Chill住叹Tea!9月份下午茶推介
2021-09-06

虽然话已经过咗暑假,但9月份嘅天气仍然系咁炎热呀,都系留返喺室内叹吓afternoon tea好啲。踏入9月,唔少酒店同餐厅都推出全新嘅下午茶,有卡通主题、亲子tea set同日系下午茶,无论你系想同闺蜜聚会定亲子活动都无问题!


中西美点配精品咖啡 Gallery

想体验贵妇下午茶,尖沙咀呢间酒店餐厅嘅中西fusion下午茶就啱晒你!下午茶以酒店米芝莲餐厅嘅菜式为灵感,咸点方面包括蘑菇慕丝挞、慢煮三文鱼酱拌三文鱼籽及菠菜蓉及叉烧焗餐包;甜品特别推介柚子抹茶蛋糕及青苹果白兰地慕丝,前者集齐柚子清香、抹茶甘苦及蛋糕香甜,层次丰富;後者酒味都几香浓。各款中西点心配以东京精品咖啡品牌Omotesando Koffee嘅咖啡及瑜茶舍嘅茶,绝对系一个难忘嘅体验。

供应时间: 下午2:30-6:00

价钱: 平日每位$308、假日$338


MiFFY主题三层架 Pound & Roll 

怎麽可以吃兔兔!MiFFY CAFÉ限定店正式登陆尖沙咀呢间西餐厅,下午茶必试MiFFY甜点三层架($288/两位用),以MiFFY造型三层架盛载嘅下午茶有6款甜点及特制饮品,包括马卡龙、法国牛油蛋糕、泡芙、24个月巴马火腿同新鲜生果等,超可爱!想食啲咸嘢有呢款MiFFY芝士海鲜杂锦火锅($388/两位用、$768/四位用),食材一样以三层架盛载,杂锦火锅包括大虎虾、日本北海道带子、青口等,配以四重传统芝士,包括瑞士Gruyere、Fontina、Fmmental及意大利Mozzarella,芝士味好浓厚,造型又啱晒相机食先,粉丝mark低啦。

供应日期: 8月28日至11月27日


日系林中鸟舍风格 Sensu 

呢间日系轻食cafe喺荃湾都略有名气,招牌绿野仙踪下午茶备受欢迎!最近餐厅喺沙田新开分店,同样以森系同林中鸟舍风格作主题,仲推出呢个全新青の鹊舍2人下午茶($368),点心以鸟笼造型嘅三层架盛载,加埋木系装潢同蓝绿色乾花陪衬,确系有种置身於森林叹tea嘅感觉~咸点方面几推介明太子蛋酱三文治,明太子味道咸香惹味,仲有酥脆外层加上清新茉莉花杂莓酱既布列塔尼酥饼;甜品必试薰衣草芝士蛋糕,芝士蛋糕带有淡淡薰衣草香气,感觉无咁腻。

订座同时订餐优惠: $276青の鹊舍2人下午茶


童心童趣亲子下午茶 SEVVA

一家大细去叹tea嘅,位於中环太子大厦顶楼嘅餐厅系唔错嘅选择。呢轮佢哋推出童心童趣亲子下午茶,加入唔少趣怪又玩味十足嘅元素,如糖霜小狗、趣致小丑、彩虹糖同熊仔软糖,小朋友一定锺意。另外所有甜咸点都几啱小朋友嘅口味,好似一口免治鸡肉及蛋沙律三文治、迷你黑豚肉肠热狗同芝士通心粉春卷等;甜品就有香蕉芭菲、朱古力花生酱慕斯杯同彩虹啫喱配法式云尼拿奶冻等。而且餐厅位於顶层,环境够开扬,可以喺靓景下享受天伦之乐,绝对系一大享受!温馨提示要早三日预订呀。

价钱: $720


限定Fusion料理下午茶 Say Hi Bar & Dining 

呢间餐厅联乘两大人气本土手工甜品品牌推出Flawless 3.3 日式下午茶,仲有4款招牌咸点,包括餐厅招牌之一嘅创意Fusion小食香煎带子红烧肉,带子煎得香口,将五花肉块以细火炖煮,烩至松软入味,然後再先焗後煎,令五花肉皮脆肉嫩,配埋番茄莎莎酱又无咁油腻。甜品方面Grandma’s Scones嘅英式松饼富牛油味香浓,搭配甘香嘅日本焙茶粉同茶叶以及烟韧带甜嘅台湾麻糬,好有日式风味;而Moono嘅纯素甜品挞,采用日本浓豆乳同白米粉等制成,入口甜而不腻,好清爽!


供应日期: 星期一至四及星期六,下午14:00-17:00

价钱: $198/位、$396/两位



文: Yanica
编:Kar


关键字
下午茶
三层架
打卡
尖沙咀
沙田
中环
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2021生日优惠】持续更新!10月寿星半价叹自助晚餐/免费放题
2021-09-30
【随时更新】零食速报 每周新款零食、酒品点评
3天前
4间大闸蟹食店集合!米芝莲食府大闸蟹宴+最平$368任食大闸蟹
2021-10-06
9月份好评餐厅十强
2021-10-08
初秋甜蜜蜜!10月份下午茶提案
2021-10-07