媽咪雞蛋仔 (已結業)

今日蛇王行過,發現媽咪雞蛋仔門面靚左好多,突然有d 想食,見到有伯爵茶味,幾得意喎,但要等佢即整,都要等一陣喎,咁蛇王蛇太耐唔好架嘛,咪返去鋪頭先,點知有friend打黎話係附近,咪叫佢幫我買囉,黎到,見到個袋,嘩,乜家陣雞蛋仔都靚到咁呀?手抽立體卡紙袋,有埋透氣窿窿,拎得方便又唔會揸到個雞蛋仔扁曬,透氣窿窿又令到雞蛋仔唔會焾曬,好利害既設計,其他我已經好耐好耐冇食過雞蛋仔,一黎就試伯爵茶,唔知會點呢?搣一粒出黎.脆既.聞下,好香伯爵茶味,入口,完全唔甜,外面脆得黎入面綿密,嗯,係好食既,$28一底雞蛋仔,係要花d 心思啦,不過地圖話深水埔媽咪雞蛋仔係良心店,咁唔怪得好食啦.

放假去深水埗行下街，行到攰攰地自然想搵野食醫下肚。呢間可以話想試好耐，但一直無咩機會同時間試小食。印象中以前機緣巧合好似有試過一兩粒，但當時無特別記店名，所以都唔確定係咪呢間。店面環境都幾好認，店名夠大顏色都好鮮明，通常係遠處都好易認到。餐牌都算清晰，通常係個款口味雞蛋仔會附上圖片說明，都幾貼心。伯爵茶雞蛋仔呢款好似唔係長期有嘅款式，同行個位對伯爵茶甜品好似情有獨鍾，所以就叫咗呢款。由於係即點即烘，都需要少少時間，不過係可接受嘅程度，唔算太耐。拎上手熱辣辣，有淡淡伯爵茶香飄出。雞蛋仔外層較厚，但都做到卜卜脆效果。內層尚算軟熟，伯爵茶味真係幾濃郁，咀嚼一陣仲有陣陣餘香係口腔散發。可惜我唔算太着迷伯爵茶味道，有機會想試返原味雞蛋仔，個人認為最簡單同原始嘅食物最體驗到店家手藝。