呢排碌IG，发现好似愈嚟愈多好「色」之徒，明嘅，食「色」性也呀嘛！唔好误会，我全部都系讲颜色个色，讲啲嘢食有好多颜色呀，即系例如天蓝色汉堡包呀、绿色汤底拉面呀咁，颜值超高！其中，喺荃湾就已经至少有5间餐厅有呢啲色系嘢食喇！
Tiffany Blue 爆芝汉堡 Burger Jobs
呢间汉堡店开咗两个月左右，最signature嘅一定系Tiffany Blue 爆芝流心鷄排汉堡！只tiffany blue真系好靓，唔系用色素整㗎，只系加咗蝶豆花。而味道就同普通汉堡一样，冇咩特别，不过包嘅边边几脆。呢个汉堡仲有另一个重点，就系长到突晒出嚟嘅炸鸡扒，芝心㗎，仲要系爆芝嗰只，咬一啖即刻流晒啲芝士出嚟，邪恶到我都唔识讲。
彩虹拉芝吐司 卡洛芝士吐司专门店
呢间吐司店，喺正上面间汉堡店隔篱，有好多款唔同嘅吐司卖嘅，朱古力呀榴槤呀……色系主角就一定系彩虹芝士吐司。理论上系由4只唔同色唔同味嘅芝士合成嘅，红黄蓝绿分别系蕃茄味、普通味、薰衣草味同绿茶味，扁扁地嘅吐司即叫即做，热辣辣拎上手都做到拉芝嘅效果，系几靓嘅。之但系是咪可以齐晒4只色，就睇彩数喇。同埋，嗰4只唔同味其实都几淡，想食得晒4只味可能要加多少少想像力。
青bb拉面 豚道乐
平时嘅拉面汤底要有色，最多咪一系黑蒜嘅黑，一系辣到喷火嘅红，但呢间舖有只青bb嘅汤底呀，系wasabi味呀！好特别㗎呢~ 要有吃辣呛鼻嘅感觉先好食喎，初头嗰几啖，可能未必觉得咁劲嘅，但食下食下，搅下搅下，啲wasabi味就会开始渗出，当你唔小心食到啲wasabi粉嗰阵就恭喜你喇！你终於食到佢嘅精髓！唔止视觉刺激，连味觉都刺激埋一份呀~ 不过个汤底唔系净得wasabi嘅，仲有芝士呀原来，所以系几香嘅。
七色彩虹蛋糕 冰雪公主
图：呢间韩式甜品店绝对可以话系外貌协会嘅会员，样样甜品个样都好吸引，特别系呢件彩虹蛋糕，真系渐变咁数得齐晒彩虹七色，好鬼靓。一层一层唔同色嘅班戟夹住香滑嘅忌廉叠埋一齐嘅，椰子味系几香嘅，但略嫌重咗少少，成件cake都偏甜。
彩虹latte 荳子
介绍咗几款色系嘢食，终於轮到嘢饮出场！呢间甜品店有杯彩虹latte呀！好靓㗎！啲拉花图案杯杯唔同，但全部都系七彩缤纷，系用食用颜料拉出嚟嘅放心。堂食定外卖都有，女生见到会变晒心心眼！
文：Kar
荃湾仲有咩好食：
【一个人开饭】一个人喺荃湾食乜好？
荃湾偷闲Cafe精选
随时接收最新资讯
赞好OpenRice专页！
