嚟到初夏，想繼續滿足甜品胃但同時又想食Light啲？沙田區呢間酒店就即將推出以莓果做主題嘅甜品自助餐，當中仲包括最近大熱嘅即製梳乎厘班戟！
 

今次1+1吧嘅初夏繽紛野莓甜品自助餐係5至6月下午茶時段限定，以美國加州嘅莓果做主題。想回本必試由專人用日本Bruno鍋即席炮製嘅梳乎厘班戟，充滿空氣感，入口即溶！
 

當然亦唔少得一系列黑莓、紅莓、草莓、紅加侖子同藍莓為主嘅甜品，例如特濃朱古力伴鮮雜莓蛋糕就用咗72%嘅瑞士朱古力，濃郁朱古力香味同清新莓果香相輔相成。藍莓芝士撻上面鋪滿原粒藍莓，再加藍莓醬去減低芝士撻嘅滯膩感。
 

草莓忌廉蛋糕簡單嘅紅白賣相非常吸睛，輕甜忌廉下面係鬆軟嘅海綿蛋糕。另外仲有黑莓乳酪杯、草莓意大利芝士杯、紅莓玫瑰馬卡龍同紅桑子忌廉奶凍等選擇，記得準備好你嘅甜品胃！
 

1+1吧 初夏繽紛野莓甜品自助餐
供應日期：2017年5月1日至6月30日
供應時間：2:30pm – 5:00pm

文：Cathy