SoHo极上烧肉新分店 顶级A5和牛+稀少部位 豪华Omakase专人烧肉体验(有片)
2019-03-14

Omakase(厨师发办)系品尝日本料理嘅最高境界,近年喺香港愈嚟愈流行,各位识叹人士一定都好热衷寻找可以满足你味蕾同心灵嘅Omakase。最近,讲究高级黑毛和牛烧肉嘅专门店  YAKINIKU GREAT 喺中环SoHo区开设第2间分店,主打最高级嘅A5和牛Omakase,将日本烧肉推向更高层次!






新店最瞩目嘅卖点,就系有专人帮你烧肉。烧肉专员全部都经日藉老板津川胜治直接指导,作为食客,唔使自己郁手就可以食到火喉恰到好处嘅美味烧肉,专心享受美食。另外,餐厅只选用 BMS (Beef Marbling Standard) 等级10或11嘅和牛,呢类肉属於「赤身(红肉)」,脂肪分布较少,无论系霜降度、红肉比率同肉质等都系最高水平。被评为 BMS 10 以上嘅和牛,成个和牛市场只得8%,而和牛稀少部位如「Misuji(三筋)」、「Shakushi(杓子) 」、「Daisankaku(大三角)」等,就只占成只牛嘅3%,超级矜贵㗎!



3款Omakase套餐入面最高级、最丰富嘅套餐「FULL OMAKASE“KIWAMI「极」”」,包括咗主厨推荐嘅7款特选牛部位,种类多之余品质超佳,一个套餐畀你食尽顶级A5和牛同罕有嘅稀少部位。


FULL OMAKASE“KIWAMI「极」” $880

先嚟一款前菜带你进入和牛世界。呢款Misuji寿司选用从和牛臂部取出嘅霜降肉,系和牛稀少部位之一。薄薄嘅霜降肉刺身口感幼嫩柔软,带淡淡脂肪油香,同饭香相配,做成寿司味道一流。



前菜过後,当日师傅选择 Yaki Sashi (焼き刺し)同Fillet (特选ヒレ)作为第一碟烧肉。一薄一厚嘅盐烧牛肉畀食客一开始先品尝入口即融嘅霜降肉,然後再享受柔软而且肉汁丰富嘅厚切赤身肉,为Omakase套餐打响头炮。





第二碟烧肉系2款汁烧肉,分别系店中人气No.1嘅霜降肉Misuji同稀少部位Daisankaku。烧过嘅Misuji肉片入口即融,淡淡肉味同油脂香蔓延口腔之中。而Daisankaku虽然系赤身肉,但佢带有适度油花,湿润多汁,食落同Misuji相似,但肉味更浓郁,更有嚼口。呢两款肉配合以苹果汁同麻油特制嘅烧肉酱油,味道非常有层次感,肉味、油香同果味香甜相互混合,感觉新鲜。




跟住落嚟就到厚厚嘅Misuji Briand(ミスジブリアン)。呢块咁有厚度嘅Misuji Briand,唔好睇佢大大块,佢其实系从Uwa Misuji(うあみすじ)旁精心取出嘅超少量赤身肉部位,食落同Fillet相似,但湿润度更高,肉质非常软嫩,超级稀有。不过套餐食到一半,感觉有少少油腻,好彩呢款肉系配合加入木鱼碎同醋嘅特制木鱼酸汁食用,微酸酱汁有refresh作用,清除油腻感。





食完厚切赤身肉Misuji Briand,就到盐烧薄切Tougarashi(とうがらし)。呢款肉同Misuji、Daisankaku一样都系喺牛嘅前臂取出,但佢带有适度肉感,味道较清新唔油腻,较有口感。呢款烧肉会配上木鱼汤一齐食用,食完肉後再饮用带有牛肉汁嘅木鱼汤,可以从另一个角度品尝和牛嘅所有精华。




最後就到呢碟超吸睛嘅Chateaubriand(シヤトーブリアン)。Chateaubriand系Fillet最中心、最厚、最高级嘅部份,系成只和牛最柔软嘅极上之肉!呢个咁高级嘅部位烧熟後放上白饭,面头放上新鲜北海道海胆,再淋上以牛油、蒜头同酱油煮成嘅热汁,最後洒上葱,就成为一碗望见都流晒口水嘅极上北海道海胆Chateaubriand饭。顶端堆成小山丘嘅北海道海胆味道超级鲜甜,配上极香嫩嘅Chateaubriand,再加上牛油蒜头酱油令两者味道更浓郁。





另外,主厨木村康洋先生为新店研发咗一个启发自涮涮锅(Shabu Shabu)嘅烧肉新食法-「KIMURA YAKI 2」。「KIMURA YAKI 2」以木村康洋先生嘅名命名,西冷上洒上糖,再喺烧肉嗰阵淋上特制酱汁,令肉喺烧烤过程快速吸收酱汁味道,最後沾上打发好嘅生蛋汁。呢个食法令西冷肉带有甜味,幼滑蛋汁令烧肉亦有满满蛋香。不过西冷肉味较浓,油脂较多,啖口味嘅朋友或者会比较锺意Misuji。




烧肉当然离唔开美酒,餐厅提供多款酒类,包括清酒、烧酒、梅酒、威士忌、啤酒等。当中清酒大信州比较辛口,配合烧肉一流;惣誉就芳香啲,可以昇华烧肉浓郁肉味。另外,亦有提供5款红、白酒,全部都系日式酒吧「Nocturn」嘅重点推介,同顶级和牛烧肉好夹啊!




YAKINIKU GREAT SOHO
地址:中环砵甸乍街45号 LOWER H CODE1楼



文、相、片:Kenna
关键字
烧肉
Omakase
厨师发办
A5和牛
和牛
中环
Soho
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
4天前
【2021生日优惠】持续更新!5月食日本直送海鲜送西班牙红/白酒
2021-05-07
带妈妈味游异国!母亲节Brunch六选
2021-04-20
期间限定$1抹茶菠萝包、$3竹炭菠萝油 佐敦新开 2500 尺新派点心小厨
2021-04-30
4月份好评餐厅十强
2021-05-06