唔少人去大阪都会去食串扬,最近尖沙咀就开咗间关西风串扬专门店,八成材料由日本新鲜直送,即点即炸。口味配搭有新意之余,加上自家制酱汁好有去咗大阪咁嘅感觉。呢个5月仲有新张优惠:$1串指定串扬!
鲱鱼子昆布($58/串)配自家制酱汁
Mo Mo Kushiage位於尖沙咀厚福街,由有超过10年日本料理经验嘅总厨忠师傅主理,主打串扬,即系日式串炸,亦系日本关西地区嘅平民美食之一。新店嘅关西风串扬有肉类、海鲜、时令蔬菜等选择,而自家制酱汁就用咗红酒、果醋等调配而成,微酸解腻。由於疫情关系,酱汁会以每人一份形式上枱。
日本年糕、虾饼三文鱼子、男爵马铃薯、青森蒜头、芦笋、日本蚝、半熟玉子、芝士火腿(优惠期间可以$1追加/串*)
想试嘅话唔好错过新张优惠:凭堂食任何消费,即享优惠价$1/串追加以上八款指定串扬!所有串扬都系即点即炸,全靠师傅功力控制唔同食材炸嘅温度同时间,炸出金黄薄脆嘅炸衣,香口同时又食得出食材本身嘅鲜味。
虾饼三文鱼子($48/串)
必点招牌串扬系呢份虾饼三文鱼子,手打虾饼选用白虾同甜虾蓉,炸好後加上自家制他他酱同三文鱼子。虾饼本身相当鲜甜爽口,再加三文鱼子鲜味十足。他他酱解腻同时增加味道层次。另一推介系鲱鱼子昆布($58/串),鱼子用昆布腌制以去腥,炸过後外层酥脆,里面有一粒粒鱼子爆开嘅脆卜卜口感,咸鲜味突出。
豚肉卷(红姜、芝士、葱、莓酱)($42/串)
师傅喺食材同酱汁配搭都落咗唔少心机,好似豚肉卷就有四款唔同口味。红姜味道酸爽,莓酱酸甜清爽,葱嘅微辛同样解腻,芝士炸至半融增加香气。豚肉就同样柔嫩,而且仲保留到肉汁。
炸矶煮鲍鱼($98 /串)、法国鹌鹑髀肉、法国血鸽髀肉(各$58/串)、炸豚踭($42 /串)
海鲜串扬亦相当出色,鲍鱼鲜嫩弹牙,炸成串扬增加香脆口感同时亦食得出矶煮鲍鱼嘅浓郁鲜味。饱满多汁嘅日本蚝($48/串)同样值得一试。肉类方面亦有坊间少见嘅选择,好似法国血鸽同豚踭,前者肉质鲜嫩後者较为软腍。
更多【新店直击】: |
关东煮($118/5款)
关东煮亦采用关东做法,以白酱油代替一般酱油,再加清酒、味醂等制作高汤,汤汁更清澈淡雅、温润鲜甜,衬托出食材风味。关东煮有男爵马铃薯、年糕福袋、鱼板、豆腐、鹌鹑蛋、玉子、日本萝卜等煮物选择。男爵马铃薯松软绵密,年糕福袋口感烟韧。
茶渍饭(明太子)($58)
日式居酒屋常见嘅茶渍饭呢度都有,清爽嘅高汤,加上辛辣咸香并重嘅明太子同增加鲜味嘅紫菜丝,最後食返碗就最满足。
自家酿制果酒($68/杯)
食串扬又点少得酒?餐厅供应多款自家酿制果酒,开饭仔拍摄当日就有红石榴、凤梨、咖啡、梅酒等选择,果味自然香浓,令25%酒精浓度嘅烧酎变得更易入口。
Mo Mo Kushiage
地址:尖沙咀厚福街12-12A号蓝马商业大厦21楼
*$1串扬新张优惠只限2021年5月1日至5月31日,每人每次只限加购2串
文、相:Cathy