甘棠燒鵝

話說某飯局中薯爺提到想食燒鵝，但深覺中環名牌「鏞記」嘅水準已不大如前，名廚好友聽到即推介老店後人創辦嘅「甘棠燒鵝」。真係冇諗過電話一打就通，完全唔似坊間傳聞般咁難訂位喎！餐店位於銅鑼灣南華會一樓保齡球場內，會所四周都貼有指示，非常清晰。有一點大家要留意，經保齡球場入口雖然係近啲，但係就要行上三十幾級樓梯。行動不便的話，建議喺遠少少嘅體育大廈（即禮仁小學對面）度入，嗰邊先有𨋢搭。中菜廳個門面十分起眼，以鵝形繪成嘅「甘」字標誌可愛又到題。接待及收銀處身後透出光鮮企理嘅廚房，燒味部嘅師傅當真忙個不停！傍晚六點全店滿座，早咗半個鐘嘅XO仔要等到六點半先有得埋位，幸好在場嘅經理Joyce姐姐非常好人，得悉細佬要為長輩們搵定個𨋢同洗手間嘅位置，仲唔嫌煩咁親自帶路。光猛嘅用餐大堂其實唔算太噪，主要都係保齡球場嘅雜聲多。六人用餐有最靚嘅一號枱坐，空間感都好足。桌上擺有齊備嘅自用及公用餐具，仲有個轉盤。如果想要多啲私人空間的話，客人可以要求訂房；細房可容納上十二人，大房則可容納上十六人，最低消費為$750/位。九頁餐牌只有中文版，其中瀨粉七點已經賣哂，建議有意食的話最好乜都訂定。餐牌最後一頁寫明茶錢$18/位，開瓶費$100/樽，咁又唔係好過份。甘一刀叉燒 肥燶（$210/例牌）：厚切嘅叉燒好靚好腍，外皮燶得黎好香，層肥膏直頭溶喺口，靚靚媽咪牙力唔好都食得到。松花皮蛋配酸薑（$16/半隻）：已預先開邊嘅皮蛋極之溏心，半透明嘅蛋白軟彈嘅同時，蛋黃香濃潤滑，高質美味。燒鵝下莊（$220）：燒鵝係就係比「鏞記」好食，但唔代表佢正！燒鵝皮層上枱之時最脆，無奈皮下脂肪多，脾肉都唔夠鬆，肉質帶點兒韌。甘棠薑蔥鵝油撈麵（$58）：簡單嘅鵝油撈麵超級爽嫩，食落一啲都唔油，輕巧非常。百花金腿釀新鮮鳳翼（$768/半打）：釀滿蝦膠嘅雞翼脹卜卜，個擺盤賣相就有啲奇怪，小弟轉咗幾次隻碟都唔知邊個角度影相先正確。雞皮尚算柔軟有彈性，可惜個百花餡就只得個膠，冇乜蝦味，薯爺狠批此味釀雞翼不知所謂，絕對唔值$128/隻:(！甘棠一品鵝雜煲（$100/位）：第一次食一品鵝煲係喺「鏞記」間會所餐廳「嚐真」，當時食齊鵝嘅所有部份，而且每款同樣細膩可口，印象尤深！「甘棠燒鵝」個淨雜版本明顯差距甚大，估計原因係時間管理得唔好，師傅疑似一次過煮哂所有材料，而並非逐層去煮。相片可清楚睇到煲品嘅油層，入面嘅鵝翼唔夠腍，應該要煮耐啲；鵝腸唔夠肥所以偏韌；嚡嚡地嘅鵝肝就過熟所以硬實；最好食只有滑嘟嘟又夠厚身嘅鵝紅。涼瓜炒苦瓜（$168）：經理姐姐極力推薦嘅招牌菜以兩種「半生瓜」炒出，一深一淺；深色嗰款個味甘啲同濃啲，淺色嗰款則清甜清爽啲，最緊要係菜式勁啱席上嘅老人家口味！隱藏於南華會嘅「甘棠燒鵝」環境開揚通爽，綜合六人意見，價格偏高嘅食物質素評分會俾三點五分，屬OK與笑臉之間，但由於服務生態度誠懇，成功提升咗晚餐嘅享樂，希望XO仔一篇微不足道嘅好評可以為小店鼓勵一番。…查看更多

金錢雞、燒鵝、甘一刀肥差燒、大班差燒、涼瓜炒苦瓜、西洋菜煲生魚、湯瀨一碗，這個菜單，真正我的口胃。是的，是膩了一點，但襯健康還可以，多點運動懺悔便是。甘棠燒鵝開在南華會，據聞「甘」是中環鏞記家族的其中一位，「棠」是曾經主理鏞記的「棠哥」。一般我對故事背景興趣不大，好吃的誰煮誰理根本不重要。以前去鏞記，甚麼都好吃，除了燒鵝。想當年我經常不明白，馳名燒鵝的鏞記燒鵝最不好食，這是甚麼道理？還是因為我不是富豪大款所以好吃的我沒份？知道甘棠是鏞記的人出來開的，起初其實有點卻步，但朋友說不去便走寶，所以就去試一試。嘩！上面寫的幾味，每一樣都頂級好味，如果與鏞記是同出一脈，絕對可以替鏞記「洗底」！燒鵝好食，不用形容。差燒呢，「大班差」是正常做法的那種，好味，但不是未吃過的味道。「甘一刀」較肥，我就非常喜歡。夠肥美，差燒頂層刻意燒燶，肉味香味滿瀉，極品！涼瓜炒苦瓜原來是生炒熟炒兩種炒法放在一碟，喜歡吃苦瓜的朋友一定要試。這餐廳枱不多，晚上walk-in應該不用試，有心便預早訂座。反而中午比較疏落，午餐來一碗燒鵝瀨粉加兩件差燒一碗靚湯，一生何求！強烈推薦。…查看更多