除咗人要衣装,餐厅都要靓装,咁样食起饭上嚟先至更加悠闲、享受。心情好,餐饭都特别好食啲。所以而家好多餐厅都花咗好多心思喺装修度,以下介绍嘅呢两间都唔例外,而且,佢哋嘅食物一样咁有心思,尝试咗好多唔同嘅创新配搭,为食客带嚟新鲜感。
L'amour(大埔)
大埔餐厅选择众多,要突围而出,必须要花啲心思。呢间主打法国菜式嘅餐厅,无论环境装修定系食物卖相都富有特色。L'amour喺法文中有爱嘅意思,中庭挂有水晶吊灯,沙发系丝绒质料,坐得人好舒服,饮下嘢倾下偈咁好relax。食物方便,由资深法厨团队带领,创作多款分子料理同经典菜式:
波特酒酿三色蜜瓜、巴马火腿
巴马火腿固之然系绝配,今次主厨仲特别加入波特酒,一粒粒蜜瓜香甜中渗有酒香,配埋咸香嘅火腿都未够,仲有用蜜瓜汁做成嘅鱼子,口感丰富又有新鲜感。而且仲以酒杯盛载住,杯边配多片自家烘乾嘅鲜菠萝片,十足十一样cocktail一样。
法式炖鹅肝
以传统焦糖炖蛋嘅制作方法,用上法国高级忌廉、鸡蛋、熟成芝士等,加入埋鹅肝酱,成件事唔止即刻名贵咗,味道嘅层次都多咗。香滑嘅炖蛋,混和浓郁嘅鹅肝,满满蛋香同油香。就连伴食嘅多士,都砌到成朵玫瑰咁,好鬼靓!
慢煮西班牙黑毛猪鞍配焦糖苹果
西班牙黑毛猪鞍以慢煮嘅方法处理,保留到原有嘅肉汁,够juicy之外,仲令到肉质有爽口弹牙嘅感觉。而伴碟嘅配菜亦都有花过心思制作,切片苹果涂上一层焦糖,本身嘅清甜再有多重香甜嘅感觉。
慢煮八爪鱼墨汁意大利饭
意大利饭本身已经系一样相当考功夫亦花时间嘅菜式,仲要加埋慢煮八爪鱼,呢道菜嘅预备时间最少都要用上12个钟。八爪鱼选用日本刺身嘅级数,慢煮完再以顶级墨鱼汁,配合分子料理嘅技术,变到好似鱼子酱咁样,充满鲜味。意大利饭粒则系自家特制嘅薏米,口感烟韧。
美女与野兽
呢道菜式嘅灵感,嚟自《美女与野兽》内放喺玻璃瓶内嘅玫瑰花。主厨用上豆蓉、天然红菜头粉调成玫瑰红色,再以韩国唧花手法,一块一块花瓣咁做出嚟,好有心机啊。然後更会喺瓶内烟燻法注入气味。上枱时,提提锺意拍片打卡嘅朋友,记得预备定镜头。一打开个瓶嘅一刻,会有「仙气」散发呢。
Missy Ho's (西环)
主打多国Fusion菜嘅呢间餐厅,地理位置非常方便,港铁站一出行两三分钟就到。从装修已经睇得出佢哋fusion嘅路线,中国风嘅感觉但又有西方动画嘅装饰。无论系中、日、泰等各国嘅菜式都可以喺度食到,款款惊喜。不论系同朋友嚟聚会,定系同另一半嚟享受下小日子,都会有种chill chill der 感觉。
Spicy Salmon Dynamite Roll
寿司、卷物配搭创新,好似辣三文鱼炸卷物咁,方方正正,混和咗三文鱼、牛油果、蟹肉、蟹籽、辣味蛋黄酱等,面层仲有层芝士酱,我都唔想用邪恶呢个字去形容,但真系邪恶喎。而且三文鱼肉够厚身,微微辣香更能提吊出鲜味。
Tuna Tataki
吞拿鱼刺身当然好食,不过轻轻烧一烧过又有唔同嘅风味。边边位渗出阵阵焦香,伴随住浓厚嘅肉香,加埋柚子豆瓣酱同墨西哥辣椒等,层次丰富。作为前菜相当醒胃。
Pork Belly Bao
软熟嘅刈包夹住大大嚿嘅五花腩肉,份量十足。啖啖肉香好易腻?唔怕。师傅特地加入多款清爽配菜,好似萝卜、青瓜同蕃茄等,可以中和返腻感。师傅仲低调咁帮紧你,淋上海鲜酱令到整体味道更香浓。
Gyoza Dumplings
煎饺子易煮难精,试一试就试得到师傅深厚嘅功力。一碟八只嘅日式煎饺子,外层煎得香脆,内馅有猪肉、韮菜,仲特地加埋泡菜,酸酸辣辣,丰富咗成只饺子嘅味道。
Miso Black Cod
味噌黑鳕鱼系一道相当惹味嘅菜式,煎烤过嘅黑鳕鱼皮微焦香脆,鱼肉依然香滑细致,而且满满油脂,就咁食当然鲜香,如果点一点埋mayo酱,味道又有所提昇。
心动不如行动!有兴趣就快啲约埋三五知己去叹下美食!快啲bookmark定啦!
*以上图片只供参考,所有食品以实物为准. 食品供应因餐厅而异