私家廚房

間唔中都會同屋企人出去食飯，唔想次次都食個幾間，所以今次就出旺角揀咗間想環境舒服啲食小菜既地方，一家人輕輕鬆鬆食餐飯，今次全權由屋企人落單。首先就係脆皮德國鹹豬手，皮脆肉嫩大大碟，再點少少酸辣汁，味道啱啱好。接著就係OK汁煎南非大虎蝦，個汁酸酸甜甜，蝦大大隻蝦肉爽口彈牙，好開胃會自然想食多幾隻。然後係籠仔荷葉海龍皇蒸飯，飯上面有魚蝦蟹加少少蒜蓉，但個重點係個飯到，好香口入哂味，唔小心又會想食多碗。再黎既係薑蔥焗美國桶蠔，上菜時熱辣辣出哂煙，蠔好大隻夠哂肥美，配合薑蔥味無得輸，非常滿足。之後係生炒骨，味道唔會過份酸甜，好適合送飯。最後就係燒汁脆米安格斯牛粒，一半矮瓜一半牛肉，味道濃沃送飯一流。結論，旺區好選擇，適合一家大細去食，好多餸式選擇，一定有野啱你食。…查看更多

早排叫朋友幫我買咗啲嘢，交收完就一齊去食晚飯。我哋去咗旺角呢一間樓上嘅「私家廚房」，聽聞呢到嘅餸除咗夠大碟，而且仲鑊氣十足，所以唔可以錯過。是日一行人四個人，都叫咗相當多野食，事關環境唔同大排檔，冷氣十足岩哂我地呢班怕熱嘅人士，就可以慢慢食一邊傾計。二話不說，柯打咗嘅OK汁煎南非大虎蝦、脆皮德國鹹豬手都一齊上菜。大虎蝦除咗炒得香脆，而且仲大隻夾彈牙，呢種調味同煮法真係無得輸，非常開胃，可以食幾碗飯。至於豬手皮就焗得非常脆口，但內裡嘅肉就非常林身，可以點蘸隔離泰式嘅酸汁，又另一種風味。接住到嘅係籠仔荷葉海龍皇蒸飯、薑蔥焗美國桶蠔、燒汁脆米安格斯牛粒。蒸飯比想像中更大盤，分別有魚蝦蟹鋪面，帶陣陣蒜香豉油味，隨之仲有淡淡嘅荷葉香，海鮮嘅鮮味完全融入到米粒裡面，味道一流。而桶蠔更為誇張，由於用瓦鍋熱住上菜，故裡面嘅蔥同蠔仍滋滋作響，眾人都嘩然，除咗香味撲鼻，隻桶蠔果然足料，一共六隻都大大隻：點樣分呢。起筷，桶蠔充滿鮮味且啖啖肉，夾埋薑蔥食成件事惹味更多，令人欲罷不能。至於牛肉粒相比之下較遜色，因為調味似乎重手咗，口味太咸，但不得不提小菜裡除咗有牛肉粒，仲有一啲茄子切咗粒混合其中，結果一齊食又幾夾，只要唔太咸。其後有即叫即炸生炒骨、拍蒜炒油麥菜、懷舊琵琶豆腐。生炒骨意想不到地大碟，入口非常脆同熱，果然係即叫即炸。食咁多重味小菜，油麥菜最岩中和一下口中嘅味道，大大碟四個人都食唔哂。最後琵琶豆腐即係豆腐同鯪魚肉混合再煮嘅一道小菜，有種接近食齋嘅感覺，芡汁調味適中，鯪魚肉新鮮，入口唔會覺腥。總結，無諗到小菜嘅份量都幾多，食到最後真係太飽而需要打包。所以建議四個人的話，大概叫4至5個菜再配飯，應該都夠飽。…查看更多

一向都鍾意捐窿捐罅搵好野食，今次比我搵到間超正私房菜環境好舒服，寧靜得黎有種家嘅感覺，檯邊有帳幕，如果想有啲私人空間仲可以拉埋去添，絕對適合一家人或三五知己舒舒服服食番餐。菜色種類包羅萬有，海鮮、火鍋、小菜、雞煲樣樣齊，想試嘅菜都好多款，老闆仲特別介紹左個焗魚腸，可惜要訂先有得食，下次一定要再黎過海鮮方面，有好抵食嘅鮑魚，一隻都係$48咋。如果唔想食清蒸鮑魚，不妨試下呢個避風塘椒鹽大連鮑魚。椒鹽味十足，非常入味。鮑魚又夠新鮮。燒汁脆米安格斯牛粒真係超有驚喜，除左安格斯牛粒之外，原來伴碟仲有我最怕食嘅嘢....茄子，無諗過一個完全抗拒茄子嘅我會因為呢碟餸而踏出第一步試食茄子。當我第一啖以為夾左牛肉粒嘅時候，我先發覺佢原來唔係牛肉粒，外脆內軟，口感好特別，酸酸甜甜嘅燒汁完全蓋過茄子嘅味道，令我一試再試。牛肉粒肉嫩多汁，一啖一口，非常美味，再加上上面嘅脆米粒，令口感更豐富，味道更上一層樓，絕對值得推介！自家製造撚手墨魚片頭炸得金黃香脆，墨魚爽口彈牙！食完濃味嘅嘢，食番個清清地嘅海皇翠塘滑豆腐，以三十年前造法製作，坊間已經好少機會食到呢味菜。豆腐好夠滑， 芡汁充滿住鮮蝦，斑塊嘅鮮甜味，再加上菜粒同埋蟹柳，紅紅綠綠，互相輝映，賣相吸引，送飯一流。食完飯，老闆仲好好送左個冰鎮菠蘿，一口碎冰，一口菠蘿，喺炎炎夏日食冰鎮嘅菠蘿，真係超爽！…查看更多

之前聽朋友講喺旺角見到有間好似食私房菜既餐廳，今日終於約到上去食了。有口碑黃金脆魚皮，好大塊無乜碎濕濕，超鬆脆又鬆化！自家製造撚手墨魚片頭，好少有得食，今次仲要新鮮整好出黎，熱辣辣好好味！燒汁脆米安格斯牛粒，牛粒唔韌，另外佢係用茄子切粒一齊煮，有新意得黎又幾好食。鄉下佬炒雜菜，其實只係好普通既菜，但就炒到好有獲氣。老輝造法砵仔焗魚腸，黎到嗰時仲係到咋咋聲，面鋪左啲油炸鬼，個面焗到脆卜卜好香口。主角魚腸一啲都唔腥，同蛋既比例差唔多係一半一半。最後送左碟菠蘿比我地清清口既油膩。…查看更多