以南印度菜式Chettinad料理为主打嘅印度菜餐厅，喺香港并唔常见。位于尖沙咀嘅Anjappar Chettinad Indian Restaurant，喺全球17个国家中有逾70间分店，并以混合多种浓烈香料烹调制作料理而闻名。餐厅由装潢、食材到员工都富有异国风情，到访用餐就好似去咗一趟久违嘅中东小旅行。
Chicken 65
韩式炸鸡就食得多，印度式嘅炸鸡又系点？红卜卜，但冇想像中咁辣，香料味道平衡，仲好juicy同脆口添。
Garlic Nann、Kashmiri Naan
食印度嘢梗系唔少得薄饼，无论点酱定系咖喱都一样咁衬。Naan大大块，口感松软，而且蒜香味突出，即使点完浓郁嘅酱料，都依然可以食得到。
Butter Dosa
牛油煎薄饼单系卖相已经先胜一筹，捲成长筒形。呢款南印度嘅主食，有啲似印度版Crepe。边位烟韧中间香脆，既有牛油香味，亦有淡淡乾酪咸香。Dosa以豆同米混合面糊制成，跟配4款印度香料酱汁，有清新口味，有咸、有甜，亦有豆泥口味，各有特色。
Butter Chicken Masala
印度咖喱绝对系必食，黄油鸡咖喱味浓香，加埋番茄落去制作，辣度刚好，仲好开胃添。最值得欣赏嘅系鸡肉去晒骨，食落啖啖肉，又入味又方便。
Bamboo Biriyani Chicken
印度竹筒烤鸡炒饭够晒特色，原个竹筒上枱，好啱打卡。饭量十足，粒粒米饭沾满印度香料，另外可以蘸点奶酪等酱料，中和浓郁嘅香料味道。
Tandoori Pomfret Fish
印式烤鱼，以大蒜同胡椒醃制而成嘅鱼肉，带有阵阵炭烧香，非常惹味。而且师傅控制火候得宜，鱼肉都几嫩滑。
Anjappar Fish Meal
印度传统料理之一，好似个大拼盘咁，有唔同种类嘅咖喱、蔬菜、醃渍物甚至甜品等，由清爽到浓味嘅都有。围住中间嘅主食，可以随便配搭，完全可以体验到印度饮食文化嘅精髓。鱼肉新鲜、香而不辣，有款甜品更带浓浓椰子香。
Mutton Sukka
羊肉咖喱同样都系带有浓郁嘅印度香料味道，炒香过嘅羊肉羶味唔会话好突出，而肉质仍然保持鲜嫩。
Pundina (mint flavor) Chicken Tikka
印度咖喱唔一定重口味嘅，呢款以薄荷同绿辣椒醃制过嘅鸡肉，早已染成绿色，肉质嫩滑，带有清新嘅薄荷香，就连咖喱酱都有薄荷味，有种fresh嘅感觉呢。
Mutton Liver roast
羊肝味道或者会有啲羶，但大厨将羊肝切开成小片，加入洋葱、黑胡椒粒以及Chettinad香料一齐炒香，令到羊肝变得更为香口，层次有所变化。
Mutton Nalli Roast
连骨上嘅烤羊髀，卖相吸引，加入洋葱、番茄同Chettinad香料制作，香嫩可口。
开饭仔依家仲有好野益大家！于2022年4月29日至6月9日期间，到【Anjappar Chettinad Indian Restaurant】消费并上载有效收据到指定网页， 随时赢取丰富奖品！ 食得愈密， 得奖机会愈大，超过200份奖赏等梗大家！快啲约埋饭脚开餐啦！
Anjappar Chettinad Indian Restaurant
地址: 尖沙咀宝勒巷3-7A号万事昌广场2楼202号舖
电话: 34285757