曾經喺銅鑼灣開過舖，全球有27間分店嘅人氣沾麵店Tetsu，隔咗兩年，最近終於再度回歸喇！新店選址荃灣驚安の殿堂嘅美食廣場內，繼續以豚骨湯拉麵同沾麵作主打。
銅鑼灣舊店
舊店重開，以前嘅師傅繼續掌舵坐鎮，力保質素同舊時嘅味道一樣。只可惜新開業撞正疫症，日本師傅未能親身到港支持，只可以透過視像進行全天候監督。湯頭全由日本直送，製作麵條嘅麵粉亦嚟自日本，務求令大家即使冇得返鄉下住，都可以食到家鄉嘅味道。
哲盛沾麵 （魚介豚骨高湯） $98
大力推介哲盛沾麵，魚介豚骨高湯底以大量豬骨湯加鰹魚節製成，魚香味濃郁，又唔會過鹹，至於麵條係冷麵底上，煙韌彈牙、帶有麥香，掛湯力強；半熟蛋嘅流心度亦剛剛好，保持返以前嘅水準呀。食完仲可以請舖頭加入柴魚清湯落剩餘嘅湯度飲埋佢呢。不過惟一要挑剔嘅係因為喺foodcourt嘅關係，暫未能夠好似以前咁提供熱石沾麵，令到湯底比較易凍，要食快啲啊。
濃香赤蝦豚骨拉麵 $98
想試拉麵嘅話，濃香赤蝦豚骨拉麵都唔錯，兩隻赤蝦醒神吸睛。以蝦同豚骨熬製嘅湯底，味道香濃鮮甜，蝦味好重，重點係唔會好油膩啊，食完想飲埋啲湯都仲得。麵條方面，以前有直麵、曲麵嘅選擇，而家就冇得揀，全部選用幼身嘅曲麵，盡吸湯底精華。
和風炸餃子 $28、酥炸雞軟骨 $28
BTW，新開業有優惠，4月底前去食都會免費加送半隻溏心蛋呢~
麵屋哲
地址：荃灣大河道100號海之戀商場2樓激安之殿堂美食廣場TW08號舖
文：Kar
相、片：Tom Li