5间中环打工仔平价食堂
2016-04-13
而家样样都加价,一个杯面8、9蚊,一底鸡蛋仔10几蚊,就连买个包食都差唔多要成10蚊,仲要系食完都唔饱嗰只。普通区仔都系咁,一向贵字行头嘅中环就更加首当其冲,难为一众喺中环返工嘅打工仔,餐餐捱贵饭,闲闲地食个lunch坐底都要五、六十蚊落楼,为咗悭钱,一系就餐餐带饭罗,一系,就睇下呢篇平价食堂推介啦!

南记粉面


Photos by 福如饭堂 & mochachocolatarita

南记出名系穷人恩物,就咁叫碗单并米线廿零蚊,想丰富啲叫碗小窝米线咩料都齐晒,都只不过系30零蚊。韮菜、芽菜、腐皮、肉碎索晒个汤嘅精华,系惹味嘅,当然唔少得加埋呢度嘅招牌春卷啦。虽然条春卷对比旧时,系有啲瘦咗嘅感觉,但依然都系炸到脆脆地,就算浸住汤都唔会咁快变软变腍。加上米线嘅份量都仲系咁多,食晒一碗绝对系会有饱嘅感觉。而且个个都快食快走,要喺午饭时间搵个位都唔系话太难,等多一阵仔就有。

革新会食堂


Photos by 美食焚化炉

如果斋讲大份夹抵食,唔计环境唔计服务,革新会食堂系一个几好嘅选择。佢位於中环一幢旧式大厦里面,每日有6款家常小菜,好似蒸肉饼呀、炒时菜呀、蒸鱼、炆肉、煎鸡扒、炆猪手等等呀咁,任拣两款,40蚊有找。重点系,白饭同汤都系任装呀!抵到一个点!炒菜又够镬气、蒸肉饼啲肉又唔会太肥,配料有时有鱿鱼有时有马蹄,送饭最啱,胃口好嘅肚饿嘅咪装多两碗罗,好似食紧屋企餸咁。自己一个去搭枱又得,一班同事一齐去搵张圆枱坐又得,够晒方便。

沾仔记


Photos by hphbhk1984 & annfung

要喺中环搵平价云吞面食都唔系一件容易嘅事,沾仔记系几符合条件嘅,不过门口就成日都大排长龙,谂住嚟食嘅打工仔要预多少少时间喇。冇计啦,28蚊碗云吞面就有3粒大大粒嘅鲜虾云吞,每粒云吞里面最少有两只又爽口又弹牙嘅虾,抵到咁,系会多少少人㗎喇。如果唔想净食云吞咁斋嘅,可以叫个至尊三宝,三宝一样咁大粒,除咗云吞,仲有多粒拳头咁大嘅鲮鱼球,同埋牛肉,都系咁爽口入味,饮埋个汤呀记住,好有鲜味㗎,唔好嘥。

筷子记


Photos by christy.cheng & SuSu9205

筷子记喺招牌上面已经开宗明义咁写明「澳门平民面食茶档」,以平价做主打,食嘅都系好平民化嘅捞面。除咗平时都有得拣嘅咖喱、沙嗲酱等等拣之外,呢度嘅捞面仲有少少辣嘅沙茶酱拣添呀,咸咸地好惹味,想清啲嘅就可以拣招牌豉油汤底。餸料方面,三餸都不过系30零蚊,有成廿几款可以拣。有选择困难症嘅,谂谂餐厅推介嘅澳门包心卷啦,唔使伤脑筋。澳门包心卷说穿了其实即系用鱼肉包猪肉,食落好有层次同口感。打工仔要喺度填饱个肚,其实唔难。

祖乐比


Photos by Dog Gor & chanelvina

如果唔想餐餐都中餐嘅,都可以去呢间喺干诺道中嘅快餐店,食返个汉堡同炸鸡。同其他快餐店差唔多,都系30零蚊个餐。炸鸡一客两件,分别来自上脾同下脾,炸到金黄色咁但又唔系好油喎,炸粉又唔多,皮簿令佢嘅质感更加松脆,而滑捋捋嘅鸡肉亦带有肉汁,炸鸡嚟讲都算系水准之上。打工仔求快求平求饱肚,呢度都的确系个唔错嘅选择。补充少少,呢间快餐店全香港就得返中环呢间咋,同埋食客大多系菲籍人士嚟。

文:Kar

随时接收最新资讯
赞好OpenRice专页!

关键字
中环
平价食堂
粉面
炸鸡
云吞面
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【当时得令】澳门佑汉区旧式茶记寻滋味
2017-02-02
【编辑推介】筷子基自家工场潮州鱼蛋牛丸
2017-02-16
【编辑推介】全澳历史最悠久的熟食中心
2016-09-29
【编辑推介】三十有找叹水准吉列猪扒饭
2016-10-13
睇七人榄球赛食汉堡 大胃王分分钟免费!
2017-03-28
日本过江龙 120g重超足料和牛汉堡(有片)
2017-05-10
餐厅资料
更多
收起
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
1天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
旺角新开花艺Cafe 丰富全日早餐+明太子猫耳朵+特调有机花茶(有片)
2020-05-18