呢間主打麻辣鍋嘅內地過江龍繼上年登陸銅鑼灣後，已經喺屯門開香港第三間分店啦！而且為咗迎接冬天，最近仲推出咗全新三款湯底同配料，就算唔食辣都大把選擇！
毛蟹麵豉鍋 (半鍋$268/全鍋$498)
新湯底就有三款，呢款毛蟹麵豉鍋就偏向日式少少，毛蟹來自日本北海道，湯底吸收埋毛蟹精華，食前記得飲返啖湯，鮮甜味濃，而且湯底仲附有豆腐。毛蟹都多肉鮮甜，同時吸收返淡淡麵豉香氣，味道就無咁單一啦！另外旺角店仲有獨家嘅燒毛蟹食～
酸菜魚鍋(半鍋$198/全鍋$388)
近年都好興食酸菜魚，不過用酸菜魚嚟打邊爐就少見啲啦～魚選用鯇魚，而且師傅淨係會用鯇魚最靚個部位，所以每塊魚嘅大細都差唔多。湯底真係濃郁到同平時食酸菜魚一樣咁惹味！
胡椒豬肚雞鍋(半鍋$114/全鍋$228)
呢款冬天食就最啱啦！湯底首先用大量雞熬製而成，再加入胡椒粒同鹹菜，而且雞肉非常滑，飲返碗湯暖下胃就最啱啦～
M9澳洲和牛丸($168)
今次亦都順勢推出多款新配料，M9澳洲和牛丸之前就淨係拼盤先有，因為太受歡迎，所以就特登推出單點。和牛丸彈牙之餘牛肉味仲好濃郁，咬落口真係有肉汁咇出嚟架。
油炸鬼墨魚滑拼牛脷酥蝦滑($88)
呢兩款其實就不嬲都有，不過就特意推出拼盤，咁就可以一次試哂兩個口味！記住放落湯浸五秒就食得～
芝士鮮蝦滑丸拼芝士鮮墨魚滑丸($88)、茴香小油條($38)
鮮蝦滑丸同墨魚滑丸爽滑彈牙，而且一咬就會爆芝士，芝士味都好香濃。茴香小油條口感煙煙韌韌，好似油炸鬼咁浸湯食就啱啦。
巴蜀雞($68)、巴蜀牛($118)、巴蜀龍躉魚($168)
麻辣控一定唔可以錯過創新巴蜀系列，特別推薦龍躉魚，有好香嘅麻辣味之餘，仲食到魚嘅味道，而且仲唔會好易散。
朱古力糍粑($58)
平時食開糍粑都係點糖漿，今次就創新啲推出朱古力糍粑，糍粑外脆內軟，點埋朱古力醬估唔到又幾夾！
重慶劉一手火鍋店
地址: 屯門屯順街1號屯門市廣場1期1樓1101-1102號舖
地址: 旺角亞皆老街16號旺角商業大廈2-4樓
地址: 銅鑼灣渣甸街66號Aura on Pennington地下及1樓
文、相、片：Yanica