze，都係用薄饼蘸嚟食。
粉红色Hummus Shamender 咁抢眼唔使担心，因为佢哋唔係用色素，而係用蔬菜─红菜头、鹰嘴豆嘅天然颜色，味道清甜。作为香港人已习惯少菜多肉，都忘记咗原来天然食材係咁靓。
Hummus Shamender
另外Jebna Hara 用辣芝士；Baba Ganoush 则以茄子、柠檬汁製成蓉，食落香浓，用嚟餐前饮吓酒几正。
(左) Jebna Hara、(右)Baba Ganoush。
Mix Cold Mezze 正如其名集合几款Mezze—Hummus、Mutable、Muhammara、Truffle Labneh，一次过食到鹰嘴豆蓉、烟燻茄子乳酪蓉、炭烤红椒核桃蓉、新鲜薄荷乳酪黑松露蓉。
Mix Cold Mezze 可以一次过试到几款Mezze。
前菜冷盘有沙律
前菜都有几款沙律畀你拣，Tabouleh、Dunyazed Fattoush 均以蔬菜为主，都係比较清爽微酸。Tabouleh 以新鲜芫荽、番茄、布格麦为主，食材切得较碎好啱夹薄饼；Dunyazed Fattoush 就有青瓜、番茄、萝蔓等，蔬菜咬感就强啲。
Tabouleh
Dunyazed Fattoush
热盘Mezze 香口浓郁
热盘以地道小食为主，而且唔係平时食开嘅炸鸡翼薯条行货之流，好有新鲜感。个人最爱Falafel，虽然呢道炸鹰嘴豆球好多人都食过，但呢度做得好有层次
口感，外层炸得硬脆，「卜」一声咬开就係内馅鹰嘴豆蓉。
Falafel
呢道Kibbeh 望落有啲似Falafel，但相对全素嘅Falafel 恰好相反，Kibbeh 係用料十足嘅肉丸，以碎牛肉、免治牛肉混合松子、小麦蓉而成。外层比较薄脆，食落有肉香松软，相比扎实口感Falafel 又係另一种滋味。
Kibbeh
Roasted Eggplant 则于香烤茄子放上新鲜番茄、Feta Cheese，茄子多汁香浓，完全展现到黎巴嫩菜点样将天然食材都煮得咁浓郁。
Roasted Eggplant
如果你同我一样锺意鸡肝嗰种软糯口感，就一定要试呢道Swdat Djag，以鸡肝、芫荽炒成，配饭或薄饼都好正！大厨巧妙地以柠檬、石榴酱中和鸡肝腻感，所以食落浓味得嚟又几开胃。
Swdat Djag
超嫩！慢煮Prime 级牛肉
估唔到牛控食黎巴嫩菜都有必食菜式，私心大推Lahma Bil Fasolia！係慢煮USDA Prime
牛肉，最正係牛肉超厚切，可以话係大大件长方形咁呀！因为牛肉已经慢煮到好松软，就算超大啖咬落去都完全唔韧，仲渗出超香浓肉味！
个人最欣赏肉质煮得恰好，松软得嚟保留到牛肉咬口，唔会腍到入口散开晒，少量膏位仲入口融化，完全做到愈咬愈有牛味嘅效果。
Lahma Bil Fasolia
原始味道！大大件烧羊肩
点样先睇得出食材高质？最简单就係大厨够胆用最简单配料，就愈见得对食材有信心，因为原始味道已够做！呢道慢煮羊肩正正係写照，简单将羊肩烤香，外皮焦香，入口轻咸少羶已经好正。
Shahryar Ketf Kharoof
小朋友才做选择 震撼多肉拼盘
虽然牛肉、羊肉同样吸引，但小朋友才做选择，我全部都要！超大份拼盘Shahrazad Ultmate Mix Grill Meat (Large)，就集合咗羊架、鸡肉、牛肉，食落有炭烧味，盘中仲有木炭维持热度，打卡一流。
拼盘会跟Tomeya (忌廉蒜酱) 同 Tahini (中东芝麻酱)，蘸酱疯狂食肉劲爽，并可拣 饭 或 薯条。最估唔到个饭几有惊喜，係用牛油同橄榄油入焗炉煮成，加埋满满Nuts，饭粒软绵又有Nuts 脆口。
Shahrazad Ultmate Mix Grill Meat (Large)
拼盘有大份量羊架、鸡肉、牛肉，烧得有炭香。
海鲜都有得食！
除咗多款肉食 呢度亦有海鲜拣，呢款Grilled Prawns 将虎虾烧香，够多肉鲜甜。而且开埋边畀你，唔使慢慢剥壳咁麻烦。
Grilled Prawns
闺蜜约会一定要有甜品
甜品同样有杂锦拼盘拣，同闺蜜Share 份量啱啱好。
Oriental Pastry
独家鸡尾酒 呢度先饮到！
同场有十几款Cocktail 同 Mocktail，全部由驻场调酒师设计。如果想试黎巴嫩特产酒，呢度亦有当地红酒拣。
Rock Glass
将无花果混入Gin 酒，再加入Mancino Rosso Vermouth、意大利苦酒，拌入冰块同烧橙皮，味道偏刚烈。
Coupe Glass
红辣椒混入Vodka，再有苹果汁、柠檬汁同蛋白等，口感绵滑清爽。
Flute
荔枝汁、玫瑰糖浆、柠檬汁加上意大利气泡酒Prosecco，轻甜易入口，好啱女仔饮。
Tiki Glass
Dark Rum、Coconut Rum 加上Kahlua 咖啡、菠萝糖浆，极有层次变化，好有惊喜。
Shahrazad Lebanese Dining Lounge & Bar
地址: 中环云咸街75-77号嘉兆商业大厦2楼
电话: 23300242