12月份好评餐厅十强
2021-01-05

晚巿堂食由12月10号起就开始被禁,一直禁到而家都未开得返,餐厅除咗开早啲,同转型做外卖之外,都别无他法啊。喺艰难中,真系要靠质素先至可以留得住客啊。呢十间上榜餐厅都各有杀手鐧呢。

第10位  烧肉臻(*新上榜)   

 图:Jennie.wstarrychow

日式烧肉店一向深受港人欢迎,今个月十强入面就占咗两个席位。呢间位於尖沙咀,有专人协助烧肉,店舖内亦设有自家熟成柜,供应低温熟成牛肉。识拣一定拣牛三角,油花平均,油香重仲带甘甜。食得烧肉梗系想搵啲酒送送佢,呢度有自助清酒售卖机,有成18款清酒选择,绝对系推送佢哋入十强嘅原因之一呀。

第9位  蜀客(*新上榜)  

 图:车妈妈焦啤梨

冬天总系会想食下辣嘢,呢间主打正宗川菜嘅餐厅,碟碟都又麻又辣,但辣得有层次。好似鲜椒海鲜汇咁,有带子有虾有八爪鱼等等,酱汁麻辣得嚟又带酸,将海鲜嘅鲜味吊晒出嚟。酸菜桂鱼亦唔可以睇少,鱼肉鲜甜,但辣劲十足,辣椒仔女就最开心。

餐饮券:5折 正宗川菜套餐 (两位用) (只限堂食)

第8位  Fifth Element Shokudo(*新上榜)    

 图:Helenbobo39JasonMichelin

装修简约,水泥墙工业风嘅日式西餐厅,有多款丼饭供应,例如黑毛和牛牛扒丼,薄切粉嫩嘅和牛就铺满晒成个饭面,加多只弹下弹下嘅青森温泉玉子,当然吸引。牛肉半熟,肉汁juicy。呢度嘅pizza亦相当有特色,加入味噌制作,味道香浓,芝士控就要试五芝士要素味噌薄饼喇,咸香突出。

第7位  WM Café & Bar(*新上榜)     

 图:慕容有儿cyrus1818

有冇人同开饭仔一样好锺意坐露天座?除咗唞啖气都爽啲之外,重点系有靓景呀。望住蓝天同海景,再加埋青马大桥又真系心情都舒畅啲。农夫包而家唔多地方搵到喇,嚟到可以试下,即叫即做,外层脆卜卜,入面热辣辣,配咩馅都有风味。

第6位  My Ahjussi  

 图:leetszhinxmelissalamx

上个月榜首嘅大角咀韩系咖啡店,今个月稍稍回落。炸鸡够脆口,系好多人嘅飞佛,呢度选用欧洲原只烧春鸡连骨炸,滑得嚟仲会留返多啲肉汁,港式咸蛋黄味就最香口,想要新鲜感可以试下卡邦尼炸鸡。

第5位  阿木台湾面 (*新上榜)   

 图:小李16求求其其食一餐

呢间主打台湾牛肉面嘅小店,长期人气高企,过往曾多次入围十强榜,今次上榜嘅则系喺同区开设嘅新分店。不过并冇分薄到人流,依然要排队等食。红烧牛肉牛筋面系必食嘅,汤底浓厚,牛肉份量十足,仲要劲厚身,厚得嚟又腍喎但系,肉味又香,推介。

第4位  KOKO Coffee Roaster

 图:Cykmanhianna_banana

再度上榜嘅自家烘焙咖啡店,啡迷去到当然要慢慢叹咖啡。嚟自Ethiopia嘅咖啡豆带有酸酸der果香,余韵强烈。另外推介牛油果大啡菇菠菜汉堡,几款睇落冇乜关系嘅素菜放埋一齐又几有化学作用,散发出各自嘅香甜,口感丰富。

第3位  享慢煮泰(*新上榜) 

 图:littlefoodie00Chumug16

主打泰式fusion菜嘅餐厅,最出名都系佢哋嘅牛角包,尤其系将热汤注入去嘅牛角包,好似冬荫功龙虾汤牛角包咁,一切开啲汤汁就流晒出嚟,视觉效果一流,酸辣香甜嘅味道都有啲,够晒香口。另外推介真空慢煮法式焦糖炖蛋,口感creamy,食食下仲有啲甜甜嘅菠萝蓉添。

第2位 烧鬼(*新上榜)    

 图:sleepbeautyfoodiecouple_ms

呢间以日本鬼怪为主题日式烧肉店,成功以高质和牛烧肉放题吸引到大家嘅欢心。除咗多款牛、猪、鸡肉同海鲜等可以任食外,仲会附送嚟自鹿儿岛同宫崎嘅A4和牛拼盘,连罕见嘅牛腹胁肉都有得食呢,牛魔王有口福。自家制酱汁亦有特色,包括苹果柚子红酒烧汁、辣味噌酱同葱油酱。

订座优惠:指定时段,第二位可享有原价6折优惠

第1位  Mamaday Studio(*新上榜)    

 图:yuehw_fishfoodxgoodwest_hk

大家对呢间餐厅一定唔会陌生,佢哋嘅尖沙咀店同铜锣湾店亦曾多次上榜,今次终於轮到佐敦呢间啦。两层楼高,室内室外都可以坐,打卡位多,仲有猫店长添。全部都系最受港人欢迎嘅café元素,难怪登到首位啦。留意返呢间café只系提供咖啡、餐饮同轻食,推介佢哋嘅bagel,外层酥脆,内里烟韧,洋葱蓝莓嘅配搭亦够特别。73.5%朱古力亦值得一试,口感超厚啊。

文:Kar

关键字
十强
报榜
十强名单
佐敦
铜锣湾
西环
烧肉
cafe
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2020回顾】海外超人气过江龙抵港一览
2020-12-28
西营盘新开台式Cafe 推介即煎铁板吐司/芋圆仙草/黑糖奶盖茶
2020-12-28
12月份好评餐厅十强
2021-01-05
【牛年新春】盆满砵满 早鸟优惠盆菜推介
3天前
观塘海滨旁新开Cafe 必试「2019」咖啡+Tiramisu窝夫
5天前