呢排碌IG，發現好似愈嚟愈多好「色」之徒，明嘅，食「色」性也呀嘛！唔好誤會，我全部都係講顏色個色，講啲嘢食有好多顏色呀，即係例如天藍色漢堡包呀、綠色湯底拉麵呀咁，顏值超高！其中，喺荃灣就已經至少有5間餐廳有呢啲色系嘢食喇！
Tiffany Blue 爆芝漢堡 Burger Jobs
呢間漢堡店開咗兩個月左右，最signature嘅一定係Tiffany Blue 爆芝流心鷄排漢堡！隻tiffany blue真係好靚，唔係用色素整㗎，只係加咗蝶豆花。而味道就同普通漢堡一樣，冇咩特別，不過包嘅邊邊幾脆。呢個漢堡仲有另一個重點，就係長到突晒出嚟嘅炸雞扒，芝心㗎，仲要係爆芝嗰隻，咬一啖即刻流晒啲芝士出嚟，邪惡到我都唔識講。
彩虹拉芝吐司 卡洛芝士吐司專門店
呢間吐司店，喺正上面間漢堡店隔籬，有好多款唔同嘅吐司賣嘅，朱古力呀榴槤呀……色系主角就一定係彩虹芝士吐司。理論上係由4隻唔同色唔同味嘅芝士合成嘅，紅黃藍綠分別係蕃茄味、普通味、薰衣草味同綠茶味，扁扁地嘅吐司即叫即做，熱辣辣拎上手都做到拉芝嘅效果，係幾靚嘅。之但係是咪可以齊晒4隻色，就睇彩數喇。同埋，嗰4隻唔同味其實都幾淡，想食得晒4隻味可能要加多少少想像力。
青bb拉麵 豚道樂
平時嘅拉麵湯底要有色，最多咪一係黑蒜嘅黑，一係辣到噴火嘅紅，但呢間舖有隻青bb嘅湯底呀，係wasabi味呀！好特別㗎呢~ 要有吃辣嗆鼻嘅感覺先好食喎，初頭嗰幾啖，可能未必覺得咁勁嘅，但食下食下，攪下攪下，啲wasabi味就會開始滲出，當你唔小心食到啲wasabi粉嗰陣就恭喜你喇！你終於食到佢嘅精髓！唔止視覺刺激，連味覺都刺激埋一份呀~ 不過個湯底唔係淨得wasabi嘅，仲有芝士呀原來，所以係幾香嘅。
七色彩虹蛋糕 冰雪公主
圖：呢間韓式甜品店絕對可以話係外貌協會嘅會員，樣樣甜品個樣都好吸引，特別係呢件彩虹蛋糕，真係漸變咁數得齊晒彩虹七色，好鬼靚。一層一層唔同色嘅班戟夾住香滑嘅忌廉疊埋一齊嘅，椰子味係幾香嘅，但略嫌重咗少少，成件cake都偏甜。
彩虹latte 荳子
介紹咗幾款色系嘢食，終於輪到嘢飲出場！呢間甜品店有杯彩虹latte呀！好靚㗎！啲拉花圖案杯杯唔同，但全部都係七彩繽紛，係用食用顏料拉出嚟嘅放心。堂食定外賣都有，女生見到會變晒心心眼！
文：Kar
荃灣仲有咩好食：
【一個人開飯】一個人喺荃灣食乜好？
荃灣偷閒Cafe精選
隨時接收最新資訊
讚好OpenRice專頁！
