文記海鮮飯店

前兩天和老友相聚，由於疫情，兩年多沒有到紅磡街市‘’文記海鮮飯店‘’幫襯，踏入2樓熟食中心，已感受到大排檔氣氛。坐下來服務員及餐牌都有些不同，但親切感及味道就不變。由於有很多餸菜都想試，經大家商議叫了6個餸：1）潮州打冷不能缺少的鹵水鵝2）之前每次必食椒鹽鮮魷3）服務員推介燒魚4）招牌小棠菜5）我們至愛～蒜蓉開邊蒸蝦6）遺忘已久的干燒伊麵。全晚暢談甚歡，大家對食物質數都讚口不絕，而且價錢大眾化。我們已諗好下一次餸菜了👏👏👏…查看更多

西洋菜豬骨湯，清爽滾湯水感突出，油油漱漱口還可以。合掌瓜豬骨湯，免費例湯食飯前整碗湯水濕濕口！我最鍾意飲湯，中西都一樣愛。依碗真心好湯水，仲好油添 ，飲一碗收皮唔想第二碗。霸王花豬骨湯，估計係掛。永遠飲完都唔知是什麼，因為文記每款例湯味道都係幾乎一樣。節瓜豬骨湯，可能係掛，依舊不知道飲緊咩湯。味道平平無特別，味精例湯一碗。淨河粉，湯底過粉清淡，豉油湯不是鮮雞湯？河粉硬實而且有陣生水味道，試一次便夠。豉椒排骨炒河，感受不到任何鑊氣，靜蠅蠅微溫豉椒排骨淋在暖河粉上，自行撈勻起動！細細粒排骨少少肉，咸味為主導，豉椒味不夠香醇，提不起勁來，馬虎大啖啜啜啜處理掉算數。肉絲窩麵，生日要食雞外，當然長壽麵都唔少得。輕輕暖意可以直接連湯帶麵倒落肚，淡茂茂湯底，腍劈劈的肉絲，不爽滑的麵條，出品一般唔難食。琵琶豆腐，熱烘烘豆腐鯪魚球，炸完再炆煨功夫也不少！外層嚥韌一咬爆開，嫩滑清淡鯪魚肉，微腥搭著濃郁豉油芡掩護一下，味道口感蠻美妙。椒鹽鮮魷，必食之選！鐵膽實有得出場。即叫即炸熱騰騰新鮮出爐，魷魚鮮味十足，爽口彈滑多汁。薄薄一層麵粉炸得非常香脆鬆化，鑊氣霸道。椒鹽辣椒蒜酥微辣夠惹味，浸埋甜酸喼汁醒胃醒腦更和味！次次都鬆脆金黃惹味超高水準，多年來絕無投訴的機會。西檸軟雞，壓到薄薄扁扁雖然易炸兼快熟，但變得乾硬鞋又無肉汁呢！脆就真係非常香脆，西檸汁黐糊糊酸咪咪。西檸豬扒，估唔到炸得外脆內嫩，鬆鬆的豬扒還有一絲豬甜味，滾埋先酸後甜西檸汁，醃味跟酸味難得合拍滿意。粟米斑塊，我本想要菜遠斑腩，不過同事指定菜色，無所謂。意想不到有驚喜！新鮮即炸鮮氣外洩，並不是翻炸陰沉類，外層鬆化略脆不油膩，魚肉嫩滑多汁，罕見難得。厚厚蛋花粟米汁，滑滑粟甜蛋香，味道得宜。生炒排骨，脆脆乾乾的外層，炸得通透沾滿甜酸汁，食其香口無咩肉食不喜歡。京都骨，不知某年某月開始京都骨已轉用豬扒，變成京都肉排不再係一字骨，完全兩樣東西，價錢差好遠呢。炸熟後再用甜酸汁回鍋即成，酸酸甜甜好開胃醒神。豬扒醃得美味炸得香口，肉質腍而有趙口，熱辣辣大啖大啖咬，好滿足幸福啊！*豉汁涼瓜炒排骨，上年突然開始食得到苦瓜，仲要越食越鍾意那甘苦味道爽脆多汁，回想最衰都係大埔街市伍仔記！就是由他們的冰鎮涼瓜開始。苦瓜甘而不苦，爽嫩多汁不過腍。大排擋式排骨經常骨多肉少，醃得過火味濃濁，今次也不例外，幸好跟苦瓜同吃還可以。牛柳絲炒韮菜花，竟然開始食到韮菜花，仲越食越鍾意添，以前我一食就會反胃想嘔架！韮菜花鮮嫩爽甜索索聲沒半點渣，夾著醃味濃鬆軟牛柳絲齊齊趙，味道共融和諧，只係有點油。豆豉鯪魚炒油麥菜，我由細到大都非常抗拒豆豉鯪魚，有新鮮魚唔食，為何要食罐頭乾爭爭油淋淋？我堅係掂都唔會掂，不過依碟菜不太油，可以食幾棵油麥菜試試。菜葉沾著魚油，甘香散發豆豉味，夾著少許乾柴魚肉碎品嚐，爽甜多汁都的菜還可以。同事有趣地問點解豆豉鯪魚碎晒架？笑死我！莫非油麥菜要墊底，魚塊鋪面嗎？炒菜黎架喎。蒜蓉蒸土魷，鮮氣使人淘醉，生猛到彷如依然跳盪地游水中。蒜蓉帶甜亦帶辛，滿滿的躺在肚魷齊齊塞入，彈彈鮮甜有嚼勁，心滿意足。土魷蒸肉餅，肉餅每次都勁多肥豬肉，雖然會更香口更鬆軟更芬芳，不過實在太多會食到成口油呢！嚥韌味濃的土魷夾雜在嫩滑多汁肉鬆間，肉甜魷香滲著肉汁，撈飯無得頂！蝦米粉絲蒸水蛋，次次都三色或肉鬆悶到死！試試兒時阿媽最愛煮比我食既家鄉名菜。海鮮乾貨蝦米咸鮮非凡嚥嚥韌韌，長長彈彈粉絲像樹根般抓緊嫩蛋，大啖大啖撈飯享用，甜美芳香大快朵頤，迅間成碗飯蒸發掉，忍不住要多碗白飯啊！蝦米粉絲煲，作為主角既粉絲份量太少，唔夠喉唔夠分配，索盡湯汁夾著蝦米青瓜條濕滑地跣入口，舒服美麗！青瓜條反而多到喧賓奪主，不如叫青瓜煲啦！半腍半脆，保有獨特清爽味道。海鮮雜菜粉絲煲，果真幾海鮮雜錦喎！有蝦米及魷魚，夠專注無其他，勝在熱騰騰噴著煙端上。海味雜菜煲同蝦米粉絲煲既合體，而且菠菜、白菜、菜芯、西蘭花、紹菜、冬菇、青瓜、等等，什麼都有百花齊放！落味地獄咸度，咸蟲雜菜連湯底都偏咸，勁撈飯都頂唔緊。沙嗲肥牛粉絲煲，不吃芽菜的我又要花點工夫挑走，可以安心食用咯。深深的咖啡色，厚厚沙嗲汁重手頗咸，真係要撈多幾啖飯降咸一下，連鞋牛肉爽金菇滑粉絲齊齊扒入口，出奇地味道蠻不錯吧。薑蔥魚頭煲，還妄想會給我大魚頭，實在太天真喇！睇個價錢都知梗係細細無肉鯇魚頭，無肉食骨杉杉，炸得透徹脆卜卜盡吸薑蔥豉油汁，好鬼咸囉！薑蔥魚腩煲，話晒有啖肉食，結實的炆鯇魚腩，醃味濃郁不過仍食到魚味，魚汁醬油撈飯都十分相襯。魚香茄子煲，衰到連魚香茄子都出動埋，人家減緊磅架！忍無可忍，無論如何真係要叫個白飯。熱騰騰吱吱渣渣出場，味道濃郁微辣惹味，還有陣陣咸魚霉香。茄子軟綿濕滑，搭著肉鬆齊齊搭飯食，有讚無彈好味道，無話可說。椒絲腐乳炒通菜，飄著輕煙滾滾的送到，有鮮氣有鑊氣！立即大大注連汁塞滿嘴仔，我最愛粗粗的水通，鮮嫩翠綠爽甜多汁，配埋乳香微辣的醬汁更加美麗動人！蒜蓉炒油麥菜，食菜梗係要一束束大啖大啖地趙，這樣才感受得到兇湧的菜汁，霸道的菜甜，野蠻的爽嫩，還有陣陣溫柔的蒜香。菜膽雞一隻，我地明明要菜膽雞喎，點解會變成菜芯雞呢？從未聽過菜芯膽喎。依隻雞不得了，完全無雞味只有雪藏味，靠個芡汁同薑蓉，給我辣椒豉油會更好。皮厚大肥雞份量很多，肉質死實無鮮味，乾鞋兼備，芡汁死咸有少許麻油味，毫無香甜可口味道，實在地獄級難食，大家試一件就放棄。菜芯爽甜嫩，多汁脆口全部清掉。魚香茄子，隻煲呢？乾爭爭無汁，乾炒魚香茄子？茄子爽脆，我要勁綿勁滑勁多汁架！咸味強，辣味弱，失敗！肉片炒菜芯，滑潺潺嚥韌的肉片搭著爽嫩甜菜芯齊咬，互補不足蠻可口。咸蛋蒸肉餅，竟然用上鮮咸蛋，不是求其放片現成咸蛋黃蒸就算數，誠意可加。即蒸肉餅類都要用加倍的耐性等候，花上十幾二十分鐘實屬正常。鬆軟的肉餅大量肉汁夾雜肥豬肉格外甘香，咸蛋黃蛋白肉鬆撈飯無可抗拒的魔力，啖啖肉搭無比飯香，食指大動，大快朵頤！三色蒸水蛋，其實我地應該無點蒸水蛋，不過大家都忘記了！既然侍應叔叔送上門盛意拳拳，免強殷然接受。雞蛋滑溜溜震騰騰，味甜可口。藏著彈彈皮蛋及甘香咸蛋跟甜豉油白飯混和，味道昇華蓋頂！大大啖飯大大啖蒸蛋，開心幸福心心眼！白飯魚炒蛋，煎得兩面金黃焦香，熟蔥飄出芬芳氣味，淨聞都已流晒口水！蛋味濃郁緊緊包著清淡微濕魚肉，送飯不得了！停不下來。馳名羊腩煲，大大鑊落足料，豪氣闊綽無手軟，真材實料重量級！廿幾舊羊腩啖啖肉，肉多骨少大滿足，清甜不羶食到舔舔脷！羊腩滾上腐乳讓白飯抱著享用，無從挑剔，美味佳餚非您莫屬！羊腩湯撈飯同樣出色過人。配菜冬菇、馬蹄、竹筍、枝竹、唐生菜、等等，高質一絲不苟好好味。手切肥牛，顏色亮麗富光澤，看得見的優質。牛肉甜味強烈，夾著軟綿綿在羊腩湯肉涮兩涮，變得粉紅彈滑充滿肉汁，而且吸收大量羊腩湯就更加水潤，不過味道不太合適。…查看更多

由於我十月生日，這月份有不少朋友、家人及女友請我食飯。今次，則是我父母請我食大餐我作為在紅土黃龍一帶長大的居民，又加試讀理大，所以對附近餐廳都好認識咁岩今次父母想食大排檔，附近最好的選擇，就自然係紅磡街市裡面的大排檔餐廳我就揀左間poly人專幫親的 文記文記，係我讀書時都已經係咁去食，係超超抵食，十個人去食埋單唔洗70蚊。今次，我帶父母來試食，叫左幾道菜。分別係豉汁蒸倉魚、蠔餅、椒鹽鮮魷、椒鹽瀨尿蝦、馬拉盞炒雜菇、豉椒炒蜆D海鮮味道都幾好，雖然有一兩隻蝦有D梅身，但其他菜都唔錯。最好食最有驚喜，反而係馬拉盞炒菇，好惹味 好送飯。其實最開心都係一家人整整齊齊食餐飯…查看更多

之前一路都係去開"X合"，今晚諗住轉下口味試下文記，之前見到兩間都差唔多咁多人，心諗無事既，結果－－－－我錯錯錯錯錯錯了！一坐低無野做，梗係叫啲小食先啦，韮菜豬紅，不過不失。我叫卤水鵝片，個阿叔就扲碟卤水鵝"件"黎一野擺低，轉身就走，我差啲叫佢唔住，我同佢講我叫鵝片喎，佢話鵝件都一樣啫，我話成碟都係骨喎！鵝片就啖啖肉，又點會一樣呀，你唔好扲碟"雞"黎同我講話一樣，"指雞為鵝"吖苯！！！經過一論"妖妖妖嚷"最終我碟鵝  "片"  上枱了。人齊叫餸！！！蒜蓉粉絲蒸扇貝，椒鹽鮮魷，沙嗲肥牛粉絲煲，豉油皇大蝦，豉椒炒花甲同埋生炒骨。蒜蓉粉絲蒸扇貝，扇貝蒸到過晒龍縮晒水，椒鹽鮮魷都幾香口，沙嗲肥牛粉絲煲肥牛份量幾多不過就偏鹹，豉油皇大蝦淨係食到兩三隻大蝦，跟住全部都係小蝦，味道是可以的，不過有啲搵笨7😩太小了😩豉椒炒花甲，過鹹食剩哂，生炒骨，反而係最好的，因為唔太差，在比較之下佢反而係最好，我都唔知講咩好！絕對無下次－－－－－完－－－－－…查看更多

今晚同屋企人响黃埔呢頭開飯, 紅磡街市真係大大碟又好食.  是晚怕人多, 預先訂位加6.30PM 就去開飯.放肆一晚食少少海鮮, 又可以自備葡萄酒, 爽.8人開飯, 8個餸, 2支啤酒, 1支白酒, 幾個靚仔.  大滿足.今晚條魚好靚, 老細話呢條叫"花英" (我同D魚名唔太熟), 斤半左右, 蒸得剛好, 肉質有D似斑, 十分美味.最愛椒鹽鮮魷, 仍然係大大碟, 新鮮炸, 忍唔住口不停吃.凍蟹, 大大隻, 好食但肉唔夠滑.蟶子, 炒得香口.  豉椒炒蜆夠鑊氣.  碟碟都好食, 雖然白飯好大碗, 但我一個人連飯都清到一碗.見到其他枱有人點羊腩煲, 冬天超吸引.  …查看更多

好久冇食大排擋,專成到來回憶.叫左:京都肉排,椒鹽鮮魷,涼瓜炆班腩餐前小食都好好味,菜圃做得好好,叫左待應要左兩碗.京都肉排$50:肉排入味,好淋身,酸甜香口,洋蔥野味,送飯一流.:)椒鹽鮮魷$68:份量十足,鮮魷新鮮,炸得好脆,入口彈牙,椒鹽味十足好香口,必食之選.涼瓜炆班腩$55:個汁有小小過鹹,但都好野味,班腩大大件新鮮又有魚味,涼瓜炒得香口,而唔會有草醒味.這樣簡單的一餐都唔錯呀!…查看更多

一人有一個夢想 ﹗但今日大部份由琪琪發版，同事們等等啦 ﹗臘肉炒芥蘭，琪琪點既第一碟送，好香喎 ﹗多年以前層經食過，但我一向都唔會點既食物，估唔到食落又幾好味喎 ﹗芥蘭色澤翠綠又爽脆，配上臘肉分泌既油脂，非常香口，好味好味 ﹗菜脯涼瓜炒蛋，琪琪點既第二味送。上次叫過，今日同事要添食。炒蛋好香又熱辣辣，只係味道略為咸左少少啦。雖我不愛涼瓜，但依碟煮得一啲都唔苦，可能鹽味加菜脯既咸辣味已經蓋過苦味。粟米斑塊，琪琪點既第三味。不過不失啦，炸粉多了點，都炸得香口，粟米汁正常味道，無咩特別，撈飯不錯。沙嗲肥牛粉絲煲，琪琪點既第四味 ﹗比想像中好食好多倍，而且比一般食開既香辣，唔會得個甜字。粉絲發得剛好，口感滑溜又嚥靭，難得 ﹗好怕粉絲過腍又爛。肥牛夠嫩口，雖則已全熟，但都唔會鞋。椒鹽鮮魷，係我揀架 ﹗每次食都好滿意，肉質鮮嫩彈牙，薄薄一層炸粉炸得乾爽香口，配埋喼汁好開胃，要密密食先得呀。生炒骨，梁公子既至愛 ﹗比坊間一般甜酸咕嚕汁濃郁，似有傳統山渣成份，足料無欺場。豬肉味濃，肥瘦適中，外脆且內嫰，滿意 ﹗…查看更多

天氣好冷凍，一入到熟食中心，見到好多枱係度打邊爐又或明火羊腩煲呀，勁吸引 ~ 但無奈地 lunch 唔夠時間打邊爐呢，同事們亦不感興趣，又有同事唔食羊，連羊腩煲都幻滅 ~ 無緊要，返工無計啦 ~ 食小菜，一人叫一款，食完急急腳返公司 ~粟米斑塊，嘩 ﹗一咬落去嚇親，好膠吓喎，啲粉又厚又靭，同塊魚既厚度差不多，唔掂、好差噃，炸粉多過魚。涼瓜炒魚鬆，味道麻麻地，仲以為魚鬆即係一粒粒細細架呢，原來只不過係魚滑煎成魚餅再切片之麻，咸而不鮮，整體味帶甘，不苦，鑊氣欠棒。蒜蓉炒白菜，都係麻麻地，鑊氣欠棒，雖則大火略炒可保存維他命及營養，但白菜唔夠甜，唔夠熱，稍為生左啲，口感爽得黎偏硬。椒鹽鮮魷，估唔到最好食係依道菜，炸得香口、鬆化、金黃色，口感爽夾嚥靭，配喼汁同起，好開胃，不停咁食。蘿蔔牛腩，啲蘿蔔都唔甜既，有酸味，平價貨，炆得唔夠耐，唔入味而且口感硬。牛腩都唔錯，炆得夠腍又入味，撈飯一流。金銀蛋菠菜，又係咸蛋，無咩特別，皮蛋咸蛋撈菠菜，菠菜好新鮮。京都肉排，酸酸甜甜，好味。咸蛋蒸肉餅，味道同口感都算滿意。但好多肥豬肉，較鬆散，雖然加肥豬肉會更香，不過太多了吧，肉同肥膏比例不好，令到豬肉味不足，而且整個送比較淡口，要加豉油提味。啫啫三杯排骨煲，唔夠熱，好明顯係炒完後直接倒落個煲度就算，連個煲都唔夠熱既，過份地求其 ﹗味道好好，好香，排骨肉香且入味，加埋豬潤一齊煮，令香味同味道都更提升。三菇炆黃金豆腐煲，聽落似乎好健康，但其實幾油吓。見到三菇得什菜以及炸過既玉子豆腐，味度唔錯，幾好食，什菜新鮮爽嫰，玉子豆腐又香又滑。生炒骨，個人都係夠喜歡咕嚕肉多啲，無骨又啖啖肉。衣個送還可以啦，炸得香脆，味道酸酸甜甜，大路穩陣，不是什麼古法正宗炮製。…查看更多

又係大嫂請食飯,就平平地係自己Hung Hom地頭搵番間,本來想去老上海, 但見食評麻麻,最後選擇呢一處.我們6大1細, 叫了8餸1湯, 食到要打包走.1. 卥水拼盤:) , 都好食, 幾足料.2. 椒鹽鮮魷 , 呢一樣真係頂呱呱, 好好味道3. 豉椒炒蟶子 + 4. 豉椒炒蜆 , 一般, 料係新鮮, 但豆豉落得唔夠, 唔夠味道!5. 粟米魚肚羹: 一大湯豌, 我就搵唔到魚肚嘞, 不過又煮得幾好味, 最鍾意佢夠熱, 而且稀" 結"度很適中.6. 炸乳鴿1隻 : OK7. 椒絲腐乳通菜 : 份量大8. 沙拉骨 : OK9. 原條豉汁蒸鱔 :( , 呢條鱔好大條, 但廚房用平時蒸例牌鱔嗰隻碟來蒸, 塞到爆,條鱔第一次上枱唔熟要番蒸, 好差, 而且同上面講過的問題一樣, 都係豆豉落得唔夠.另外叫了4個白飯和3支汽水, 埋單$560, 抵食!有兩點結論:(一) 環境係熟食中心, 有冷氣但唔算太涼,特別係7:00 pm後滿座就更熱, 所以決定冬天先再來過.(二) 下次再叫豉椒或豉汁菜式, 記得要叫佢加豆豉!…查看更多