讲到pho绝对系最代表越南菜嘅其中一种菜式，汤底主要用牛骨熬制而成，配上河粉、牛肉或鸡丝，并佐以生芽菜、香叶、青柠及辣椒一同食用。今次介绍五间喺香港人气嘅越南pho餐厅畀大家，有连续五年获得米芝莲推介嘅名店、旺角区人气牛柳牛丸粉、和牛汤底、创意越南菜馆及越南人主理小店，各有特色。
香浓牛汤油汤底 Brass Spoon
连续五年获得米芝莲推介、位於湾仔月街嘅名店，必试当然系最多人食嘅特级生牛肉河粉，汤底用上过百斤牛骨熬制12小时而成，汤头极之浓郁，同时做到清澈鲜甜，无添加味精，饮晒成碗都唔会口渴。最特别系汤底加咗一层薄薄嘅牛汤油，令汤底牛香味更重，但唔会油。牛肉一碗大约有5-6片，肉质都好嫩滑，呢碗pho绝对令餐厅抵得上米芝莲呢个称号。
图: ctyfoodiary
旺角超人气牛柳牛丸粉 越发地道河内料理
被称为油尖旺区最好食嘅pho，店舖细细，长期都有条人龙喺门口，到底有咩吸引之处？招牌牛柳牛丸粉，汤底鲜味浓郁，配上炸両、青柠同辣椒，建议将炸两浸一浸汤先食，会吸收晒汤底嘅香气。至於配料牛柳同牛丸都系主角，前者有牛味同咬口，都好juicy，同平时坊间食开嘅牛肉片好唔同，牛丸亦非常爽口弹牙。
图: foodiehkboy
和牛药材足料汤底 Spring field 
讲到矜贵一定非呢间主打越式牛肉河嘅餐厅莫属，招牌春园河嘅汤底系用和牛、牛骨、蔬菜，同草果、丁香、八角等药材每日以慢火熬煮16个小时而成。配料就有安格斯牛肉、慢煮牛𦟌条同萝卜，安格斯板腱牛肉片口感嫩滑，牛𦟌条先用和牛汤慢煮再切条煨煮，好入味而且肉味香浓。萝卜粒同样出色，清甜软腍带牛汤底香气～
图: 创意越南菜馆 pho.dle.bar 
主打创新嘅越南菜馆，佢哋嘅pho汤底以多种香料熬制6小时以上而成，味道香浓，配料推介美国安格斯生牛肋片，油脂均匀，半熟粉嫩，肉香都好突出！另外仲有牛腱、美国生牛肉同鸡丝扎肉等选择。幼河粉好滑，挂汤度十足，一入口系满满牛香。
图: keithkkku
南越特色煮法 Xi Xup
大围特色越南小店，招牌生牛牛丸牛腩河粉，餐厅采用南越煮法，汤底会落椰糖调味，味道清甜，饮晒都唔会觉得太咸。牛肉片嫩滑，牛丸都好重牛味同弹牙。如果锺意牛香嘅，特别推荐大家加招牌牛骨髓，牛脂味好香浓，口感有啲似肥膏，但唔锺意肥膏嘅朋友就未必啱啦～
图: RheaChim
文: Yanica
