想搵一间高质嘅朱古力？西班牙朱古力大师级品牌Casa Cacao正式进驻尖沙咀，於啱啱开业嘅Cupping Room打造期间限定店，亦系品牌於海外首间分店～品牌由着名米芝莲三星级餐厅El Celler de Can Roca所有，并由曾夺得「世界最佳甜点主厨」殊荣嘅甜点大师Jordi Roca主理。

Casa Cacao主打「Bean-to-Bar」朱古力概念，完美结合咗朱古力工厂、零售店及咖啡室，主厨及其团队从哥伦比亚、厄瓜多尔、委内瑞拉、秘鲁、多米尼加共和国及印度等地严选当地可可豆。当可可豆抵达赫罗纳Casa Cacao工场後，就会经过手工分拣、烘焙、开殻研碎以及筛选嘅过程，然後同有机蔗糖及可可脂混合，跟住进行精炼过程至少48小时，以确保朱古力入口幼滑如丝。

今次海港城Pop-up店，除咗有独立包装唔同味道嘅特色朱古力，仲有供应礼盒装及朱古力热饮～首先讲吓独立包装朱古力，由唔同原产地区到唔同可可比例都应有尽有。锺情黑朱古力嘅客人可以选择由66%至80%可可嘅五款唔同口味。同时，牛奶朱古力迷可以试吓四款由45%到60%、以绵羊和山羊奶、以及传统牛奶炮制嘅朱古力。另外Pop-up店中亦会供应两款以70%委内瑞拉可可制作而成嘅埃塞俄比亚咖啡口味以及柑橘甘草口味。

因为就到新年及情人节，品牌亦有推出朱古力礼盒套装，如32粒装朱古力Bombones礼盒，包含八个口味朱古力，口味有秘鲁Pirua可可豆、柠檬皮+葵花籽及12年amontillado雪利酒等！

不可错过仲有Casa Cacao招牌热朱古力，由72%於印度喀拉拉邦凯思帕拉森林中种植同发酵嘅可可制作而成。呢款热朱古力散发淡淡嘅葡萄乾同杏子香气，而且味道唔会过份苦涩，甜酸度完美平衡。另外仲有摩卡咖啡特饮～

Casa Cacao x Cupping Room Coffee Roasters

地址: 尖沙咀广东道3-27号海港城海洋中心3楼309号舖

文、相: Yanica