11月份好评餐厅十强
2020-12-03

疫情反反覆覆,对餐饮业影响都几大,少咗人出街食饭,餐厅内用餐嘅人数又有限制,生意难做啊。而喺呢个时势,出街食饭都变得唔容易,就更加要拣啲好餐厅食饭。以下呢十间,就系11月内获得大众宠幸嘅餐厅啦。

第10位  你你

 图:FavouriteFoodLifehyehyeon

连续两个月上榜嘅荃湾小店,主打创意新派台湾菜,例如有珍珠鲁肉饭同珍珠奶茶手作吐司咁,对於吸引一众台湾迷同珍珠控系有一手。多款厚厚嘅三文治,好有台湾感觉,推介芋见紫薯吐司呀,一深一浅嘅紫色夹埋一齐,份外治癒。仲有大家最爱嘅仙草芋圆甜品,算系解一解大家对台湾嘅念挂。

第9位 椰粉汤红(*新上榜)  

 图:Ashleyyy_Hbbkok

呢间小店主打炖汤,另外亦有首创嘅竹丝海南鸡椰香饭,又滋润又有新鲜感,难怪咁受欢迎。竹丝海南鸡椰香饭用椰浆同鸡油煲出嚟,啖啖都有椰香,竹丝鸡肉爽口实净。汤品有多款选择,亦可叫套餐跟杯食疗拿杯汤,好似茶树菇香菇淮山汤、虫草花杞子炖鸡汤等,呢排冻咗,饮多啖暖汤好重要。

第8位  甜姨姨私房甜品(*新上榜) 


图:foodiechansfoodxgoodwest_hk

呢间甜品屋新开冇耐已经迅速打入十大,一啲都唔意外,话晒佢哋本店喺天后做咗成14年,一直深得民心。嚟到铜锣湾嘅新店,仲推出首创刨冰系列,梗系吸引。刨冰味道创新又贴地,好似酱爆奶酱脆多味、杨枝甘露味等,就算冻都要冻住食啊。

第7位  LOST STARS LIVEHOUSE BAR & EATERY(*新上榜) 

 图:ericalo12猫猪猪

位於大角咀嘅西餐厅,虽然现场音乐表演呢排要暂停一阵,但仍然靠住高质素嘅食物俘虏食客嘅心。威灵顿牛柳外层酥脆,口感丰富、肉味浓郁又juicy,当然推介。另外可以试下埃及风沙单骨棒棒鸡,外脆内嫩,酸酸辣辣嘅清迈辣酱仲系自家制嘅添。

第6位  Wingman        

 图:chowkayiFANKANA

隔咗几个月再度上榜嘅鸡翼专门店,超过10款口味选择,每款都会腌过夜之後放暖水慢煮一个钟,去到半生熟嘅状态先拎去炸同调味,功夫多但就可以保证只只都皮脆多汁。黑芝麻蜂蜜海鲜、咖啡、死神酱同新加坡辣蟹味等等都有,绝对满足到鸡翼控。

餐饮券:任饮任食放题 包12款鸡翼及4款小食(限时90分钟)

第5位  云寿司(*新上榜) 

 图:比卡比兽food_enthusiasthk

今年多咗唔少Omakase嘅餐厅跑出,可能系因为大家都冇得飞日本但又好挂住日本美食啦~ 而呢间嘅Omakase算系几亲民,lunchtime嘅话唔使$400都食到。寿司同刺身款式都好新鲜。就算唔拣Omakase,呢度都仲有多款刺身丼饭供应呢。

第4位  原作养生汤米线(*新上榜)

 图:purple_hyacinthusvenus_so

呢间米线小店同一般嘅米线舖唔同,佢哋特别注重汤底,有成14款汤底选择,仲要系用新鲜食材熬8个钟制作嘅靓汤,好似虫草花胶鸡呀椰子鸡呀都有。佢哋嘅米线亦都相当有特色,例如椰子鸡汤米线仲会加埋桃胶落去,啖啖清甜;招牌海龙皇仲有半边龙虾喺度,汤底鲜甜浓郁,食碗米线都好似高级咗咁。

第3位  Aurora Fusion Restaurant(*新上榜)

 图:Tiffcws

由沙田石门开到嚟尖沙咀嘅呢间餐厅,最特别就系望落似酒吧,入到去揭开menu就发现日本嘢又有,西餐又有,无限fusion。先讲日本嘢,有寿司师傅驻场手握寿司同切割刺身架,款款新鲜甜美;西餐就推介脆卜卜乳猪同油浸黄鸡配普罗旺斯烩菜。咩都有得食,同朋友食饭就唔使就住就住,可以各取所需咯。

第2位  渌鼎记     

 图:Tinydeskellatam

凭住咩都有得食嘅吸引力,渌鼎记成功进占第二位。打边炉佢又有,鸡煲佢又有,甚至连酸菜鱼同刺身、海鲜佢都有,任食得嚟仲可以冇限时,咁抵食梗系得人锺意啦。酸菜鱼大大盘,酸、麻、辣、香都有,仲好足料,夹极都有鱼片。

第1位  My Ahjussi(*新上榜) 

 图:yantung117。丰衣足食。

又系大角咀嘅餐厅,证明大角咀真系有好多好嘢食,大大们要搵食以後识路啦?呢间韩系咖啡店,靓就梗架喇,成幢墙都系花花,最啱打卡。但食物水准一样有保证,食开嘅卡邦尼意粉,加埋泡菜落去,多咗重辣香反而可以中和到creamy嘅腻感,几有惊喜。


文:Kar


关键字
十强
十强报榜
十强名单
大角咀
观塘
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
3天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
3天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
6天前