5月份好评餐厅十强
2022-06-06

每个月嘅报榜,都可以见得到香港人嘅用餐习惯或喜好。近几个月,主要都系靓仔装修嘅café或者唔同类型嘅日本餐厅占据榜内较多嘅位置,今个月都唔例外,锺意四围搵食嘅你哋,又有冇啲系你心水呢。温提一下,而家经OpenRice网上订座,可按出席人数赚取相应嘅Rice Dollars,而赚到嘅Rice Dollars亦可於OpenRice各样服务中当钱使呀!

第10位  合十

 图:alan_lawkh

连续两个月打入十强榜,咁室外嘅帐幕加埋一串串嘅灯海,又真系好有feel 好得人锺意嘅。除咗第一次嚟一定要试嘅名物——巨型猪扒外,好香牛油味嘅牛油香草白酒蚬,同泰式风味嘅冬阴功海鲜扁意粉都值得一试呢,份量多又有特色。

第9位  GRIND SIZE(*新上榜)

 图:cowwpollyng1994

第9位嘅呢间café,纯白装修、乾花装饰,加埋门口大大个「穷」字,全部都系打卡元素。但当然净系得个靓字系唔够啦,食物同样有心思。日式蟹膏‧三文鱼籽‧带子‧明太子手卷粉几过瘾,人手做嘅手卷粉弹牙有质感;蟹肉明太子流心西班牙蛋饼唔系讲笑,流心效果一绝,仲有得拉丝,咸香合宜。就连心太软都特别过人,系柠檬茶口味,酸酸甜甜都几浓味。

第8位  Trois Cafe(*新上榜) 

 图:tiffanylee090507多姐_Dora

分别以粉红色同湖水绿色为主调嘅café,餐牌食物同装修有样咁有惊喜。水牛城辣鸡鎚系推介之一,假如你锺意食辣嘅话,辣得嚟又渗有酸汁,好惹味。上海菜先有嘅小笼包,呢度变咗用蘑菇黑松露汁浸住上,中西合壁但又几夹。

餐饮券:手冲精品咖啡 (指定咖啡豆)+手作卷蛋 (只限湾仔店)
餐饮券:人气粉红咖啡店 意粉配全日经典早餐二人餐 (只限湾仔店)

第7位  AGE Cuisine Express(*新上榜)  

 图:Kimmybbgfoodiecouple_ms

位於太古工厦内嘅餐厅,Pizza做得几出色,蒲烧鳗鱼或秘汁和牛薄饼都试得过,好有惊喜。即叫即整当然够晒热,批边香脆,仲好鬼足料,最正系芝士拉丝嘛。另外推介慢煮半生M6和牛西冷配黑醋,蜜糖芥末酱,肉色粉嫩,仲好鬼多汁添。

第6位  渔舍酸菜鱼(*新上榜) 

 图:carman仔食食食悠悠~~~

酸菜鱼系近年好多人都锺意食嘅嘢,北角嘅街坊舖,主打酸菜鱼,配龙趸又得、配鲈鱼又得,鱼肉都系咁滑,酸酸辣辣好鬼开胃。另有多款四川小炒同样深受欢迎,最重要系价钱亲民呀。

第5位  鮨竜(*新上榜)   

 图:dingbu

每月嘅十强名单内,日本菜式总唔会少。呢间主打厨师发办嘅餐厅,采用日本直运嘅时令食材,寿司、刺身等固然新鲜甜美,迷你丼亦份量十足,一碗集齐吞拿鱼蓉、三文鱼籽同多款切粒刺身,最平嘅厨师发办套餐$500有找。

第4位  一泷(*新上榜)

 图:KathyPunIvywingyanNG

寿喜烧既香且甜,系好多人嘅飞佛。呢度嘅寿喜烧仲可以加埋棉花糖!视觉满足之余,味道当然满分。宫崎牛本身肉质软腍,牛味又够香,加埋棉花糖之後,和牛更会带有鲜甜味。锅内嘅配料例如蒟蒻面同芋丝等更索尽精华。

第3位 面屋神匠(*新上榜) 

 图:PPPUPUhk.eateateat

连续3间都系日本嘢,嚟到第3位则系充满装修富日本风格嘅拉面店,而汤底则主打虾汤。每日限量供应嘅神匠蕃茄虾汤沾面,以日本甜虾、赤虾、虾乾等熬成,口感浓稠,面条挂汁。最特别嘅系仲有配罗勒酱法包片,香草味浓。

第2位 MEMOIR 

 图:L_CYfuukkkar_sharingg

隔咗几个月再度入榜,呢间西餐厅好有主题,连本menu都整到好似本回忆簿咁,又相又画。豆腐牛油果配XO酱呢个配搭几有新鲜感,虽然食落冇乜咬口,两样嘢都滑捋捋嘅,但又出奇地夹同埋香口,加咗XO酱少少辣辣地,过瘾。肉食兽要搵肉食,可选香煎澳洲10oz西冷扒配韩式烧肉汁,大大块扒实满足。

第1位  黑布小巷(*新上榜)

 图:mantung88wingcc

第一位系新上榜嘅台式小店,吐司几出名,嚟到记得食。慢烤鸡腿芝士蛋吐司阵阵咸香,麻辣鬼椒猪扒蛋吐司则够晒刺激,啖啖肉得嚟都辣你一辣。食台湾嘢冇可能唔食芋圆甜品,芋头椰汁三色圆系人气之选,粒粒芋圆都好有嚼劲架。



关键字
十强报榜
十强
十强名单
红磡
观塘
西餐
日本菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2022生日优惠】持续更新!8月寿星叹免费生日蛋糕+串烧放题优惠
2022-07-29
【随时更新】零食速报 每周新款零食、酒品点评
7天前
【随时更新】最後倒数!2022即将结业嘅人气餐厅
2022-07-13
尖沙咀最新露营主题日式烧肉店!3700尺室内Glamping体验
2022-07-25
一年一度!全港4大榴槤放题/自助餐集合
2022-07-13