等咗咁耐终於开返晚市堂食啦！各大酒店嘅自助晚餐亦都强势回归，各有唔同主题，而且用OpenRice优惠券或者订座都有折扣优惠。当然都要再提提大家，记得戴好口罩，保持社交距离同个人卫生呀。
和牛主题+6折优惠 Le Cafe 
平时觉得和牛有啲贵唔舍得食太多？而家就畀你用一个价钱任食！精选和牛五食包括日式寿喜烧、慢煮酱烧和牛肩胛肉眼、吉列和牛、和牛串烧、鸭肝和牛炒乌冬。另外亦有海胆粒粒籽丼、叶蟹脚，同专人即开生蚝满足锺意食海鲜嘅各位。
「和牛日式主题」即开生蚝海鲜自助晚餐
供应日期：即日起至2021年3月7日
供应时间：18:00-21:30
价钱：（星期一至四）成人 $548，小童 $338；（星期五至日、公众假期及前夕）成人 $578，小童 $358
龙虾鲍鱼盛宴 Park café
正月当然要食蚝啲，呢间酒店餐厅就以龙虾同鲍鱼为主题，由小食到热盘都有龙虾同鲍鱼，回本必食花雕盐渍龙虾粒蒸蛋、古法竹笼荷叶陈皮蒸鲍鱼海鲜饭、鲍鱼水蟹粥，同鲍鱼野菌挞。其他推介仲有法国生蚝、四重芝士焗生蚝，同地中海千岛龙虾海鲜薄饼呀。
「龙虾‧鲍鱼嚐鲜盛宴」海鲜自助晚餐
供应日期：即日起至2021年5月2日
供应时间：18:30-21:30
价钱：（星期一至四）成人 $518，小童 $358；（星期五至日、公众假期及前夕）成人 $548，小童 $368
优惠券：Park café「龙虾。鲍鱼嚐鲜盛宴」海鲜自助晚餐7折优惠
滋补养生菜式 Three on Canton
非常时期大家都想身体健康，尖沙咀呢间酒店餐厅就推出以滋补有益嘅药膳美馔为主题嘅自助晚餐。特别系主菜以暖胃养生为主，好似当归肉骨茶 、花旗蔘北菇蒸鸡、何首乌黑豆炖肉排汤等。甜品系中西合璧风格，好似菊花香梨意大利奶冻、川椒慕丝蛋糕，够特别。
药膳养生自助晚餐
供应日期：即日起至2021年4月30日
供应时间：18:30-22:00
价钱：（星期一至四）成人 $658，小童 $458；（星期五至日、公众假期及前夕）成人 $698，小童 $488
韩国主题 The Farmhouse 咖啡厅 
知道大家无得飞又挂住韩国美食，呢间酒店餐厅就推出韩国主题嘅自助餐，大家熟悉嘅韩国炸鸡、紫菜包饭、辣炒年糕、海鲜煎饼都应有尽有，连烧肉区都变身为韩烧吧，自选唔同烧肉配搭新鲜蔬菜、韩国醮酱同伴菜！仲有韩国甜年糕同糯米冬甩等甜品，为韩风大餐结尾。
韩国主题自助餐
供应日期：即日起至2021年4月15日
供应时间：18:00-21:59
价钱：（星期一至四）成人 $608，长者/小童 $304；（星期五至日、公众假期及前夕）成人 $678，长者/小童 $339
订座优惠：成人自助晚餐八折
文：Cathy