位於尖沙咀區嘅酒店餐廳仲要睇到維港靚景嘅就一定係離地？未必，呢間酒店新開嘅西餐廳就以西班牙式美食市集靈感，有六個美食專櫃全日供應多元化美食。平均水準唔錯之餘定價亦合理，Bookmark定慶祝紀念日最啱！
Bayfare Social位於香港瑰麗酒店五樓，靈感嚟自西班牙同名嘅美食市集，客人可以睇Menu，或者親身到六個美食專櫃：海鮮吧、西式美食櫃、西班牙小食吧、粉麵吧、雞尾酒吧，同咖啡甜品站慢慢挑選美食。
Tuna Tartare（$125）
海鮮選擇眾多，呢份吞拿魚他他有幼滑牛油果蓉配搭藍鰭吞拿魚粒，上面再加小蘿蔔片同輕烤過嘅牛油果片點綴，味道層次豐富。
Kale Salad（$70）
沙律分量十足而且配搭豐富，例如羽衣甘藍沙律就集合羽衣甘藍、椰菜苗、牛油果、乳清芝士、開心果碎同炭烤過嘅長柄西蘭花。
Baby Squid（$140）
西班牙小食吧有多款熱Tapas選擇，私心推介呢份炒魷魚仔，用本地魷魚仔配搭西班牙迷你青椒，微辣刺激而唔嗆喉，魷魚肉質彈牙唔韌。重點係匿埋喺魷魚下面嘅煎農場雞蛋，篤穿蛋黃撈埋一齊食最香口！
Prawn（$105）
飲返兩杯嘅話唔可以錯過嘅送酒Tapas一定係蒜香蝦，餐廳選用本地大蝦，配上加入蒜頭同辣椒嘅橄欖油。上枱嘅時候依然不斷冒出泡泡，離遠都聞到香氣呀。
Braised Short Ribs（$120）
用自家製嘅XO醬烤牛肋骨，肉質鬆化而且夠晒入味，伴以炭烤過嘅長柄西蘭花。
Tomato Flat Bread（$80）
可以分成一份份嘅Flat Bread亦好啱開心Share，經典蕃茄、Parmesan芝士、羅勒，同橄欖油嘅組合，香而唔膩，Juicy蕃茄仲相當醒胃。
更多【新店直擊】： |
Seafood Paella（$220）
提到西班牙菜唔少得香港人最熟悉嘅西班牙海鮮飯，由西班牙總廚Álvaro Ramos主理嘅西班牙海鮮飯口味正宗，海鮮湯以龍蝦同蝦頭熬製，煮成海鮮飯配以時令海鮮、番紅花，同畫龍點睛嘅蒜香蛋黃醬。
Dan Dan Noodles（$85）
粉麵吧同時供應意大利粉同亞洲麵食，拉麵由師傅自家製，食客可以隔住玻璃窗睇到拉麵過程。擔擔麵湯底用花生醬、麻油、辣椒醬同香醋調味，辣中帶香，配以豬肉及牛肉碎。
Banana Split（$70）
雖然小食同主食都有唔少選擇，但大家記得留肚食餐廳嘅自家製Gelato同雪芭啊！每日供應八款唔同時令口味，$35/球。一班朋友唔介意Share食一定要點呢份香蕉船，可以揀三球Gelato或者雪芭，仲有香蕉、朱古力、棉花糖、忌廉等配料，係咪更抵食先？
Cheese Cake（$50）
蛋糕亦有水準，芝士蛋糕口感柔滑，有淡淡芝士香但完全唔膩，再加上酸酸甜甜嘅藍莓醬，對各位甜品胃特大嘅女孩子嚟講輕輕鬆鬆就食完一份啦。
西式美食櫃供應多款沙律、三文治、冷肉、芝士等美食
西班牙小食吧每日12:00及18:00會製作超大型Paella
Bayfare Social
地址：尖沙咀梳士巴利道18號香港瑰麗酒店5樓
文：Cathy
相、片: Tom Li