5间睇演唱会前医肚餐厅推介 - 九展篇
2021-07-21

除咗红馆外,九展都系开show热门场地, 好似人气天团mirror两个月前先啱啱开完~嚟紧仲会有林奕匡、赵学而、天堂鸟同万众期待嘅锺培生x林作之战都会喺九展举行!咁精彩嘅活动当然要食饱先去睇喇,一齐睇下附近有咩医肚好选择!(传送门:红馆篇按此)


18年历史街坊米线 肥仔云南小锅米线

呢间有18年历史嘅街坊米线本身位於荃湾,早前因为加租被迫结业後,最近已经喺九龙湾另觅新址重开喇!一重新开业已经受米线关注组热捧兼且立即成为区内热门食店,必试有招牌小锅米线或红薯粉,有酸辣同麻辣汤底选择,浓味得嚟带少少甜味,唔会太油,米线都爽滑弹牙~提一提大家微辣都已经几辣下,所以第一次食唔好叫太辣呀。配料方面腩肉、索汤嘅螺旋藻及鸡丝都唔错。小食方面选择都几多,如炭烧猪颈肉、蒜泥白肉及麻辣猪耳等等,米线控ready!系就系要行远少少,但一场入开九龙湾就试下啦~ 

同九展距离: 步行约22分钟

图: pinkyyywongggMammi Cheng


浓郁番茄汤面 蕃茄仔

铜锣湾开过嚟嘅人气面店,番茄浓汤每日新鲜熬制,汤底浓厚杰身,食得出粒粒番茄蓉。配料方面超过十款选择,好牛人士可以试下特级牛魔王,一份有齐牛肩胛、和牛𦟌、和牛肉丸同牛骨髓,绝对满足到牛魔王。其他配料如烤厚鳗鱼香甜惹味、有鱼油香。炭烤风味鸡扒都好有惊喜,面底就有上海面、刀削面同稻庭乌冬拣,想食特别啲可以拣葛丝及米制通粉拌樱花虾!最後加上嘅炸乾葱更令成碗面生色不少。

同九展距离: 步行约12分钟

图: Foodjiwara_or


日本过江龙 Hoi Hoi Pancake House

被称为「名古屋No.1行列店」嘅日本过江龙pancake店!唔使讲当然主打pancake喇,分别有夏威夷班戟同梳乎厘班戟,前者选用当地面粉厂特意为HoiHoi调制嘅面粉,松软带烟韧感,後者就偏松软,有啲空气感,蛋味就一样咁香浓。不得不试系最近先出嘅班戟汉堡,可配咸香嘅芝士、牛油果同虾肉,甜咸滋味令人愈食愈开胃~虽然餐厅主打甜品但咸点都值得一试,秘制慢煮汉堡扒配手造面包嘅汉堡扒由人手搓成3cm厚,再以密封式半蒸焗型式煮至全熟,肉质柔软juicy。

同九展距离: 步行约10分钟

图: xmelissalamxvanessafoodiary


田园风咖啡店 INN - I’m Not Nothing 

如果想近近地唔行咁远,其实Emax内都有唔少好嘢食~好似呢间白色田园风咖啡店咁,黑白藤编座椅配上白色云石台,同时带点欧陆风格,影相一流!餐厅提供各种沙律、意粉和扒餐,推介芥末籽蜜糖烧猪仔脾意大利饭,烧猪仔脾结实有咬口亦好多肉,意大利饭每一粒米都畀奶油酱汁包裹住,芥末籽中和返奶油嘅油腻感,几出色呀~香蒜辣椒伏特加煮马拉蚬亦系好受欢迎嘅菜式之一,香辣惹味之余带淡淡酒香,亦唔会盖过蚬肉鲜甜。 

图: supertaster


高质鱼生丼专门店 海街丼  

九展内原来都有高质日本菜食!仲有得订定位,咁时间就好预好多啦~ 呢间餐厅同样来自日本,主打各式丼饭。招牌海宝丼分成三个等级,好似杂锦鱼生饭咁已经包含唔同种类鱼生同海产,特上等级嘅就包含赤身、章鱼、玉子、甜虾、鳕场蟹、海胆等。同坊间唔同嘅系鱼生饭内都会加入特制啫喱醋,令成个饭嘅层次感更丰富。唔食生冷嘢都无问题,熟食丼饭都有好多选择,如鹿儿岛A4黑毛和牛丼,和牛满满油花入口即溶,另外仲有豚肉生姜烧丼同鳗鱼丼,点都啱食!

图: SweetYoghurtKaKa522



文: Yanica
编:Kar



关键字
九龙湾
美食
米线
番茄
pancake
日本菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2021生日优惠】持续更新!9月寿星叹Omakase送寿司蛋糕+清酒
2021-08-31
【随时更新】零食速报 每周新款零食、酒品点评
3天前
【特约分享】Happy Hour饮番杯Schweppes®期间限定特饮!9间必去铜锣湾餐厅(上)
2021-08-24
【特约分享】Happy Hour饮番杯Schweppes®期间限定特饮!9间必去铜锣湾餐厅(下)
2021-08-31
自家制作!五间手工意大利面专门店合集
2021-08-24