紫色控要留意喇，旺角新开人气紫系西餐!! 天花悬挂走马灯萤幕，中间流线型梳化卡位都系打卡靓位～仲有180度落地玻璃映照旺角街道，系区内少见超开扬餐厅。
呢度有唯美三层小食，同埋一系列精致西餐、咖啡、鸡尾酒都好IGable，即刻睇吓有咩食啦。
紫系环境俘虏一众紫色控。
旺角少有极开扬景观西餐。
【唯美叁层奏】
好有下午茶仪式感嘅「叁层奏」，分别放上36个月Parma ham配蜜瓜、秘制海鲜渍、法国蜗牛配薯蓉，好啱闺蜜影相饮嘢。
【人气料理】
龙虾牛角包
爆红打卡店都有自己嘅招牌龙虾包，大厨就选用酥脆牛角包放入爆馅青瓜蟹籽沙律同龙虾钳。
基地海鲜汤
海鲜汤有青口、蚬、大虾等煮制，微酸鲜甜好开胃，伴碟嘅长多士都系即焗好脆㗎。
炭烤安格斯肉眼
呢度可以叫小食饮酒，又可以叫份牛扒食晚饭。切开7成熟安格斯肉眼扒，入面仲系好粉嫩有肉汁。
纸包焗比目鱼
纸焗海鲜系好经典煮法，只要放入百里香、柠檬、番茄等慢煮，就可以完美保留比目鱼精华，食到最原始鲜味。
明太子奶油汁义大利粉
呢道意粉望落简单，其实酱汁用咗日本明太子、奶油、蛋浆煮制，劲creamy咸香。
班尼迪蛋大烤菇
班尼迪蛋一向有好多粉丝，大厨就将经典松饼换上大啡菇，更弹牙湿润，连埋蛋浆、菠菜、乾酪一齐食真系好有幸福感。
【咖啡遇上鸡尾酒】
呢度系区内少有咖啡又有鸡尾酒同多款酒品，嚟到当cafe影相閒聊；又或当作酒吧餐厅食饭饮酒都得。
(左)Crème Brûlée Cappuccino，焦糖布甸口感。
(右)Cafe Latte，巴西同哥伦比亚混合咖啡豆。
驻场调酒师会调制各款cocktail同mocktail。
(左起)Purple Rain有蝶豆花、Vodka、玫瑰；
Swamp Climber有Vodka、Blue Curacao、蔓越莓；
Base Paradise有Gin、薰衣草、蝶豆花;
Marvellous Base有Espresso、香灯、Citrus Vodka等。
(左)Green Knight，青瓜、薄荷、苹果调制。
(右)Amber Refresher，柚子、草莓、香橙调制。
沙冰系列口感超绵密，仲有多款口味拣。
(左起)Matcha Caramel Smoothie系抹茶焦糖，冰淇淋口感；
Crème Brûlée Hazelnut Frappé系焦糖布甸奶盖榛子咖啡；
Strawberry Hibiscus Tea Smoothie系草莓洛神花茶沙冰；
Taro Vanilla Smoothie系芋头云尼拿，冰淇淋口感。
基地叁
地址: 旺角弥敦道558-560号誉发广场1楼