天氣凍嘅時候，有咩開心得過食碗熱辣辣嘅湯麵呢～煙煙韌韌嘅刀削麵係一個唔錯嘅選擇，今期搜羅咗幾間畀大家，睇吓邊間啱你心水？
地道韓國刀削麵 自家製韓國刀削麵
圖：最近新開，好有韓國家庭風味嘅刀削麵餐廳～餐單選擇唔算好多，人氣花蛤刀削麵大大份，性價比好高，湯底清淡帶有花蛤鮮味；麵質煙靭爽口，食得出麵粉香。而骨湯刀削麵湯底就香濃啲，重牛味，配埋泡菜食好夾呀；另有鰻魚刀削麵、辣拌刀削麵等選擇。佢哋嘅韓式餃子都值得一試，有大豬肉餃子同泡菜餃子，兩款都好足料。
麻辣牛筋腩刀削麵 刕舙馫麵館
圖：愛辣人士留意！呢間位於紅磡嘅麵館小店，主打麻辣刀削麵同麻辣小菜，刀削麵係人手製作，有嚼勁又滑身，而且重好有掛湯力。推介麻辣牛筋腩刀削麵，自家製麻辣醬香口惹味，麵條有咬口，而牛筋腩就炆得軟腍入味。配料方面有好多唔同選擇，如口水雞、金沙骨、安格斯牛肋條都好出色㗎。至於唔食辣嘅朋友唔使擔心，可以揀小辣或者走辣！
親民價藥膳刀削麵小店 藥膳刀削麵
圖：價錢好經濟嘅刀削麵小店，喺中環區嚟講真係好難得～餐廳每日搓新鮮麵糰製作刀削麵，煙韌又滑溜，配上由六、七種藥材熬煮而成嘅藥膳湯底，香濃得嚟藥膳味恰到好處。而藥膳以外重有番茄、清湯、沙嗲同酸辣等口味。配料推介麻辣口水雞同馬蹄獅子頭，前者嘅辣油係自家炒製，香氣好突出；後者充滿肉汁，有馬蹄粒粒增加口感。
花雕醉雞刀削麵 陞記刀削麵
圖：位於深水埗區嘅抵食小店，麵同餸料都好大份量，難怪午市時間咁多人食啦！花雕醉雞刀削麵係用雞髀位，雞油味香濃，肉質飽滿，有口感又嫩滑，酒味啱啱好，麵質煙靭彈牙。想惹味啲可以食口水雞同麻辣雞；過橋刀削麵都唔錯，有手撕雞、豬肚同各款丸類等，啱晒有選擇困難症嘅朋友。另外有熱拌、冷拌刀削麵可以揀，冷拌麵質就更爽彈～
文：Yanica
編：Cathy
