蜜滋麻美

茶飲店我一向都好少特登打食評，因為種類實在太多，又冇講為幾十蚊講一大餐，不過最近飲過一間真係令我難忘，雖然都係台式飲品，但佢就結合左新元素，令成個感覺好新鮮！就咁聽個名「蜜滋麻美」，一定唔知係咩黎，仲覺得有啲撬口，但了解完佢SELL嘅產品就知道名字嘅由來。報導都唔少，珍奶已經開到成行成市，要突出自己珍奶品牌都真係唔易。從menu可見，佢地珍珠奶茶結合左芝麻粉同花生粉，就咁睇圖都覺得好吸引，唔知味道如何！店面仲有張枱比食客堂食，岩晒嗌左仙草又想堂食既朋友，不過位置唔多，繁忙時間都應該唔會有位XD所以好好彩可以係到打卡影相，包裝頗有台式風味。芝麻黑糖珍珠鮮奶，因為唔想飲太凍，所以+$5鮮奶，滿密嘅芝麻舖面勁有睇頭，鮮奶味好突出，帶黑糖嘅甜味，兩者之間唔會搶fou，再者飲落去因有芝麻，令成個感覺勁香口，珍珠好煙韌有嚼勁，相對起出面相同價錢嘅茶飲，呢杯有驚喜又對得住個價錢！餐廳建議飲法，吸管由底往上吸，芝麻粉偏小會有機會卡係喉嚨，如果比小朋友飲就要小心注意。嫩仙草5號，包括有燕麥、紅豆、紫薯、粉圓、嫩仙草底部仲有黑糖沙冰，如果夏天買番碗消暑一流，如果唔想食冰都可以嗌走冰，好可惜當日冇芋圓，如果唔係都想試試。仙草好軟滑，香甜得黎令人想一食再食，紫薯好似雪糕咁放係中間，味道香濃，粉圓夠晒煙韌，甜品黎講真係大滿足！…查看更多

行行重行行，走上一條大概40度傾斜嘅鴨巴甸街，有啲鬧市行山feel，就到咗呢個歷史悠久嘅台中茶飲店。時值12月，行到半條上斜街剛好身水身汗，整番杯茶飲就啱哂。同老友一人一杯，芝麻黑糖珍珠鮮奶，上面滿滿灑上大堆泥般黑芝麻粉，周遭有啲類似胚芽嘅東西，少糖，第一啖飲已bling bling眼，芝麻味勁到似食芝麻糊，珍珠結實有彈性，飲到底都仲有堆芝麻「泥」剩咗喺度，飲完個口又冇漿住，估計用啲食材都靚嘢。另一杯香檳茶王，同樣少甜，香檳大概指飲品顏色，飲落去似伯爵茶，輕微回甘，朋友話似中式茶但好飲好多。舖內簡裝，得一張小高身圓枱，似方便人買完杯嘢放枱面俾相機食先咁款。…查看更多

話晒係中環 OL   成日行泥行去, 竟然有間新開既台茶我唔發現, 仲要話係9月開既添, 唔係呀化  無乜事我出番去反省下 鴨巴甸街,  呢條路比較少行,  最多行上PMQ,  如想向下行, 又會再行前一條街去九記果度先落,  加上佢個鋪粒落去, 唸唸下, 我平日睇佢唔到, 堅唔出奇! 呢個位開間台茶,  真係無人估到吧!睇D飲品款式.....咦~ 新野喎, 未試過!  就係咁, 就留住了我腳步了 ......Like 挨豬同飛卜會平D, 梗係like啦 朋友!仲有其他茶款, 有D都好少聽, 價錢算貼地, 大部份2字頭,  符合經濟環境!    咁多字 太高層次 環境乾淨, 杯杯人手整, 都ok喎芝麻黑糖珍珠鮮奶 - 朋友第一個拎茶, 試完一口話 : 掂呀!花芝黑糖珍珠鮮奶   - 我試呢款,  親身睇個店員整, 個賣相好得, 花生+芝麻味好香,  珍珠一般啦,  可能係比花生+芝麻粒搶晒鏡,  成杯都幾好飲,  無想像中咁甜, 但就堅多粒粒.  我呢杯係細既, $22 真係抵到爆一爆! 香檳茶王 - 朋友話一般啦, 無乜特別$22 - $25 飲到杯特別又好飲既野, 真係但佢位置咁隱世, 我唸好多中環人都唔知有佢存在 , 希望佢撐住啦~…查看更多

蜜滋麻美原來係台灣歷史悠久既刨冰店幸發亭既一條副線，宜家開到黎上環又點可以錯過。今日食完午餐就去左PMQ附近呢度試下。呢度做緊推廣，like左FB IG就有得平。店員全部都係後生仔女，好有青春氣色。呢度出名係落左花生、芝麻等等係珍奶上面，所以我就揀左呢個芝麻黑糖珍珠鮮奶（原價$32，點讚後$25）。咁啱呢度做左大大外賣單，再重新炒珍珠，最後就等左十分鐘左右先整好。首先用筲箕令花生粒粒平均分佈係面，跟住就畢啲黑芝麻上面。呢度真係新鮮炒好真係有咬口得黎又有濃濃黑糖味。珍珠既size幾容易吸。全部攪拌後，每吸一啖都連帶粒粒幼細既黑芝麻，係個幾新既體驗！…查看更多