迪士尼新推「嚐素」菜式 打卡必点米奇新猪肉丸汤、香煎新猪肉薯饼(有片)
2019-04-17

近年多咗朋友都响应Green Monday,甚至系每日都「跑素」,所以唔少人放假都会去嘅香港迪士尼最近亦新增「嚐素」健康菜式,以唔同植物肉入馔,而且有齐中菜同西餐。唔单止令素食人士多个选择,亦系畀平时未有食素习惯嘅人、或者小朋友多一个接触新派素食嘅机会!
 

晶荷轩 打卡必点米奇肉丸汤


花旗参米奇肉丸汤

迪士尼其中两间度假酒店共三间餐厅日前推出全新「嚐素」菜式,中菜代表就有晶荷轩,菜式以新猪肉(Omnipork)为主。好似呢份花旗参米奇肉丸汤就好有惊喜,师傅特别将新猪肉酿入冬瓜当中,造成米奇大头形状!汤底亦系坊间少见嘅花旗参汤,以花旗参、甘笋、马蹄、竹蔗、罗汉果、冬菇等熬成清甜嘅上汤,影相够抢眼之余仲好啱夏天享用。
 


生煎菜肉窝贴

窝贴系唔少人嘅Comfort Food之一,新猪肉可以模仿真猪肉嘅味道同口感,特别加入白菜,菜汁令窝贴咬落更Juicy,模仿埋肉汁效果!而且新猪肉零胆固醇、无抗生素、无激素,食多几件都唔怕有罪恶感。
 


五柳素肉千层

千层其实系一层茄子、一层沙葛、一层新猪肉、一层沙葛、一层茄子咁组成,所以食落既有新猪肉嘅肉味,又有沙葛同茄子爽脆同柔软嘅口感,层次丰富。金黄香脆嘅千层配上甜酸汁,系小朋友都会乐於尝试嘅素菜。
 


松子榄菜肉碎炒银丝

用热辣辣石锅奉上自然系加分点,粉丝加上榄菜同新猪肉碎嘅香味亦自然更突出。值得一提嘅系今次师傅为咗配合「嚐素」主题,调味方面亦无加任何鸡粉或蚝油,尽量利用食材原味配搭出唔同口味。
 

芊彩餐厅 David推介香煎新猪肉薯饼


(左)Green Monday联合创办人杨大伟,(右)香煎新猪肉薯饼

Green Monday联合创办人杨大伟David都有试今次嘅「嚐素」菜式,佢最锺意嘅就系芊彩餐厅呢碟香煎新猪肉薯饼,以日本大阪烧为灵感,将新猪肉混合薯仔丝再煎,非常香脆。另一亮点系薯饼上面黄色嘅唔系生蛋黄,而系藏红花素蛋黄酱,同样有流心效果,亦增加味道层次。
 


植物鸡米纸卷·素凯撒汁

呢碟米纸卷相对就比较清新,半透明烟韧米纸包住各式蔬菜同植物鸡肉,口感爽脆味道清新,点埋素凯撒汁更醒胃,做头盘就最啱。
 

华特餐厅 首推Beyond Burger米堡


烤未来汉堡扒米堡伴烩杂菜

未来汉堡(Beyond Burger)喺香港先後都推出过唔少配搭同口味,不过配搭纯素米堡就系第一次!口感同味道特别之余亦系Gluten free,对麸质过敏嘅朋友都可以放心享用。
 


素肉肠串烧伴青瓜乳酪·杂菜沙律

而有地中海特色嘅素肉肠串烧就选用未来热狗(Beyond Sausage),烤焗後配以青瓜乳酪同杂菜沙律,兼顾香口同清爽两种口味。未来汉堡同未来热狗都由美国食物科研公司 Beyond Meat 研发,零胆固醇,无激素、无抗生素及非基因改造。
 


未来香港迪士尼亦希望推广至更多酒店餐厅,甚至园区当中,将更多素食同健康选择带畀大家。适逄每年4月都系全球迪士尼乐园嘅「地球月」,不妨趁呢个机会尝试以植物肉代替动物肉,更健康之余,同时为环保出一分力。
 




文、相、片:Cathy

关键字
迪士尼
Green Monday
晶荷轩
芊彩餐厅
华特餐厅
米奇肉丸汤
Omnipork
Beyond Burger
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】零食速报 每周新款零食、酒品点评
6天前
【2021生日优惠】持续更新!6月寿星送海鲜拼盘
2021-06-01
《优秀开饭热店大赏2021》赛果公布
2021-05-24
5月份好评餐厅十强
2021-06-04
一秒变出 招牌十八层海胆杯 佐敦小店全新体验 魔术X铁板烧
2021-06-11